Wojacy do Bosniskeje
Berlin (dpa/SN). Zwjazkowa wobora měła so po woli wonkowneje ministerki Annaleny Baerbock (Zeleni) na wojerskej misiji EU w Bosnisko-Hercegowinje wobdźělić. Po tym ma do wólbow 2. oktobra kontingent němskeho wójska akciju „Eufor“ podpěrować, medije rozprawjeja. Eufor stara so wot lěta 2004 w Bosniskej wo přesadźenje Daytonskeho měroweho zrěčenja z lěta 1995 k skónčenju wójny. Wot 2012 njeje Němska wjace na Eufor wobdźělena. Na Balkanje hroža nowe napjatosće.
Mjenje njeskutkow
Berlin (dpa/SN). Zwjazkowa nutřkowna ministerka Nancy Faeser (SPD) měješe dźensa při předstajenju najnowšeje kriminalneje statistiki zwjeselacu powěsć: Ličba wot policije registrowanych chłostajomnych njeskutkow je lěta 2021 pjate lěto za sobu woteběrała. Koronapandemije dla mějachu sej paduši loni ćešo, wopory namakać. Přiběrała je porno tomu ličba njeskutkow w interneće. Tež wikowanje ze zwobraznjenjom splažneho znjewužiwanja dźěći je přiběrało.
Pytaja za smjertnymi třělcami
Jesse Jackson (2. wotprawa), sławny zastupnik hibanja wo prawa ...
Wotpokazuja kritiku Melnyka
Berlin (dpa/SN). Zwjazkowe knježerstwo je raznu kritiku ukrainskeho wulkopósłanca Andrija Melnyka přećiwo zwjazkowemu prezidentej Frankej-Walterej Steinmeierej wotpokazało. Zastupowacy knježerstwowy rěčnik Wolfgang Büchner rjekny wčera na wotpowědne naprašowanje, zo ma knježerstwo zrozumjenje za wuwzaćne połoženje, w kotrymž Ukraina w tutej grawoćiwej wójnje je. „Na zwjazkoweho prezidenta měrjacu so kritiku pak wotpokazujemy.“
Melnyk bě Steinmeierej w rozmołwje z nowinarjemi wumjetował, zo je Ruskej politisce bliski, na čimž tež wójna přećiwo Ukrainje ničo změniła njeje, wón rjekny. Němska ma dale přewjele swójskich zajimow, mjez druhim wotwisnosće wot płuna, wolija a wuhla dla. Na tym je Steinmeier sobu wina, wšako bě swój čas wonkowny minister a je „pawčinu kontaktow“ do Ruskeje natwarił, do kotrejež su nětko politikarjo ample splećeni.
Razne reakcije
Powětr jara zanjerodźeny
Genf (dpa/SN). Nimale cyłe čłowjestwo je po informacijach swětoweje strowotniskeje organizacije WHO nuzowane, zanjerodźeny powětr dychać. Něhdźe 99 procentow swětoweho wobydlerstwa dycha powětr, w kotrymž su hranične hódnoty za drobny proch a dusykowy dioksyd překročene, rěka w najnowšej rozprawje WHO. Model zepěra so na daty 6 000 měrjenskich stacijow w 117 krajach swěta kaž tež na daty, kiž su satelity znosyli.
Kóžde lěto po wšěm swěće wjace hač sydom milionow ludźi na sćěhi zanjerodźeneho powětra zemrěje, zdźěla wobswětowa medicinarka Maria Neira. Drobny proch móže so do płucow a kreje zadobyć, dychanje poćežować a problemy wutroby a wobtoka kreje zawinować. Dusykowy dioksyd nastawa wosebje w motorach awtow. Organizacija UNO bě hranične hódnoty za škódne maćizny w powětře loni čujomnje znižiła.
Předsyda WHO Tedros Ghebreyesus rěčeše wo „nuznej trěbnosći“, globalnu wotwisnosć wot fosilnych žórłow energije wo wjele spěšnišo znižić.
Zelenskyj: Dopokazy zběrać
Ruska dale twjerdźi, zo njeje za masaker w ukrainskej Buči zamołwita
Kijew (dpa/SN). Ukrainski prezident Wolodymyr Zelenskyj chce złóstnistwa přećiwo ciwilistam w Buči a druhich ukrainskich městach nadrobnje přepytować dać. Za to dźěłaja zamołwići wusko z Europskej uniju a mjezynarodnym chłostanskim sudnistwom hromadźe, rjekny Zelenskyj minjenu nóc we widejowym poselstwje. Do toho bě wón wosobinsce w měsće Buča pobył a so wo surowych podawkach informować dał.
Ukrainske statne rěčnistwo ma mjeztym wjace hač 7 000 informacijow wo ruskich wójnskich złóstnistwach w kónčinje wokoło Kijewa. Najwjace woporow su w městačku Borodjanka namakali.
Prawo na racholenje?
To a tamne (05.04.22)
W bijeńcy skónčiła je so wosobinska rozmołwa šefa ze sobudźěłaćerjom na parkowanišću w sewjerorynsko-westfalskim Hagenje, doniž policija njepřijědźe. Mužej běštaj so tam zetkałoj, zo byštaj wo hišće njepłaćenych mzdach rěčałoj. Połoženje pak so spěšnje přiwótři, jako šef (40) swojeho sobudźěłaćerja (60) z baseballowym retlom nadběhowaše. Tón spyta so z kijom wobarać a ćisny cyhel na šefa. Policija móžeše jeju změrować.
Třoch wulkowikowarjow drogow je policija w Düsseldorfje zajała. Mužojo a dalši kumpanojo su podhladni, zo su w běhu jednoho lěta wjace hač dwě tonje drogow předawali a tak miliony eurow zasłužili. Tak su mjez měrcom 2020 a junijom 2021 z tonami marihuany, 50 kilogramami hašiša a 30 kilogramami kokaina wikowali. Policija móžeše jich zaklučowanu komunikaciju wuslědźić.
Scholz: Wójnske złóstnistwo
Surowe wobrazy z ukrainskeho města Buča mjezynarodnje zludaja
Berlin (dpa/SN). Zwjazkowy kancler Olaf Scholz (SPD) je wójnske złóstnistwa ruskich wojakow přećiwo ciwilistam w měsće Buča zasudźił a nowe sankcije přećiwo Ruskej připowědźił. „Rozsudźimy w kruhu zwjazkarjow přichodne dny wo dalšich naprawach“, Scholz wčera wječor rjekny, bjez toho zo by nadrobnosće mjenował. Ruski prezident Wladimir Putin a toho podpěraćeljo pak změja skutkownosće naprawow začuwać. „A přewostajamy Ukrainje dale brónje, zo móhła so přećiwo ruskej inwaziji wobarać. Scholz wopisowaše sceny z městačka Buča, kotrež bě hač před někotrymi dnjemi hišće wot ruskich jednotkow wobsadźene, ze słowami: „Dróhi połne ćěłow, chwatnje pohrjebani morjeni.“ Wón potwjerdźi: „Morjenje ciwilistow je wójnske złóstnistwo. Tute złóstnistwa ruskich jednotkow dyrbimy ze wšej konsekwencu wotkryć.“ Mjeztym je ukrainske generalne statne rěčnistwo přepytowanja připowědźiło.
Prawosławne cyrkwje zničene
Kijew (B/SN). Po podaćach zarjadnistwa za etniske naležnosće a swobody swědomja w Kijewje je ruske wójsko dotal za čas wójny 59 domow nabožneho charaktera w Kijewje, Donjecku, Žytomyru, Zaporižžju, Luhansku, Sumy, Charkiwje und Černihiwje wobškodźiło abo dospołnje skóncowało. „W času, hdyž propagandisća Krjemla swoje zaměry cynisce jako ,škit ortodoksneje wěry‘ zamazaja, ruiněruja agresiwne nadpady ruskeho wójska ortodoksne cyrkwje a nabožne zetkanišća“, pisa mjenowane zarjadnistwo na swojej internetnej stronje.
Jako symbol zwjazanosće
