Poznań (RD/SN). W małkej wsy Powidz pola Poznanja „nastanje prěnje stajne wojerske zepěranišćo Američanow w Pól­skej“. Tole wozjewi tele dny medijowy portal polskatimes.pl, poćahujo so jako žórło na „wosobu z pólskeho knježerstwa“. Tuta je pječa zdźěliła, zo chcedźa rozsud na přichodnym wjeršku NATO, kiž wotměje so 29. a 30. junija w španiskej stolicy Madridźe, oficialne wozjewić. W Powidzu je mjez druhim wojerske lětanišćo, kotrež ma najwjetšu čaru za wotlět a přizemjenje lětadłow wšeje Pólskeje. Dlěje hač tři kilometry dołha a 60 metrow šěroka pista hodźi so samo za najwjetše transportne lětadła USA typa „Hercules“. Hižo do wójny w Ukrainje su Američenjo lětanišćo za transporty wužiwali. Byrnjež hišće njewědźa, kelko wojakow chcedźa USA w Powidzu zaměstnić, by rozsud zasadnje wažny był. Dotal płaći dojednanje z Ruskej z lěta 1997, po kotrymž nimaja USA žane zepěranišća we wuchodnych čłonskich krajach NATO. Po nadpadźe Ruskeje na Ukrainu Pólska na stajnym zepěranišću USA wobstawa.

Rada fachowcow poruća so na móžne poćeženje strowotnistwa hotować

Berlin (dpa/SN). W boju přećiwo koronapandemiji trjeba Němska z wida zwjazkoweje lěkarskeje komory nuznje lěpši datowy zakład. „Smy minjenej lěće nastupajo daty runjewon slepy lět dožiwili, kiž njebě žadyn dobry zakład racionalnych rozsudow“, rjekny prezident komory Klaus Reinhardt dźensa nowinarjam. Jenož hdyž wobsteji jasnosć wo woprawdźitym infekciskim połoženju, je móžno wućeženje łožow w chorownjach a na intensiwnych stacijach realistisce posudźować. Zwjazkowe knježerstwo dyrbjało tuž skónčnje radźe fachowcow wotpowědować a systematisce daty wo dynamice infekcije, wo ćežkosći chorosće a wo poćežowanju strowotniskeho systema zběrać a wuhódnoćić.

Podobnje kaž Reinhardt wupraji so tež šef předsydstwa towaršnosće chorownjow Němskeje Gerald Gaß. Wón politiku namołwješe, prašenje rozrisać „štó kóšty za nuznje trěbne inwesticije na digitalnym polu“ přewozmje.

„Pomhajće! Smy nadpadnjeni“ – z tutym tekstom na displayju je bus po badiskim Endingenje po puću był. Wjacori šoferojo policiju wo tym informowachu. Po tym zo běchu zastojnicy bus zadźerželi, zwěsćichu, zo je šofer busa powěsć mylnje aktiwizował. Po informacijach policije ma najwjace busow za nuzowy pad knefl, kotryž ćichi alarm zawinuje.

Powostanki hoberskeho dinosawriera su slědźerjo na britiskej kupje Isle of Wight namakali. Je to jedyn z najwjetšich hdy w Europje namakanych rubježnych dinosawrierow scyła. Wón bě dlěši hač dźesać metrow. Namakane fosilije – kosće pónoje a rjapa – pochadźeja wot dwunohateho dinosawriera z hłowu krokodila. Namakanka podpěruje hypotezu, zo pochadźa „Spinosawrus“ ze zapadneje Europy. Z pomocu wědomostnych metodow chcedźa nětko starobu zwěrjeća zwěsćić.

Łužiski cyrkwinski dźeń wot 24. do 26. junija w Zhorjelcu Serbow kruće zapřija. Serbski centrum namakaš direktnje na Delnim torhošću. Chór Łužyca z Choćebuza a Serbski superintendent Christoph Rummel z Hodźija zahajensku božu słužbu na Hornim torhošću sobu wuhotujetaj.

Zhorjelc (AK/SN). Tele aspekty stej Theresa Rinecker, generalna superintendentka w Zhorjelskej wulkowosadźe Ewangelskeje cyrkwje Berlin-Braniborska-šleska Hornja Łužica (EKBO), a Antje Pech, superintendentka w cyrkwinskim wobwodźe Lubij-Žitawa Ewangelsko-lutherskeje krajneje cyrkwje Sakskeje, wčera při prezentaciji programa podšmórnyłoj.