Waršawa (dpa/SN). W Pólskej starosća so wospjet wo žiwjenje wjacorych hórnikow. Wysoka koncentracija metana je pytanje za dźesać zhubjenymi nachwilnje haćiła, dokelž hrožeše strach rozbuchnjenja. Za čas zarženja zemje w juhopólskich wuhlowych podkopkach Zofiówka w Jatsrębie-Zdróju bě 52 hórnikow pod zemju. 42 z nich so sami wuswobodźichu. Wuchowarjo móžachu so k štyrjom zasypanym předrěć, kotřiž pak hižo wjace njereagowachu. Na to dowjezechu jednoho z nich na powjerch, hdźež móžeše lěkar jenož hišće smjerć 36lětneho nana dweju dźěći zwěsćić. Hdźe móže šěsć zhubjenych hórnikow być, dotal hišće njewědźa, hórniske předewzaće zdźěli.

Hakle minjenu srjedu bě w podkopkach samsneho šleskeho hórniskeho předewzaća dwójce metanowy płun rozbuchnył. Pjeć hórnikow móžachu jenož hišće mortwych chować. Za sydom dalšimi dyrbjachu pytać přestać, dokelž hrožeše strach dalšich detonacijow. Kaž nawodnistwo zawoda informuje, klumpaja čerstwy powětr do podkopkow, zo bychu strach detonacijow znižili. To pak płaći wuchowarjow wjele chwile.

Sezonu dujerjow na wěži su wčera w Kamjenicy zahajili. Na balkonje Stareje radnicy je pozawnowy chór z Grüna zahudźił. Hač do adwentneho časa chcedźa hudźbnicy Kamjeničanskeje wosady a wo­kolnych wosadow kóždu sobotu rano ­połhodźinski koncert poskićić. Zaklinčeć maja twórby Johanna Sebastiana Bacha runje tak kaž moderne kruchi. Tradicija hudźenja na wěži saha hač do 1980tych lět a nasta na priwatnu iniciatiwu.

Awto z hata wućahnyli su wohnjowi wobornicy w sauerlandskim Lennestedtće. Wóz bě wčera rano do hata zajěł, dokelž bě wobsedźer na to zabył, ručne borzdźidło kruće přićahnyć. Kaž rěčnik wohnjoweje wobory zdźěla, so akcija jenož z pomocu dweju nurjakow towaršnosće za wuchowanje žiwjenja poradźi. Tójšto wćipnych wuchowansku akciju z 45 pomocnikami wobkedźbowaše.

Berlin (SN/JaW). Natalie Pawlik je nowa społnomócnjena zwjazkoweho knježerstwa za prašenja wusydlencow a narodne mjeńšiny. Zwjazkowy kabinet je zapósłanču SPD w Zwjazkowym sejmje Němskeje tele dny do zastojnstwa powołał. 1992 w ruskim Wostoku narodźena politikarka bu loni za socialdemokratow do zwjazkoweho sejma wuzwolena. Wona přewozmje zastojnstwo wot dr. Bernda Fabritiusa, kiž je wot 11. apryla 2018 jako społnomócnjeny za prašenja wusydlencow a narodne mjeńšiny skutkował. Fabritius dźakowaše so za jemu wuprajene připóznaće a zwuraz­ni mjez druhim na twitteru, zo sej přeje, zo by so jeho naslědnica „přewšo aktualnych temow doraznje a čućiwje přimała“. Fabritius dale připowědźi, zo budźe „temowy wobłuk dale dokładnje sćěhować“.

Drježdźany (dpa/SN). Sakski ministerski prezident Michael Kretschmer chcyše dźensa nutřkowneho ministra Rolanda Wöllera (wobaj CDU) ze zastojnstwa pušćić. Tole rozprawjeja medije, powołujo so na informacije z kruhow knježerstwa. Je to reakcija na wšelake dwělomne personalne rozsudy ministra a na wjacore skandale w rjadach policije. Kretschmer chcyše so po redakciskim kóncu k tomu zjawnje wuprajić. Minjene dny bě ćišć na Wöllera čujomnje přiběrał.

Debatuja wo zniženju dawka

Berlin (dpa/SN). W diskusiji wo móžne zniženje nadhódnotoweho dawka na žiwidła su měnjenja rozdźělne. Frakciski šef FDP w zwjazkowym sejmje Christian Dürr kritizuje, zo njeby tajka naprawa ludźom ze snadnymi dochodami woprawdźe pomhała. Porno tomu ma frakciski šef Lěwicy Dietmar Bartsch zniženje dawka za naprawu, kotraž by hnydom skutkowała. Socialne zwjazki běchu sej wčera žadali, nadhódnotowy dawk na přikład za sad a zeleninu znižić.

Zranjeni při rozestajenjach