Šiman: Embargo wolija wohrožuje dźěłowe městna
Budyšin (dpa/SN). Za Marka Šimana, zapósłanca CDU w Sakskim krajnym sejmje, njeje přetorhnjenje importa ruskeho zemskeho wolija za wuchodoněmsku rafineriju w Schwedće tak jednore a praktikabelne kaž zwjazkowy minister za hospodarstwo Robert Habeck (Zeleni) zjawnosći to sposrědkuje. Sankcije přećiwo Ruskej su wažne, tola optimizmej ministra nastupajo spěšne narunanje wolija njemóže so Šiman přizamknyć. „Wotwisnosć wot ruskeho zemskeho wolija při zastaranju wuchodneje Němskeje z bencinom, dieselom a kerozinom ze Schwedta je tak wulka, zo bychu při přetorhnjenju produkcije rafinerije we wuchodoněmskej industriji tysacy dźěłowych městnow – nic jenož w rafineriji – wohrožene byli“, w nowinskej zdźělence zapósłanca rěka. Šiman ministra namołwja, so wo to postarać, zo so wosebje raznym wuskutkam za wuchod přez hospodarske sankcije zadźěwa. To njepłaći jenož za płaćizny energije, Budyski zapósłanc potwjerdźi.
Ukrainske wójsko wuspěšne
Kijew (dpa/SN). Ukrainske wojerske jednotki wozjewjeja wulke wuspěchi nastupajo přećiwnu ofensiwu na wuchodźe kraja pola Charkiwa. Tak su na jednym městnje Rusku-Ukrainsku hranicu docpěli. Wotpowědny widejo z wojakami je ukrainske zakitowanske ministerstwo w nocy na dźensa wozjewiło.
Minjene dny je ukrainske wójsko hižo rozprawjało, zo zamóža ruske wójsko pola Charkiwa wróćo tłóčić. Ruska je swojich wojakow hižo na sewjeru Ukrainy wotwołała a koncentruje so mjeztym intensiwnje na regiony Donjeck a Luhansk, hdźež z pomocu proruskich separatistow wot lěta 2014 někotre kónčiny kontroluje.
Po słowach ukrainskeho knježerstwa zwrěšći tuchwilu wuchowanje zranjenych wojakow z woclownje w Mariupolu. Ruske wójsko twornju intensiwnje wobtřěla. Mjeztym jewja so w kraju kritiske słowa, zo knježerstwo swojim wojakam njepomha a njepřećelam přewostaji. Kaž zakitowanske ministerstwo zdźěli, njeje tuchwilu wuchowanje móžne.
Dobyćerjej z nowym zwjazkom
Wólby krajneho sejma w Sewjerorynsko-Westfalskej z jasnym wuslědkom
Düsseldorf/Berlin (dpa/SN). Po jasnym dobyću CDU ministerskeho prezidenta Hendrika Wüsta při wólbach krajneho sejma w Sewjerorynsko-Westfalskej pytaja tam za móžnym nowym knježerstwowym zwjazkom. Wón ma nadawk „přichodne knježerstwo wutworić a nawjedować“, rjekny 46lětny wčera po wozjewjenju wólbnych wuslědkow. Dotalna čorno-žołta koalicija nima hižo žanu wjetšinu wjace, dokelž je FDP dramatiske straty poćerpjeła. Tohodla je prawdźepodobne, zo wutwori CDU knježerstwowy zwjazk ze Zelenymi, kotřiž móžachu rekordny wuslědk docpěć. Při wšěm njeje tež SPD nadźiju hišće spušćiła, zhromadnje ze Zelenymi a FDP amplowu koaliciju wutworić. „Sym zwólniwy“, rjekny načolny kandidat SPD Thomas Kutschaty na swjedźenju SPD. Dobyće CDU a dobry wuslědk Zelenych w jeho wočach awtomatisce njerěka, zo dyrbitej wobě stronje tež knježerstwo wutworić, wón rjekny.
Absurdne wuprajenje
To a tamne (16.05.22)
Hač do zymy je hišće dołha noha, ale přiwšěm hižo wjele dźěći na swj. Mikławša mysli a jemu listy pisa. Wjac hač 2 000 dopisow je hižo póštowej staciji w posaarskim St. Nikolaus dóšło. Wjele dźěći pisaja, zo so wysokich płaćiznow dla chětro starosća a jich přeća so hižo spjelnić njemóža. Dalši dopisowarjo přeja swj. Mikławšej rjane lěćo. Kaž je z wašnjom, dóstanje kóžde dźěćo wotmołwu na kotruž pak dyrbja hišće dołho čakać. Najzašo budźe to na swjateho Mikławša w decembrje.
Na štyrjoch najwjetšich grjekskich wysokich šulach ma so přichodnje uniwersitna policija wo wěstotu starać. Dotal njeje policija akademiskeje swobody a swójskeho zarjadnistwa dla přistup na ležownosće dóstała. Na městnosćach knježi kriminalita a namóc. Minjeny tydźeń je grjekske sudnistwo reagowało a załoženje jednotkow přikazało.
Wo zežiwjenju wuradźowali
Stuttgart (dpa/SN). Wo sćěhach wójny na Ukrainje za globalnu wěstotu zežiwjenja su ratarscy ministrojo wulkich industrijnych krajow G7 dźensa w Stuttgarće rěčeli. Na zetkanju na hrodźe Hohenheim bě tež ukrainski ratarski minister Mykola Solskyj přitomny. Wón rozprawješe wo połoženju we wot Ruskeje nadpadnjenym kraju. Němska skupinu G7 tuchwilu nawjeduje. Jej přisłušeja nimo Němskeje USA, Kanada, Francoska, Wulka Britaniska, Italska a Japanska.
Tójšto prawicarjow w zarjadach
Berlin (dpa/SN). Zwjazkowy zarjad za wustawoškit ma konkretne pokiwy na to, zo je w rjadach policije, zwjazkoweje wobory a tajnych słužbow wjace hač 300 prawicarskich ekstremistow a tak mjenowanych Reichsbürgerow. Tole wuchadźa z rozprawy, kotruž su dźensa w Berlinje předstajili. W njej su wšitke konkretne podhladne a dopokazane pady wot lěta 2018 znosyli. Nimale 190 padow su w institucijach zwjazkowych krajow zličili.
Přepytuja přećiwo 16lětnemu
CDU ze snadnym předskokom
Wolóženja schwalene
Jednaja wo wojakach we woclowni
Kijew (dpa/SN). Z mjezynarodnej podpěru so nawodnistwo Ukrainy dale wo to prócuje, wojakow z woblěhowaneje woclownje Azowstal w přistawnym měsće Mariupol wuchować. „Smy nowe koło jednanjow zahajili“, rjekny zastupowaca ministerska prezidentka Iryna Wereščuk wčera wječor nowinarjam. Kijew je UNO a Mjezynarodnemu komitejej čerwjeneho křiža mandat za jednanja z ruskej stronu spožčił, Turkowska je jako posrědkowar na jednanjach wobdźělena.
„Chcemy zrěčenje wo tym wotzamknyć, kak ma so ewakuowanje wotměć“, Wereščuk rjekny. To móhło so we wjacorych wotrězkach wotměć: Najprjedy pak měli chcedźa 38 ćežko zranjenych wojowarjow wuchować. Ukraina je mjez druhim zwólniwa, ruskich wójnskich jatych za zranjenych we woclowni z jatby pušćić. W hoberskim kompleksu woclownje so ukrainscy wojowarjo dale zakituja. Ruska dotal jich ewakuowanje wotpokazuje a sej žada, zo měli swoje brónje złožić a so podać.
Wysoke płaćizny ludźi poćežuja
Lipsk (dpa/SN). Po najnowšim woprašowanju sćelaka MDR so zwyšene płaćizny hižo nětko raznje na ludźi w srjedźnej Němskej wuskutkuja. Tři štwórćiny něhdźe 29 000 woprašanych ludźi w Sakskej, Saksko-Anhaltskej a Durinskej rjeknu, zo jich zwyšene płaćizny chětro poćežuja. Jeno 23 procentow ludźi měnješe, zo so přidatne wudawki na nich lědma wuskutkuja. Wjetšina woprašanych rjekny, zo tuchwilu wosebje milinu lutuja, płaćizny bóle hač dotal přirunuja, wšědne nakupowanje redukuja abo tunje wěcy kupuja. Nimo toho stej dwě třećinje swoje dowolowe plany zwyšenych płaćiznow dla změniłoj, wólnočasne aktiwity redukowałoj a awto časćišo stejo wostałoj.
W aprylu běchu so płaćizny za přetrjebarjow w Němskej po informacijach Zwjazkoweho statistiskeho zarjada wo 7,4 procenty porno lońšemu aprylej zwyšili. Připowědźeny pomocny paket zwjazkoweho knježerstwa wobhladuja ludźo skeptisce: 83 procentow njewěri, zo jim energijowa pawšala, dźěćacy bonus a dźewjeć eurow tunja jězdźenka woprawdźe pomha. Runje 21 procentow chcyli sej tunju jězdźenku kupić.
