Komuny za kónc nuzoweho stawa korony dla
Berlin (dpa/SN). Zwjazk městow a gmejnow Němskeje podpěruje namjet zwjazkoweho ministra za strowotnistwo Jensa Spahna (CDU), nuzowe połoženje koronawirusa dla skónčić. „Wuwzaćny staw po nimale dwěmaj lětomaj dale podlěšić mam za wopačne“, rjekny hłowny jednaćel zwjazka Gerd Landsberg nowinarjam. „Kak dołho chcemy z nim hladajo na šćěpjensku kwotu něhdźe 80 procentow hišće pokročować?“, so Landsberg prašeše. To wšak njerěka, zo je korona kompletnje nimo. By pak to „wažny signal ludźom, towaršnosći a hospodarstwu“ był. Dyrbjało-li so połoženje přez zymu zaso pohubjeńšić, dyrbjał sej zwjazkowy sejm znowa hłójčku łamać.
Epidemiske połoženje twori zakład wukazow a centralnych naprawow koronawirusa dla w Němskej. Jens Spahn bě so póndźelu na wuradźowanju ze strowotniskimi ministrami zwjazkowych krajow přećiwo tomu wuprajił, epidemiske połoženje podlěšić. Tak by wšoněmske nuzowe połoženje 25. nowembra wuběžało.
Kretschmer: Lukašenkej so stajeć
Drježdźany (dpa/SN). Sakski ministerski prezident Michael Kretschmer (CDU) chce so dalšemu ilegalnemu zapućowanju ćěkancow z Běłoruskeje přez Pólsku raznje wobarać. Dyrbimy problem přewinyć, rjekny wón dźensa w rańšim magacinje telewizije ZDF. Běłoruskemu mócnarjej Aleksanderej Lukašenkej dyrbjała so Europska unija „stajeć“. EU njesmě so wot „tajkeho despota“ wudrěwać dać, sej Kretschmer žadaše.
Nimo wobstejacych naprawow chcył sakski premier Pólsku při zawěsćenju wonkowneje mjezy Europskeje unije k Běłoruskej podpěrować. Nimo toho měli na runinje EU skutkowne sankcije přećiwo wšěm tym wukazać, kotřiž so na pašowanju ćěkancow wobdźěleja: lětanske předewzaća, firmy, staty a wosoby. Zdobom Michael Kretschmer potwjerdźi, zo su dimensije přiwšěm snadniše hač w krizy lěta 2015.
Zwjazkowa policija je lětsa hižo wjace hač 5 000 ilegalnych zapućowanjow registrowała, mjez druhim w Sakskej. Ličba je minjene tydźenje spochi přiběrała.
Razne słowa w parlamenće EU
Pólskemu premierej Morawieckemu pačenje wumjetowali
Strasbourg (dpa/SN). Pólski ministerski prezident Mateusz Morawiecki je sej wot wulkeho dźěla Europskeho parlamenta wčera raznu kritiku naposkać dyrbjał. „Ze swojej narěču wusywaće tule zwadu a pačenje w Europskej uniji. Wy Europu wosłabiće“, rjekny předsyda frakcije EVP Manfred Weber. „Nad tym wjeseli so jenož ruski prezident Wladimir Putin. Prošu přestańće z tym“, sej politikar CSU žadaše. „Štóž primat Europskeho sudnistwa wotpokazuje, štóž Europsku uniju jako prawniske zhromadźenstwo wotpokazuje, štóž njewotwisnosć justicy wotpokazuje, tón je z Europskeje unije faktisce hižo wustupił“, Weber potwjerdźi.
Pozadk je debata w Strasbourgskim parlamenće wo wusudźe pólskeho wustawoweho sudnistwa spočatk oktobra. Po tym njewotpowěduje prawo EU w někotrych dźělach pólskim zakonjam. Rozsud maja w Brüsselu za wulce kritiski, dokelž móhł wón pólskemu knježerstwu zakład skićić jemu njelube rozsudy Europskeho sudnistwa prosće ignorować.
Za strowy rozum
To a tamne (20.10.21)
W hoberskim kuchinskim horncu na kwas přijěł je młody porik w Indiskej. Dny trajace zliwki běchu dróhi zapławili. Tuž so porik rozsudźi, w horncu do něhdźe poł kilometra zdaleneho templa jěć. Swójbni a přećeljo jimaj pomhachu a stajichu wideja a wobrazy wo tym do interneta. Poprawom chcyštaj sej čołmik wobstarać, štož pak so njeporadźi. W tohorunja zapławjenej hali templa jeju duchowny wěrowaše. Tajke hoberske horncy wužiwać wšak njeje w Indiskej njewšědne. Při zapławjenju lěta 2018 běchu mnohich na te wašnje wuchowali.
Swojeho handyja dla z woknom padnyła je młoda žona w Essenje. Wona steješe minjenu nóc při woknje na prěnim poschodźe domu, jako so jej telefon z ruki wusuny. Jako chcyše za nim hrabnyć, zhubi runowahu a padny z bydlenja. Na zbožo je so jeno snadnje zraniła.
„Moja wutroba słuša do Łužicy“
W politiskej krajinje tež našeho regiona wuhladaš dale a wjace młodych mjezwočow. K nim słuša 20lětny Jan Clausen. Wot oktobra 2020 wón w Lipsku prawnistwo studuje. „Sym so přeco hižo za politiku, hospodarstwo, towaršnosć a stawizny zajimował, a w prawje su wone wšě zjednoćene“, wón swój rozsud wopodstatnja. Za politiku zajimował je so Jan hižo jako 13lětny pachoł.
Wot lětušeho junija je z Pančic-Kukowa pochadźacy Serb čłon Zwjazkoweho předsydstwa Domowiny. Dźěło w gremiju so jemu jara spodoba. Temy, z kotrymiž so tam rozestajeja, jeho „wobohaćeja a horicont powjetšeja“. Tež w młodźinskim towarstwje Pawk je wón aktiwny. Wosebita naležnosć Clausenej je serbskej młodźinje posrědkować, zo je za přichod wažne cyłki wutworjeć. Młodostni měli zasadnje wjace zamołwitosće přewzać, so sylnišo słowa jimać a sej předewšěm jasne swójske měnjenje tworić.
Zwjazk inwestuje miliardu eurow do hladarnje ćahow
Choćebuz (dpa/SN). W delnjołužiskim Choćebuzu nastawa nowy centrum, kotryž ma wo naprawach strukturneje změny we Łužicy informować. K njemu słuša tež nowa hladarnja ćahow Němskeje železnicy, kotraž dyrbi tam wot lěta 2024 dźěłać. Jako zakład přewjedźechu minjeny pjatk symboliski prěni zaryw za twar informowanišća direktnje při hłownym dwórnišću, kaž powěsćernja dpa zdźěli. Klětu kónc februara chcedźa je wotewrěć.
150 kwadratnych metrow wulke twarjenje ma aktualny staw planowanjow noweje železniskeje twornje nazornje pokazować kaž tež wo postupje twarskich dźěłow informować. W pawiljonje předstajeja nimo toho dalše projekty, kotrež financuja z inwesticiskeho zakonja Zwjazka za wuhlowe kónčiny a z kotrymiž chcedźa zamołwići politiki změnu strukturow w Braniborskej spěchować. Přidatnje skići pawiljon městno za wšelakore zarjadowanja. Pjenjezy za twar informaciskeho centruma w Choćebuzu pochadźeja z fondsa wo skrućenju strukturow Zwjazka.
Von der Leyen Pólskej hrozy
Strasbourg (dpa/SN). Prezidentka komisije EU Ursula von der Leyen je Pólskej z ćežkimi sankcijemi hrozyła, po tym zo bě wustawowe sudnistwo we Waršawje pólske prawo nad prawo EU stajiło. Komisija je rozsudźena jednać, rjekny von der Leyen dźensa w debaće z pólskim ministerskim prezidentom Mateuszom Morawieckim w Europskim parlamenće w Strasbourgu. Konkretnje mjenowaše wona móžne skrótšenje spěchowanskich srědkow. Morawiecki porno tomu je postupowanje Pólskeje znowa zakitował.
Ruska běrow NATO zawrje
Moskwa/Brüssel (dpa/SN). W zwadźe wo wupokazanje ruskich diplomatow z Brüssela chce Ruska swoje sobudźěło w stajnym zastupnistwje NATO spočatk nowembra přetorhnyć. Runočasnje ma so tež dźěło informaciskeho centruma zapadneho wojerskeho pakta a jeje wojerskeje misije w Moskwje skónčić. „NATO njeje ani na runoprawnym dialogu ani na zhromadnym dźěle zajimowana, zdźěli ruski wonkowny minister Sergej Lawrow. NATO ruskim diplomatam w Brüsselu wumjetuje, zo su agenća.
Warnuja před hospodarskej krizu
Ze swjatočnej ceremoniju su wčera na antikskim městnje Olympia w ...
Strony hotuja so na koaliciske jednanja
Berlin (dpa/SN). Po přihłosowanju swojich stronskich gremijow hotuja so SPD, Zeleni a FDP wotnětka na koaliciske jednanja. Z rozmołwami móhli hišće tónle tydźeń započeć. Spočatnje chcedźa so generalni sekretarojo zetkać, zo bychu je strukturowali. Přezjedni sej su, zo chcedźa nowe zwjazkowe knježerstwo hač do hód wutworić.
Předsyda SPD Norbert Walter-Borjans je mjeztym přiznał, zo njejsu wšelake předewzaća móžneje amploweje koalicije dotal financujomne. Inwesticije do přichoda nastupajo by woprawnjene było, za to tež nowe kredity brać. Minjeny pjatk běchu zastupnicy stron swoje sonděrowanja skónčili a wuslědki předstajili. Tak nochcedźa dawki zwyšić. Zakonsku minimalnu mzdu chcedźa na dwanaće eurow zwyšić. Hladajo na škit klimy móhli zmilinjenje brunicy w najlěpšim padźe hižo lěta 2030 skónčić.
