LEAG starosći so koaliciskich jednanjow dla
Choćebuz (SN/BŠe). Předewzaće Łužiska energija a milinarnje (LEAG) ze swojimi něhdźe 7 400 sobudźěłaćerjemi starosći so wuslědkow sonděrowanskich rozmołwow mjez SPD, Zelenymi a FDP dla. Minjeny pjatk předstajichu zastupjerjo stronow rezultaty a mjenowachu mjez druhim ručiši kónc wudobywanja brunicy. W idealnym padźe chcedźa jón hišće do lěta 2030 zwoprawdźić. Brunicowa komisija bě so po dołhim wotwažowanju na lěto 2038 dojednała.
Mjeztym je jasne, zo chcedźa zastupjerjo stron koaliciske jednanja zahajić. „We wuchodoněmskich brunicowych rewěrach so boja, zo so koaliciske strony za zažniši termin rozsudźa, bjez toho zo tajku móžnosć do toho wěcownje pruwuja“, zdźěli předwčerawšim nawoda předsydstwa LEAG dr. Helmar Rendez. „Njeje móžno sprócniwje docpěty kompromis politiskemu konsensej noweje knježerstwoweje koalicije woprować. Ludźo w brunicowych kónčinach maja tomu dowěrić móc, zo so zakoń wo skónčenju zmilinjenja na zakładźe brunicy zwoprawdźi.“
Sabina Žurowa debituje z knihu
Němska za spěšne jednotki
Brüssel (dpa/SN). Němska je zhromadnje ze štyrjomi dalšimi krajemi nowu iniciatiwu za natwar spěšneje wojerskeje zasadźenskeje jednotki zahajiła. Po informacijach powěsćernje dpa koncept předwidźi, hižo wobstejace jednotki wutwarić a na spěšnje zasadźomne na krizy reagowace mocy wuwić. „Najnowše podawki w Afghanistanje su pokazali, zo dyrbi EU kmana być robustnje a spěšnje jednać.“ Tak rěka w koncepće, kotryž běchu Němska, Nižozemska, Portugalska, Finska a Słowjenska zhromadnje zdźěłali.
Žadaja sej sylneho nawodu
Berlin (dpa/SN). FDP chce na čole Zwjazkoweje banki po připowědźenym wotstupje jeje prezidenta Jensa Weidmanna kontinuitu. Financny politikar Florian Toncar rjekny powěsćerni dpa: „Jens Weimann bě sylny prezident Zwjazkoweje banki. Wón wobhladuje přiběracu politizaciju měnowych bankow runje tak kritisce kaž ultralochku pjenježnu politiku minjenych lět.“ Po dźesać lětach na čole Zwjazkoweje banki chce Weidmann zastojnstwo kónc lěta złožić.
Trump załoži swójsku syć
Připrawa za pjelnjenje płunowych blešow je so dźensa w ...
Zeleni žadaja sej razniši kurs Pólskej napřećo
Berlin (dpa/SN). Do dźensa zahajaceho so wjerškoweho zetkanja čłonskich statow EU w Brüsselu su sej Zeleni wot zwjazkoweje kanclerki Angele Merkel (CDU) razniši kurs Pólskej napřećo žadali. Pólski ministerski prezident Mateusz Morawiecki wohroža čłonstwo swojeho kraja w EU a staja so tak přećiwo wjetšinje wobydlerjow, rjekny europska politikarka Zelenych Franziska Brantner powěsćerni dpa. „Je njezamołwite, zo je kanclerka Merkel jemu dale poboku, město toho zo by so z ludźimi solidarizowała.“
Zwada wo pólsku justicnu reformu a najnowši rozsud pólskeho wustawoweho sudnistwa k wobmjezowanemu nałožowanju prawa EU w Pólskej budźetej drje hłownej temje wjerška, kotryž so dźensa a jutře wotměwa. Prezidentka komisije EU Ursula von der Leyen bě Pólskej naposledk ze sankcijemi hrozyła. Angela Merkel chcyła porno tomu dialog pěstować. Wona chcyše so dźensa hišće do zahajenja wjerška z Morawieckim zetkać. Tón bě předwčerawšim, wutoru, w Brüsselu rozsud pólskeho wustawoweho sudnistwa zakitował a Europskeje uniji „wudrěwanje“ wumjetował.
Koaliciske jednanja zahajene
Berlin (dpa/SN). Nimale měsac po wólbach Zwjazkoweho sejma Němskeje su SPD, Zeleni FDP dźensa koaliciske jednanja k wutworjenju zhromadneho zwjazkoweho knježerstwa zahajili. W halach Berlinskich wikow schadźowachu so hłowni jednaćeljo, stajnje šěsć zastupnikow kóždeje strony, z nawodami 22 dźěłowych skupin. W nich chcedźa fachowi politikarjo nadrobnosće koaliciskeho zrěčenja wujednać. Hłowne problemy drje budu financna a dawkowa politika kaž tež naprawy za škit klimy.
Sakski ministerski prezident Michael Kretschmer (CDU) plany stron wo móžnym dočasnym kóncu zmilinjenja brunicy w lěće 2030 raznje kritizuje. „To je wulki łamk dowěry runje ze stron SPD a FDP“, rjekny wón Drježdźanskim nowinarjam. „Dobra politika so tež pokazuje, hdyž konflikty přewinješ a wšelake zajimy wurunaš.“ Kretschmer skedźbni w tym zwisku na wobćežne dźěło wuhloweje komisije, kotraž bě so na lěto 2038 jako kónc brunicy dojednała, a „tónle termin měli tež dodźeržeć“.
Dokładnje přihotować
Ćěkancow při wohenju lepili
To a tamne (21.10.21)
Policistam swoje hrajki pokazać chcył je štyrilětny hólc w Nowoseelandskej a je za to nuzowe čisło 111 wolił. Słužbu wukonjacy zastojnik bě hnuty a so k hólčkej domoj nastaji. Po tym zo bě sej hrajki wobhladał a pachołkej policajske awto z módrej swěcu předstajił, pak wón pjerachej a jeho staršimaj w „pedagogiskej rozmołwje“ rozłoži, zo je nuzowe čisło 111 jeno za nuzowe pady myslene.
Na wšě 159 000 eurow wunjesł je 505 kilogramow ćežki, jědnaće měsacow stary byk při přesadźowanju skotu w hornjobayerskim Weilheimje. Je to druha najwyša suma, kotruž su hdy w Němskej a Awstriskej za byka płaćili. Kupiło je jeho sewjerošwabske nasymjenjenske towarstwo w nadźiji, zo so inwesticija ze symjenjom byka Senatora zaso wupłaći. Toho geny lubja po dotalnym přepytowanju „strowe a płódne potomnistwo“.
Zahaja koaliciske jednanja
Berlin (dpa/SN). SPD, Zeleni a FDP chcedźa jutře popołdnju koaliciske jednanja wo wutworjenju zhromadneho knježerstwa zahajić. Kaž powěsćernja dpa rozprawja, planuja 22 dźěłowych skupin. W nich chce něhdźe 300 fachowych politikarjow nadrobnosće we wšelakich wěcnych temach a politiskich polach rozjimać. Předewšěm jednanja wo financowanju dojednanych projektow drje budu wobćežne. Zaměr wostanje, nowe knježerstwo hišće do hód wutworić.
Wulkopósłanc za płunowód
Berlin (dpa/SN). Wulkopósłanc Ruskeje w Němskej Sergej Nječajew liči po swójskich wuprajenjach z tym, zo tež nowe zwjazkowe knježerstwo dotwarjeny płunowód Nord Stream 2 wužiwa. „Projekt wotpowěduje zajimam němskeho hospodarstwa a wobydlerjow. Wón zaruča zastaranje z energiju, rjekny Nječajew Berlinskim nowinarjam. Nimo toho je płunowód projekt wjacorych krajow a wšitkim wobdźělenym wunošny. Zeleni sej žadaja projekt blokować.
Wuwiće płaćiznow njewěste
