Lockdown za nješćěpjenych
Wien (dpa/SN). Přećiwo dalšemu wupřestrěću koronawirusa w Awstriskej je tamniše knježerstwo lockdown za nješćěpjenych wobzamknyło. Štóž njeje šćěpjeny abo w minjenych 180 dnjach wot korony wustrowjeny, smě jenož hišće w nuznych padach bydlenje wopušćić. K tomu słušeja nakupowanje tworow wšědneje potrjeby, lěkarske wopyty abo trěbne wuchodźowanje. Postajenja płaća najprjedy raz dźesać dnjow. Policija chce předpisy prawidłownje pruwować.
Jednanja dale du
Berlin (dpa/SN). Hladajo na koaliciske jednanja k wutworjenju noweho zwjazkoweho knježerstwa su nawodnistwa SPD, Zelenych a FDP dalše koło zahajili. Po tym zo je 22 dźěłowych skupin wuslědki swojich temowych wobłukow minjenu srjedu předpołožiło, nawodnistwa stron dźensa dale wuradźuja. Detaile k jednanjam žane znate njejsu. Zeleni pak kritizuja njedosahace postupy hladajo na klimowu tematiku. Hišće w nowembrje chcedźa mjenowane tři strony koaliciske zrěčenje wobzamknyć.
Tež mjeńše dźěći šćěpić
Wobzamknjenje je postup
Glasgow/Drježdźany (dpa/SN). Sakski wobswětowy minister Wolfram Günther (Zeleni) wopisuje wobzamknjenje swětoweje klimoweje konferency hladajo na wudobywanje brunicy jako nowe wuwiće. „Po 26 klimowych konferencach je tole rozsudne a konkretne postupowanje“, wón wčera podšmórny.
Přiwšěm su hišće mnohe dalše napinanja trěbne, zo móhli sćoplenju zemje wo wjac hač 1,5 stopnjow celsija zadźěwać. Při tym měli ći spěšnišo postupować, kotřiž to zamóža. „Němska to móže. Nowe zwjazkowe knježerstwo ma zamołwitosć, zo so Němska hladajo na škit klimy přikładnje wuwije.“ Wolfram Günther tuž wot noweho knježerstwa hnydomny program wočakuje, kotryž škit klimy we wšěch wobłukach zmóžnja.
Klimowa konferenca je kraje po cyłym swěće k tomu namołwjała, wudobywanje brunicy zakónčić. Formulacija pak bu ćišća Chiny a Indiskeje dla w poslednjej mjeńšinje wosłabjena. Tež hladajo na financnu podpěru chudšim krajam njebuchu wočakowanja spjelnjene.
Sankcije móžne
To a tamne (15.11.21)
Z awtom staršeju je sej 13lětny w pfalcskim Lingenfeldźe wulećał. Zhromadnje z přećelemi chcyše hólc minjeny pjatk wječor na narodninski swjedźeń jěć. Žona jeho wobkedźbowaše a zawoła policiju. Dokelž je šofer awta hišće přemłody, jemu žane chłostanje njehrozy. Policija pak jeho a staršeju na rozmołwu přeprosy.
Chwalaca mašina w šwicarskim Mettauertalu stara so wo dobre začuća. W městačku blisko mjezy k Němskej su telefonowu celu přetwarili, zo by wšěm, kiž sej to zasłužeja, digitalnje na ramjo klepała. Mašina předhrawa wideja, kotrež zasłužbnym ludźom chwalbu a připóznaće zwuraznjeja. Štóž swoju mejlowu adresu zawostaji, dóstanje nimo toho dobropis, na přikład za lokalnu pjekarnju.
Röttgen kandiduje
Berlin (dpa/SN). Wonkowny politikar Norbert Röttgen chce so z nowym předsydu CDU stać. 56lětny zapósłanc zwjazkoweho sejma připowědźi dźensa w Berlinje, zo kandiduje za naslědnistwo Armina Lascheta. W požadanskej fazy, kotraž traje hač do 17. nowembra, je Röttgen dotal jenički kandidat. Liča pak z tym, zo so tež šef kanclerskeho zarjada Helge Braun und bywši předsyda frakcije Friedrich Merz za městno předsydy zwjazkoweje CDU přizjewitaj.
Knježerstwo bórze steji
Berlin (dpa/SN). Generalny sekretar SPD Lars Klingbeil je přeswědčeny, zo móže nowe amplowe knježerstwo spočatk decembra dźěłać započeć. Po jeho słowach drje koaliciske zrěčenje hač do 4. decembra wobzamknu. Olafa Scholza chcedźa w tydźenju po swj. Mikławšu za noweho kanclera wolić. Tež předsyda FDP Christian Lindner je časowy plan nastupajo optimistiski. Zastupjerjo Zelenych su zdźěla hišće skeptiscy.
De Klerk njeboh
Danska kralowna Margretha II. (nalěwo) a jeje mandźelski princ ...
Za jasne prawidła
Nuzowa situacija
Podstupim (dpa/SN). Po Sakskej nětko těz Braniborska wobmjezowanja korony nastupajo přiwótřa. Wot póndźele płaći tam w hosćencach, hotelach, kinach, diskotekach a dźiwadłach prawidło 2G. To je braniborski kabinet wčera na wurjadnym posedźenju rozsudźił.
W zakładnych šulach zawjedu póndźelu zaso winowatosć, škitny nahubnik wužiwać. Wukaz płaći po wozjewjenju knježerstwa najprjedy hač do 5. decembra. Ministerski prezident Dietmar Woidke (SPD) ma rjadowanje za nuznje trěbne a rěčeše wo „woprawdźitej nuzowej situaciji“.
W Braniborskej registruja telko nowych infekcijow kaž za čas cyłeje pandemije nic. Po informacijach Roberta Kochoweho instituta wučinja incidenca w kraju 323,8, najwyša je wona we wokrjesu Łobjo-Halštrow ze 790,4.
Lukašenko Europje hrozy
Minsk (dpa/SN). W rozkorje z EU je běłoruski mócnar Aleksander Lukašenko wčera hrozył, zo Europje płun zawjertnje, dyrbjała-li EU jeho krajej nowe sankcije napołožić. Přez Běłorusku wjedźe dźěl najwažnišeho rusko-europskeho płunowoda Jamal-Europa. Hłowne mnóstwo płuna pak ćeče z Ruskeje do Europy přez Ukrainu a přez płunowód Nord Stream 1 přez Baltiske morjo.
Aleksander Lukašenko Pólsku před tym warnuje mjezu zawrěć. Zdobom wón susodnemu krajej wumjetuje, zo „konflikt militarizuje“. Pólska je na hranicu k Běłoruskej tysacy wojakow dowjezć dała, zo bychu přełamej mjezy zadźěwali. Napjatosćow dla ruske bombowcy hranicu kontroluja. „Haj, te zamóža tež nuklearne brónje transportować“, rjekny Lukašenko.
To a tamne (12.11.21)
Debjenki z wobsydstwa ruskeje carskeje swójby su w šwicarskim Genfje přesadźowali. Ze safirami a diamantami wobsadźenu brošu a nawušnicy bě britiski diplomat za čas Oktoberskeje rewolucije 1917 z Ruskeje pašował. Debjenki je sej nětko anonymny kupc, kiž bě na awkciji telefonisce wobdźěleny, za 765 000 eurow zawěsćił. Drohoćinka słušeše něhdy ćeće carja Mikławša II., wulkowójwodce Mariji Pawlownej.
Po njewšědnym wuměranju ptakow w tropiskej hali „Gondwanaland“ Lipšćanskeho zwěrjenca je wona najprjedy jónu zaso wotewrjena. W běhu krótkeho časa běchu tam dwanaće štrusowych pocpulow a dwaj pawowej bažantaj zahinyli. Tak su halu na tři dny zawrěli. Mjeztym pak je wujasnjene, zo njejsu ptaki ani na ptaču gripu ani na t. mj. Newcastle-chorosć zahinyli.
