Z NATO so dojednać?
Porjedźenka
K wčerawšej powěsći „Rub ze serbskim napisom přepodał“ ma Hartmut S. Leipner z Choćebuza tule porjedźenku:
Parament z napismom w slepjanšćinje „Bóh žohnuj a zwarnuj tebje na wšitkich twojich pućach“ nima ničo činić z Choćebuskim Serbskim muzejom. Je to dar Spěchowanskeho towarstwa za serbsku rěč w cyrkwi z. t. Slepjanskej wosadźe. Wobzamknyło bě to delnjoserbske cyrkwinske towarstwo na swojej wólbnej zhromadźiznje, kotraž wotmě so do prěnjeho adwenta.
Čěska přepołoži pacientow
Ústí nad Labem (dpa/SN). W čěskej pomjeznej kónčinje wokoło Ústíja nad Labem su chorownje štwórteje žołmy koronawirusa dla na hranicy swojich móžnosćow. Třoch intensiwnych pacientow dyrbja z chorobnym awtom a helikopterom z přećeženych chorownjow w Ústíju a Teplicach do Prahi a Plzenja přepołožić, kaž narodny koordinaciski centrum za rozdźělowanje pacientow zdźěla. Přichodne dny chcedźa přidatne kapacity na stacijach koronapacientow wutworić. Ústí nad Labem leži něhdźe połsta kilometrow južnje Drježdźan.
W Čěskej su w běhu sydom dnjow 1 193 infekcijow z koronawirusom mjez 100 000 wobydlerjemi zwěsćili, kaž z najnowšich ličbow strowotniskeho ministerstwa w Praze wuchadźa. Najbóle potrjechene su wuchodne dźěle kraja. Nimale 6,4 miliony z cyłkownje 10,7 milionow wobydlerjow Čěskeje su mjeztym dospołnje pře koronu šćěpjene.
Strowotniski system čłonskeho kraja EU ćerpi hižo přez lěta pobrachowaceho personala dla, dokelž derje kwalifikowani lěkarjo a hladarjo niskich mzdow dla do zapadnych krajow wotchadźeja.
To a tamne (02.12.21)
Z motiwom Lipšćanskich adwentnych wikow wabja w podzemskej železnicy francoskeje stolicy Parisa za wopyt sakskeho wulkoměsta. Wiki pak dyrbjachu koronakrizy dla krótkodobnje wotprajić. Plakaty w Pariskej metro su dźěl kampanje, z kotrejž wabi Francoska za Lipsk a za nowy direktny lětanski zwisk do wulkoměsta, kotryž wot 2. nowembra wobsteji. Jako běchu akciju nazymu planowali, njebě hišće wotwidźomne, zo hodowne wiki tež lětsa zaso wupadnu. Motiw wikow bě zamołwitym kampanje najatraktiwniši.
Dwanaće tydźenjow do jastwa dyrbi muž w jendźelskim Norwichu, po tym zo bě zachod šćěpjenskeho centruma zalěpił. 53lětny bě w nocy klučikowu dźěrku ze spěšnolěpkom zatykał. Wjace hač 500 ludźi z wjetšim rizikom schorjenja njemóžeše tuž kaž planowane třeću sykawu přećiwo koronawirusej dóstać. Wuslědźili su skućićela z pomocu awtomatiskeje kamery. Sudnik spěšnje reagowaše a muža bjez wahanja zasudźi.
Afghanistan w srjedźišću
Riga (dpa/SN). Posledni dźeń swojeho dwaj dnjej trajaceho zeńdźenja w letiskej stolicy Rize su so wonkowni ministrojo 30 čłonskich statow NATO dźensa z katastrofalnym skónčenjom wojerskeho zasadźenja w Afghanistanje zaběrali. Tam běchu militantno-islamistiscy talibanojo po nimale 20 lětach zapadneje wojerskeje prezency srjedź awgusta w běhu někotrych dnjow móc wróćo zdobyli. A tak dóńdźe ke chaotiskim scenam.
Wopory amoka wopominali
Trier (dpa/SN). Lěto po amokowej jězbje w Trieru su tam dźensa wopory njeskutka wopominali. W srjedźišću steješe ekumeniska Boža słužba w Trierskej katedrali, na kotrejž wobdźělichu so wopory, přiwuzni a wuchowanske mocy. Při amoku 1. decembra 2020 bě pjeć ludźi žiwjenje přisadźiło. Dźesatki ludźi so zranichu, něhdźe 300 je trawmatizowanych. Skućićel bě ze swojim awtom w pasmje pěškow wotpohladnje do ludźi jěł.
Sobušulerjow morił
Tale žona dósta na šćěpjenskej staciji nakupowanskeho centruma w ...
Test funguje
Trjebaja wjace personala
Kretschmer: Wšitke srědki wužiwać
Drježdźany (dpa/SN). Zwjazkowe kraje měli po słowach sakskeho ministerskeho prezidenta Michaela Kretschmera (CDU) wšitke srědki do rukow dóstać, zo móhli koronakrizu přewinyć. Po wčerawšej rozmołwje ministerskich prezidentow zwjazkowych krajow z amtěrowacej zwjazkowej kanclerku Angelu Merkel (CDU) Kretschmer měnješe, zo su zamołwići nětko po dobrym puću.
„Smy sej přezjedni, zo tuchwilne wuwiće wulke strachi w sebi chowa a zo trjebamy aktiwne postupowanje, dokelž ličby wšudźe přiběraja, nic jenož w Sakskej“, wón rjekny. Sakska je dale kraj z najwyšej sydomdnjowskej incidencu. Po informacijach Roberta Kochoweho instituta wučinješe wona dźensa rano 1 209,4. Cyłoněmski přerězk je 442,9.
Ministerscy prezidenća chcedźa so jutře hišće raz zetkać a rozsudźić. Při tym póńdźe tež wo powšitkownu winowatosć šćěpjenja pře koronu. Wjacori ministerscy prezidenća běchu so hižo minjene dny za to wuprajili. Tež silwester a wohnjostroj budźetej tema.
