Praha (dpa/SN). W Čěskej je ličba pozitiwnje na koronawirus testowanych pacientow w chorownjach prěni króć po meji zaso mjezu tysac překročiła. Wot cyłkownje 1 055 pacientow běchu 156 w chutnym stawje abo trjebachu zasta­ranje z kislikom, kaž z ličbow strowotniskeho ministerstwa w Praze wuchadźa. Samsny čas před lětom bě jich pjeć króć telko było. Po wšěm kraju maja hišće dosć kapacitow za normalne kaž tež za ło­ža na intensiwnych stacijach. Čěski strowotniski minister Adam Vojtěch warnuje mjeztym před „pandemiju nješćěpjenych“. Štóž chcył so hišće šćěpić dać, njech dlěje nječaka a to radšo dźensa hač jutře čini, wón rjekny. Zajim za šćěpjenje bě minjene dny raznje přiběrał, dokelž dyrbja ludźo wot 1. nowembra koronatesty zapłaćić. Jeno póndźelu běchu 29 072 sykawow přetrjebali, dwójce telko kaž w cyłym poslednim tydźenju. Po aktual­nych ličbach su w Čěskej w běhu sydom dnjow 217 nowych infekcijow na 100 000 wobydlerjow zličili. Najbóle po­trjechena bě morawsko-šleska kónčina na mjezy Pólskeje. Najmjenje nowych infekcijow maja na zapadnej kónčinje kraja.

Tajku šlagrowu prominencu z časa NDR w Choćebuzu hišće dožiwili njejsu: W měšćanskim dźělu Gołynk (Gallinchen) na južnej kromje města su minjenu sobotu dróhu po znatym spěwarju Achimje Mentzelu swjatočnje pomjenowali, kiž bě 2016 njewočakowano zemrěł. Přichwatali běchu bywši kolegojo z hudźbneje branše kaž Gerd Christian (zady srjedźa), Ingrid Rakec, Hans-Jürgen Beyer (3. a 4. wotlěwa), Hartmut Schulze-Gerlach (zady horjeka), Giso Weißbach (horjeka nalěwo) a Ange­lika Mann (2. wotprawa). Wudowa Brigitte Mentzel (2. wotlěwa) smědźeše taflu za spě­warja wotkryć, z kotrymž bě wona 36 lět zmandźelena. Foto: Michael Helbig

Waršawa (dpa/SN). W Pólskej płaći wotnětka nowy zakoń nastupajo wobchadźenja z wukrajnikami, z kotrymž móža migrantow spěšnišo zaso wupokazać. Pozadk je přiběraca ličba ilegalnych zapućo­wanjow z Běłoruskeje. Po wčera w hamtskim łopjenu wozjewjenej zakonskej změnje móže komander wotpowědneho pomjezneho wotrězka hnydom po protokolowanju njedowoleneho překročenja mjezy potrjecheneho wukrajnika z kraja wupokazać. Runje tak móže wón jemu zakazać, přichodne šěsć měsacow do Pólskeje a do Schengenskeho ruma přijěć. Wuwzaća płaća jenož, móže-li wukraj­nik dopokazać, zo přińdźe z kraja, w kotrymž je jeho žiwjenje wohrožene.

Knježerstwo we Waršawje wumjetuje běłoruskemu mócnarjej Aleksanderej Lukašenkej, zo ćěkancy zaměrnje z kri­zo­wych kónčin k wonkownej mjezy EU sće­le­, zo by so za sankcije EU přećiwo njemu wjećił. Parlament bě změnu zakonja srjedź oktobra wobzamknył. Prezident Andrzej Duda je ju podpisał. Pomocny skutk UNO je wulce starosćiwje na nowy zakoń reagował, dokelž wón zakładne čłowjeske prawo na azyl podrywa.

Po nanuzowanej přestawce koronapandemije dla je wčera zaso 200 wobdźěl­nikow legendarny napřemoběh po 1 576 schodźenkach New Yorkskeho Empire State Buildinga přewjesć móhło. Naj­spěšniši bě Wai Ching Soh z Malaysije, kiž bě po 10 mjeńšinach a 46 sekundach w cilu. Lěta 2019 bě wón hišće na druhim městnje był. Najspěšniša žona bě Cinda Harris z USA, kotraž po 14 mjeńšinach a jednej sekundźe cyle horjeka doběža.

Roboter „Bella“ wot najnowšeho wopytowarjow hosćenca w schleswigsko-holsteinskim Grömitzu při Baltiskim morju posłužuje. Z njewšědnym pomocnikom chce hosćencar Tim Bornewasser pro­blemy pobrachowaceho personala dla rozrisać. Rěčaca mašina nima pak čłowjeski serwis narunać. Wona pak móže jědźe a napoje přiwjezć. Skazanki při­wza­ja dale čłowjescy kolegojo „Belle“.