Ministerka: Wohidny njeskutk
Zasudźa nadpady na šćěpjenski centrum – policija pyta za swědkami
Drježdźany (dpa/SN). Sakska socialna ministerka Petra Köpping (SPD) zasudźa nadpad na šćěpjenski centrum we vogtlandskim Treuenje jako wohidny njeskutk. „Sym jara wolóžena, zo njejsu sobudźěłaćerki a sobudźěłaćerjo škodu poćerpjeli. Woni so wšědnje zasadźeja, zo bychu ludźi před ćežkej chorosću škitali“, rjekny Köpping powěsćerni dpa. Wysoka kwota šćěpjenych we Vogtlandskim wokrjesu dopokazuje, zo sej ludźo jich dźěło jara waža. „Štóž tež přeco je nadpad skućił, ma so chłostać. Nadpad je nowy schodźenk eskalacije, po tym zo dyrbjachmy wospjet werbalne nadpady na mobilne šćěpjenske mustwa zwěsćić.“ Je wosobinska naležnosć, so šćěpić dać abo nic. „Ale druhich ludźi a twarjenja nadpadować, zo bychu šćěpjensku kampanju mylili, je po mojim měnjenju kriminelny njeskutk, kiž ma so wótrje chłostać“, ministerka wuzběhny.
To a tamne (16.09.21)
Zynčacy nachribjetnik je so na Nürnbergskim hłownym dwórnišću wo wulkozasadźenje policije postarał. Něhdźe 50 zastojnikow, mjez nimi fachowcy za znješkódnjenje bombow, přijědźe. Potencielne wohroženje pak wukopa so na zbožo jenož jako elektriski truhanski aparat. 85lětny bě nachribjetnik mjez čakacymi pod stólcami wotstajił a so hakle po dobrej hodźinje zaso wróćił. Policija nětko pruwuje, štó ma kóšty zasadźenja zarunać.
Cigarety dla je nan w mecklenburgskim Bad Kleinenje swojej dźěsći samej z ćahom jěć dał. Krótko do wotjězda ćaha bě wón na nastupnišćo šoł, zo by cigaretu kurił. Dźewjeć měsacow stara dźowka we wozyčku a dwulětny synk wostaštaj w ćahu. Naraz so durje začinichu a ćah wotjědźe bjez nana. Zwjazkowa policija so wo dźěsći staraše. Chětro wustróžany je nan z přichodnym ćahom za nimaj přijěł.
Bamž na putniskim městnje
Šaštín (dpa/SN). Bamž Franciskus je dźensa posledni dźeń swojeho wopyta Słowakskeje wuznamne putniske městno Šaštín na zapadźe kraja wopytał a tam składnostnje swjedźenja Sydom bolosćow Marije z dźesaćitysacami putnikow Božu mšu swjećił. Šaštín z nimale 5 000 wobydlerjemi je najwažniša putniska městnosć Słowakskeje a nima jenož wulki wuznam za romsko-katolsku, ale tež za grjeksko-katolsku wuchodnu cyrkej. Popołdnju chcyše so swjaty wótc zaso do Roma wróćić.
Awto dale najwažniši srědk
Wiesbaden (dpa/SN). Awto wostanje powołanskim dojězdźowarjam dale najwažniši wobchadny srědk. Dwě třećinje (68 procentow) ludźi jězdźitej po swójskich informacijach z awtom na dźěło, tež krótše čary. Runje 13 procentow wužiwa po informacijach Zwjazkoweho statistiskeho zarjada prawidłownje zjawne wobchadne srědki, kaž bus, nadróžnu, ćah abo podzemsku za puć na dźěło. Kóždy dźesaty dźěławy jězdźi prawidłownje z kolesom na dźěło.
Šćěpjenje wotnětka trěbne
Z dalšej spektakularnej a kedźbnosć zbudźacej akciju su čłonojo ...
Město so wobara
Kritizuja plany krajow mzdy dla
Berlin (dpa/SN). Posłužbowe dźěłarnistwo ver.di je plany wjacorych zwjazkowych krajow kritizowało, přistajenym žanu mzdu njepłaćić, hdyž dyrbja jako nješćěpjeni do karanteny. Z wida dźěłarnistwa je wopak, spytać „winowatosć šćěpjenja přez posleńcu“ přesadźić, rjekny předsyda dźěłarnistwa Frank Werneke nowinarjam.
W někotrych zwjazkowych krajach njesměli nješćěpjeni hižo bórze žane prawo wjace měć, w padźe karanteny dale mzdu dóstać. Wo cyłoněmskim rjadowanju chcedźa strowotniscy ministrojo Zwjazka a krajow přichodny tydźeń srjedu wuradźować. Zwjazkowy infekciski zakoń tajke rjadowanje předwidźi, hdyž hodźało so karantenje přez škitne šćěpjenje zadźěwać.
Frakcija AfD w Sakskim krajnym sejmje chce rjadowanje „3G“ (šćěpjeny, wustrowjeny abo testowany) juristisce přepruwować dać. Z wotpowědnej próstwu chcedźa jeho hnydomne zběhnjenje docpěć, zo bychu „diskriminaciju nješćěpjenych skónčili“.
To a tamne (15.09.21)
Z blachowej tyzu bědźacy so jěž je w schleswigsko-holsteinskim Neumünsteru zasadźenje policije zawinił. Wobydlerka bě spodźiwne zwuki na ležownosći susoda słyšała a na zadobywarja tukała. Policija přijědźe z třomi awtami. Zastojnicy prózdnje stejacy dom wobstupichu, přepytachu jón, ale njejsu ničo namakali. Naraz pak woni tohorunja podhladne zwuki słyšachu a wuhladachu „z blachowej tyzu wojowaceho“ jěža.
Zwěrjeći wopyt w Lipšćanskej radnicy: Sobudźěłaćerka socialneho zarjada so njemało wustróži, jako z woknom hladajo šupa (Waschbär) wuhlada, kiž do běrowa hladaše. Městu bě to přičina, přez radnicowy intranet sobudźěłaćerjow pokiwy za wobchad z dźiwimi zwěrjatami dawać: „Na kóždy pad wotstawk dźeržeć a na žadyn pad je njepicować.“ Z fotami šupa su tele warnowanje rozšěrjeli.
Lindner ofensiwnje wabił
Berlin (dpa/SN). Předsyda FDP Christian Lindner je hladajo na woteběracu ličbu přiwisnikow CDU ofensiwnje wo jich hłosy k wólbam zwjazkoweho sejma wabił. We wčera předstajenym hnydomnym programje kanclerskeho kandidata Armina Lascheta (CDU) je wjele sympatiskeho a „nam znateho“, Lindner rjekny, měnjo, zo je program njedospołna kopija strony FDP. „Da móžeće tež original wolić.“ Armin Laschet chce wčera předstajene naprawy hnydom po dobyću wólbow zwoprawdźić.
Branša nowe postajenja wita
Wildau (dpa/SN). Braniborska kulturna branša ma planowane 2G-prawidła krajneho knježerstwa za zmysłapołne. Wone zmóžnjeja wjace swobody pře koronu šćěpjenym a wustrowjenym. Tak móža zarjadowarjo wěsćišo postupować. Braniborski kabinet rozjimuje dźensa nowy naćisk korona-postajenjow. Wjele wobmjezowanjow njeměło potom hižo płaćić. Koaliciske frakcije SPD, CDU a Zeleni su hižo tydźenja za tajki model wabili.
Tež pře gripu so šćěpić dać
