To a tamne (02.01.24)
Přihot pizzy je w Italskej „swjata“ tradicija, na kotruž su Italčenjo jara hordźi. A tohodla je za nich jara wažne, kotre wudźěłki za pokładźenje pizzy wužiwaja. Sławny pjekar pizzy z Neapela pak je nětko z widejom w socialnych medijach wulku kedźbnosć wubudźił. Gino Sorbillo, mějićel wjacorych hosćencow w Italskej a we wukraju, chce pizzu z ananasom pokłasć a je hosćom poskićeć. W Italskej pak je pizza z ananasom „smjertny hrěch“. We wideju Sorbillo ludźi namołwja, kulinarisku chłóšćenku woptać.
Policisća su w Połčnicy pašturlicu wuchowali. Pazoraka ze zranjenym křidłom su zańdźenu sobotu na kromje města Połčnicy wuhladali, policija zdźěli. Ptačka dowjezechu zastojnicy skótnemu lěkarjej.
Serbski Sokoł z.t. so wo dalši dorost prócuje
28. decembra 1993 bu Serbski Sokoł znowa załoženy. Tuž towarstwo lětsa na swoje 30lětne wobstaće zhladuje. Alfons Wićaz je so z jeho starostu Milanom Funku rozmołwjał.
Wy hižo wjacore lěta tutu funkciju wukonjeće. Na čo so jako starosta rady dopominaće?
Merz ćahańcu njewočakuje
Berlin (dpa/SN). Předsyda CDU Friedrich Merz z toho njewuchadźa, zo so předsyda CSU Markus Söder znowa na interny bój w CDU/CSU wo kanclersku kandidaturu na wólbach zwjazkoweho sejma 2025 zwaži. „Za to so z Markusom Söderom wosobinsce přederje rozumju“, rjekny Merz powěsćerni dpa. Merz je sej toho wědomy, zo nichtó nochce, zo so podawki lěta 2021 wospjetuja. Tehdy bě so Armin Laschet po dołhej ćahańcy jako kandidat přesadźił a na wólbach zwrěšćił.
Přičiny morjenja wozjewjene
Gaza (dpa/SN). Po mylnym morjenju třoch zastajencow w Gazaskim pasmje přez israelskich wojakow před tydźenjomaj je Israel dźensa nowe dopóznaća wozjewił. Wojak, kiž bě spočatnje dweju zastajencow morił, njeje bitwišćo přewidźeć móhł. Nimo toho njejstaj dalšej wojakaj hary bliskich tankow dla přikaz słyšałoj, třěleć přestać. Wonaj staj pozdźišo třećeho zastajenca zatřěliłoj, dokelž měještaj jeho za wohroženje.
Zelenskyj za zhromadny bój
W dołhej karawanje zjednoćiło je so něhdźe 5 000 migrantow w ...
Kretschmer: Poměr Zwjazka a krajow špatny
Drježdźany (dpa/SN). Sakski ministerski prezident Michael Kretschmer (CDU) ma poćah mjez Zwjazkom a zwjazkowymi krajemi za přewšo špatne. „Poměr njebě hišće nihdy tak špatny kaž nětko. To njeje jenož mój posudk, to praja tež ministerscy prezidenća SPD“, rjekny Kretschmer powěsćerni dpa w Drježdźanach. „Předstawa, zo su tule w swobodnym staće wšitke města a wokrjesy samsneho měnjenja, my jako statne knježerstwo pak prajimy, zo tola hinak jednamy, prosće njeńdźe. W poměrje mjez Zwjazkom a krajemi pak tomu runje tak je.“ Politika knježerstwa w Berlinje potrěbnosće krajow ignoruje, Kretschmer skorži. Tohodla kroči Němska w mnohich dypkach hospodarsko-politisce do wopačneho směra. „Ampla je w mnohich nastupanjach zwrěšćiła, mjez druhim pola škita klimy. Tam njejsu ekonomiju a socialne naležnosće wobkedźbowali. Atomowe milinarnje su wotpinjene. Město toho zepěramy so zaso na brunicowe milinarnje.“ Wólby Europskeho parlamenta 2024 njesměli so z ryzy protestnymi wólbami stać. „To je moja wulka starosć.“ Hišće pak je móžno, zmylki korigować.
Staw Łobja zaso woteběra
Drježdźany/Hannover (dpa/SN). W kónčinach wulkeje wody wostanje połoženje dale wohrožowace. Němska wjedrarnja (DWD) připowědźi dalše spadki. „Hač do jutřišeho so hišće raz porjadnje podešćuje, byrnjež hižo nic w tajkich mnóstwach“, Christian Herold w Němskej wjedrarni zdźěli. Najwjace dešća wočakuja dźensa a jutře w Sewjerorynsko-Westfalskej. Na sewjeru wokoło Bremena a Hamburga wočakuja wjedrarjo mjenje spadkow hač minjene dny. Najebać to wostanje połoženje napjate.
W sakskej krajnej stolicy Drježdźanach je Łobjo pod wočakowanej měru šěsć metrow wostało. Normalnje stej dwaj metraj. Wot minjeneje nocy staw wody zaso woteběra. Krótki čas bě pegel 5,95 metrow docpěł. Přirjadnica města za wobswět Eva Jähnigen (Zeleni) dźěla, zo chcychu alarmowy schodźenk 3 w běhu dnja zaso zběhnyć. Škitne naprawy su so jako dobre wopokazali, wjetšich škodow njeje było.
Dokal ćeknyć w Gazaskim pasmje?
Gaza (dpa/SN). Wojerske postupowanje Israela přećiwo islamistiskej Hamas nuzuje tysacy palestinskich ciwilistow do ćěkańcy w dospołnje zawrjenym pasmje nad Srjedźnym morjom. Wot Israela přikazane ewakuowanje srjedźneho Gazaskeho pasma wjedźe k „nanuzowanemu wućěrjenju“ dalšich wobydlerjow, pomocny skutk UNO na dobro Palestinjanow UNRWA zdźěli. Wjace hač 150 000 ludźi – dźěći, žony z ćěšenkami, zbrašeni a starši – „sej nihdźe wućeknyć njemóže“. Mjeztym dale w Chan Junisu na juhowuchodźe wojuja. Tam chce palestinski Čerwjeny połměsačk nowe lěhwo ćěkancow natwarić.
Israel je po informacijach z Damaskusa znowa objekty w susodnej Syriskej nadběhował. Po informacijach syriskeje powěsćernje Sana su israelske wojerske lětadła „južnu kónčinu“ nadběhowali. Syriske wójsko je někotre rakety wotwobarało. Pječa su israelske rakety tež objekty njedaloko lětanišća w Damaskusu trjechili. Israel měri so tam přećiwo wot Irana podpěrowanym milicam.
To a tamne (29.12.23)
Kołp na kolijach na mosće we Wolgasće zapadnje kupy Usedom w Mecklenburgsko-Předpomorskej je železniski a nadróžny wobchad nachwilnje zlemił. Železnicar bě zwěrjo wuhladał a policiju informował. Pomoc přińdźe ze stron čakaceho šofera wosoboweho awta. „Wočiwidnje wěcywustojny muž“ zwěrjo hrabny a na druhi bok mosta donjese, hdźež jeho zaso na swobodu pušći.
Na zwěrjeći wuměnk rozžohnowali su Podstupimscy cłownicy na drogi wukubłanu psycu Fluse. Dźesać lět dołho bě mjeztym dwanaće lět stary pos aktiwnje słužbu wukonjał a při 264 zasadźenjach nimale 270 kilogramow drogow wuslědźił. Zasadźena bě Fluse předewšěm na Berlinskim lětanišću Tegel a na nowym BER. Wosebje chwalachu sej policisća jeje charakter: Dźěćom bě wona jara přichilena, skućićelam pak scyła nic.
Ciwilisća ćěkaja do chorownjow
Gaza (dpa/SN). Dźesaćitysacy ciwilistow w Gazaskim pasmje su sej po informacijach swětoweje strowotniskeje organizacije WHO před wójnu do chorownjow wućeknyli. W chorowni Shifa a měsće Gazy je so mjeztym 50 000 ludźi zhromadźiło, w spitalu Al-Amal na juhu pasma 14 000, WHO zdźěla. Njewotwisne pruwowanje ličbow njeje móžne. Sobudźěłaćerjo WHO ćeknjenych po swojich móžnosćach ze žiwidłami a lěkami zastaruja.
Erdoğan atakuje Netanjahuwa
Ankara (dpa/SN). Turkowski prezident Recep Tayyip Erdoğan je israelskeho ministerskeho prezidenta Benjamina Netanjahuwa toho postupowanja w Gazaskim pasmje dla raznje kritizował a z Adolfom Hitlerom přirunował. „Što Hitlera a Netajanhuwa hišće rozeznawa“, prašeše so Erdogan w Ankarje. Netanjahu reagowaše hněwny a Erdoğanej wumjetowaše, zo wot němskich nacionalsocialistow morjenych Židow hani.
Lauterbach stawki njezrozumi
