To a tamne (08.12.21)
Bjez wuspěcha wostał je wčerawši pospyt, najstaršu listowu znamku swěta wotbyć. Dokelž poskićowachu za „Penny Black“ w přesadźowanskim domje Sotheby’s runje 3,8 milionow britiskich puntow (4,47 milionow eurow) a tak wo wjele mjenje, hač bě sej awkciski dom předewzał, njejsu artefakt na kóncu předali. Sotheby’s bě hač do šěsć milionow puntow wunoška wočakował.
Wusłužene wobchadne ample móžeš sej w Ingolstadće darmotnje wotewzać. Město tuchwilu wšo na nowu techniku LED přestaja a tak dotrjebane signalowe připrawy hižo njetrjeba. Cyłkownje 20 amplow chcedźa zajimcam darić, kotřiž tajku techniku zběraja, abo snano jako originalny hodowny dar trjebaja, kaž z Ingolstadtskeho zarjadnistwa rěka. Zajimcy móža so z mejlku přizjewić a sej ample potom w twarskim zawodźe města wotewzać.
Rěča wo šćěpjenju personala
Berlin (dpa/SN). Zwjazkowy sejm je dźensa prěni króć wo tym wuradźował, hač měli winowatostne šćěpjenje pře koronawirus za personal chorownjow a hladarnjow postajić. Plany noweje amploweje koalicije nimo toho předwidźa, ludźi přichodnje tež w zubnolěkarskich praksach a w apotekach šćěpić dać. Krajam chcedźa zmóžnić, we wosebje potrjechenych kónčinach na přikład hosćency zawrěć. Za to pak dyrbja zakoń wo škiće před infekcijemi změnić.
China bojkot USA kritizuje
Peking (dpa/SN). China diplomatiski bojkot klětušich Olympiskich zymskich hrow ze stron USA raznje kritizuje. Washington měł přestać sport politizować, zwurazni rěčnik wonkowneho ministerstwa w Pekingu. Olympija njeje jewišćo za „politiske manipulacije“. Rěčnica Běłeho domu Jen Psaki bě wčera připowědźiła, zo knježerstwo prezidenta Joewa Bidena žanych diplomatiskich abo oficialnych zastupnikow w februaru do Pekinga njepósćele. Přičina je trajace ranjenje čłowjeskich prawow přez Peking.
Francoska zawěra diskoteki
Policija je – hinak hač minjene tydźenje – wčera we wjacorych ...
Kritizuje słabe zastupnistwo
Erfurt/Mnichow (dpa/SN). Po zestajenju noweho zwjazkoweho knježerstwa durinska wobswětowa ministerka Anja Siegesmund (Zeleni) wobžaruje, zo stej jeničce dwě ministerskej zastojnstwje z rodźenymi wuchodnymi Němcami wobsadźenej. „To mam za přemało“, rjekny wona powěsćerni dpa. Ćim wažnišo nětko budźe, zo nowe knježerstwo wšitke z wuchodoněmskeho wida wosebje wažne dypki koaliciskeho zrěčenja spěšnje zwoprawdźi. Z wuchodneje Němskeje matej dwě žonje do kabineta zaćahnyć. W Dessauwje rodźena politikarka Zelenych Steffi Lemke přewozmje wobswětowy ressort, braniborska politikarka SPD Klara Geywitz ma so z ministerku za twarstwo stać.
Generalny sekretar CSU Markus Blume kritizuje, zo njeje w nowym mustwje ministrow SPD, Zelenych a FDP nichtó z Bayerskeje, byrnjež Bayerojo 16 procentow wobydlerjow Němskeje wučinjeli.
Ampla wobzamknjena
Putin za mjezsobne garantije
Moskwa (dpa/SN). Ruski prezident Wladimir Putin chce na dźensnišim widejowym wjeršku ze swojim kolegu w USA Joewom Bidenom wo mjezsobnych wěstotnych garantijach rěčeć. Dźe wo wěstotu Ruskeje a čłonskich krajow NATO, zdźěli rěčnik Krjemla Dmitrij Pjeskow wčera powěsćerni Interfax. Putin bě NATO před dnjemi namołwjał, rozšěrjenje do směra na wuchod skónčić a to pisomnje wobkrućić. Za to by Ruska zwólniwa była zapadnemu wojerskemu zwjazkej wěstotne garantije dać.
Ruska jako atomowa móc wobhladuje rozšěrjenje NATO jako wohroženje a chce tomu zadźěwać, zo stanjetej so susodnej bywšej sowjetskej republice Ukraina a Georgiska z čłonom wojerskeho zwjazka. „Wěstotne garantije njemóža jednostronske być“, Pjeskow rjekny.
USA Ruskej wumjetuja, zo swoje jednotki njedaloko ukrainskeje mjezy koncentruje a nadpad na Ukrainu přihotuje. Na tamnym boku Moskwa Kijew před nadpadom na wuchodne dźěle Ukrainy warnuje. To by k wójnje wjedło.
Naležnje wo pandemiji rěčeli
Wurjadne posedźenje Sakskeho krajneho sejma epidemiskeho połoženja dla
Drježdźany (dpa/SN). Sakski krajny sejm je wčera epidemiske połoženje w swobodnym staće zwěsćił a tak prawniski zakład swójskich škitnych naprawow w koronapandemiji wutworił, wědźo, zo trjeba sobudźěło Zwjazka. Ministerski prezident Michael Kretschmer (CDU) chcył w tym zwisku tež nowy zakoń wo škiće před infekcijemi wočaknyć, na kotrymž nowa koalicija w Berlinje z wotmachom dźěła. Na žadanje opoziciskeje AfD dyrbjachu zapósłancy wosobinsce wothłosować. Hač na jeje zapósłancy hłosowachu wšitcy z „haj“.
Policija bě wurjadne posedźenje krajneho sejma ze stami policistow zawěsćiła a hermetisce zaraćiła. Přičina toho běchu namołwy w socialnych syćach, tež ekstremistiskich, před parlamentom protestować. Hač do kónca posedźenja pak wosta wšitko měrne.
To a tamne (07.12.21)
W kostimach rumpodicha běchu wčera w Porynsko-Pfalcy zaso motorscy po puću, zo bychu pjenjezy za dom ćežko chorych dźěći zběrali. Mužojo a žony jědźechu 125 kilometrow po južnej Pfalcy hač do Speyera a rozdźělachu wjace hač 2 000 darow w šulach a pěstowarnjach, zo bychu na darjensku akciju skedźbnili. Loni su z njej 78 000 eurow nazběrali.
Drje najstaršu listowu znamku swěta chcychu dźensa w Londonskim awkciskim domje Sotheby’s přesadźować. Za „Penny Black“ z lěta 1840 lubja sej tam hač do šěsć milionow britiskich puntow (sydom milionow eurow). Znamka je „najwuznamniši objekt filatelistiskich stawiznow“, kaž rěka. Wobsedźer znamki, britiski předewzaćel, bě ju před dźesać lětami za mjenje hač 60 000 eurow kupił.
Zbrašenych njediskriminować
Vatikan (B/SN). Do swětoweho dnja zbrašenych 3. decembra je so bamž Franciskus w zjawnym lisće raznje přećiwo wuzamknjenju zbrašenych wuprajił. Tež cyrkej nima prawo, jich wot sakramentow wuzamknyć. Swjate pismo to wobkruća: „Swójska kiprosć njeje žadyn zadźěwk, z ewangelijom žiwy być a jón dale posrědkować.“ Kóždy křćeny čłowjek móže bjez wumjezowanja a diskriminacije rjec: „Ja sym cyrkej!“ To praji Awi Mello z vatikanskeho zarjada za lajkow, swójbu a žiwjenje. Mjezynarodny dźeń ludźi ze zbrašenjemi su Zjednoćene narody jako wopominanski a akciski dźeń wuzwolili, zo bychu so za dostojnosć, prawa a derjeměće zbrašenych zasadźeli.
Bamž namołwja k stražliwosći
Zasudźeja smólnicowy ćah
Berlin/Drježdźany (dpa/SN). Wodźacy politikarjo su sakskej ministerce za strowotnistwo Petrje Köpping (SPD) swoju solidaritu wobkrućili a smólnicowy ćah něhdźe 30 ludźi před jeje domom minjeny pjatk w Grimmje zasudźili. Akciju wótrje kritizowali su mjez druhim předsyda SPD Norbert Walter-Borjans, zwjazkowy nutřkowny minister Horst Seehofer (CSU) a sakski ministerski prezident Michael Kretschmer (CDU). Seehofer rěčeše wo „organizowanym zatrašenju“.
Hotuja so na demonstraciju
Drježdźany (dpa/SN). Sakski krajny sejm chcyše dźensa popołdnju wo móžnym podlěšenju epidemiskeho połoženja w swobodnym staće rozsudźić. Hłowna přičina je dramatiske połoženje koronapandemije dla. Minjeny pjatk bě Roberta Kochowy institut za Saksku sydomdnjowsku incidencu 1 224 na 100 000 wobydlerjow zwěsćił. Policija hotowaše so z wodomjetakami na wulku demonstraciju přećiwnikow naprawow koronawirusa dla před krajnym sejmom.
Wjace bróni předawali
