Płaćizny energije ćěrja inflacijuw Němskej
Wiesbaden (dpa/SN). Razny rozrost płaćiznow za bencin a tepjenski wolij dźerži inflaciju w Němskej dale na wysokim niwowje, byrnjež so wona w juniju z 2,3 procentami porno lońšemu junijej snadnje wosłabiła. W meji bě inflaciska rata z 2,5 procentami najwyši staw minjenych dźesać lět docpěła.
Wosebje raznje wuskutkuja so přiběrace płaćizny energije při tankownjach a při napjelnjenju tanka tepjenskeho wolija. Tepjenski wolij je 42,5 procentow dróši hač loni, bencin a diesel płaćitej 23,5 procentow wjace.
Po wobličenju přirunowanskeho portala Verivox płaća přiběrace płaćizny energije přerěznu domjacnosć 498 eurow přidatnje wob lěto. Za cyłkownu potrjebu ćopłoty, miliny a bencina dyrbi domjacnosć z třomi wosobami 14,3 procenty wjace płaćić hač loni.
Bjez nahubnika nakupować
Drježdźany (dpa/SN). W Sakskej smědźa ludźo wot pjatka bjez nahubnika we wobchodach a superwikach nakupować. Wuměnjenje je, zo wostanje sydom-dnjowska incidenca natyknjenjow z koronawirusom pod dźesać. To je sakska ministerka za strowotnistwo Petra Köpping (SPD) wčera po posedźenju krajneho knježerstwa připowědźiła. Škit za hubu a nós pak je w busach, železnicach kaž tež w medicinskich institucijach a w hladarnjach dale trěbny. Incidenca w Sakskej wučinja tuchwilu 2,2.
Frakcija AfD w Sakskim krajnym sejmje je připowědźiła, zo chcyła přećiwo aktualnemu škitnemu postajenju koronawirusa dla skoržić. „Minjene połdra lěta praktikuje sakske statne knježerstwo pod nawodom socialneho ministerstwa politiku, kotraž swobodu ludźi, pohibanja a powołanja masiwnje wobmjezuje“, rjekny stronski a frakciski předsyda Jörg Urban w Drježdźanach. Zo ma tónle „njeznjesliwy trajny staw“ tež pola incidency blisko nule wostać, pokazuje njezajim knježerstwa, ludźom prawa wróćić.
To a tamne (14.07.21)
Z kłódy ćeknyć móžeše sydom jatych w Indiskej, po tym zo běchu stražnikam chili a sel do mjezwoča mjetali. Stražnicy běchu jim poprawom wječer přinjesć chcyli a buchu přez korjeniny we wočach zranjeni. Jednomu stražnikej pokradnychu samo handy. Korjeniny běchu w zhromadnej celi chowali. Policija je sej wěsta, zo jatych bórze zaso změja. Wšako je ludźom w potrjechenej kónčinje tuchwilneho lockdowna dla wot 15 do 5 hodź. zakazane dom wopušćić.
Koleso do rěki ćisnył je roznjemdrjeny pěšk w Mnichowje. 58lětny muž bě 44lětneho kolesowarja na to skedźbnił, zo po chódniku jědźe, na čož dóńdźe mjez nimaj k raznej zwadźe. Skónčnje pěšk kolesowarja biješe, hrabny koleso a ćisny je do kanala rěki Isar. Wot swědkow přiwołana policija móžeše zwadu skónčić, za kolesom pak hišće pytaja.
Z nazhonitym načolnym kandidatom
Znamjenja běchu wjelelubjace, nětko je to oficialne: Zwjazkowy wólbny wuběrk je wobkrućił, zo wobdźěli so Južnoschleswigski wolerski zwjazk (SSW) na wólbach zwjazkoweho sejma 26. septembra.
Flensburg (SN/at). Ze zaměrnym dźěłom je mjeńšinowa strona Danow a Frizow w Schleswigsko-Holsteinskej dalši wotrězk wólbnych přihotow zmištrowała. Rozsud zwjazkoweho wólbneho wuběrka w parlamenće Němskeje (SN informowachu) mjenowaše předsyda SSW Flemming Meier „za nas jako mjeńšinowu stronu historiski dźeń“.
Loni w septembrje bě so na krajnym zjědźe SSW 66 ze 111 delegatow za wobdźělenje na wólbach zwjazkoweho sejma wuprajiło, 41 přećiwo tomu. Jedyn argument přećiwnikow, kaž nowinski rěčnik Per Dittrich podšmórny, tehdy bě, zo njebychu dosć personala za tajke wužadanje měli. Wuwiće wot toho časa pak to nawopačne wobswědča: Ze zjězda wuchadźacy rozmach je čłonstwo mobilizował, wokrjesne zwjazki su swoje personalne namjety bórze přizjewili.
Maas po puću do USA
Berlin/Detroit (dpa/SN). Krótko do wopyta zwjazkoweje kanclerki Angele Merkel (CDU) we Washingtonje je so wonkowny minister Heiko Maas (SPD) dźensa na třidnjowski wopyt do USA podał. W industrijnej metropoli Detroiće chcyše wón produkcisku městnosć farmakoncerna Pfizer wopytać, kotryž šćěpiwo pře koronawirus tež Němskej dodawa. Štwórtk wobdźěli so Maas w New Yorku na konferency wo Libyskej. Kanclerka chce jutře do USA wotlećeć.
W instituće so wobhoniłoj
Berlin (dpa/SN). Zwjazkowa kanclerka Angela Merkel je dźensa zhromadnje ze zwjazkowym ministrom za strowotnistwo Jensom Spahnom (wobaj CDU) Roberta Kochowy institut wopytała. Tam chcyštaj so wo aktualnych nadawkach, předewzaćach a wužadanjach instituta wobhonić. Zwjazkowe knježerstwo bě připowědźiło, swoju strategiju přećiwo koronawirusej přichodnje změnić a njedźiwać jenož na incidencu natyknjenjow, ale tež ličbu nowych pacientow w chorownjach wobkedźbować.
Šćěpja strowotniski personal
Optimizm mjez předewzaćemi dale přiběra
Köln (dpa/SN). Hladajo na jasnje woteběrace ličby infekcijow z koronawirusom a přiběracu zwólniwosć so šćěpić dać, je optimizm w němskim hospodarstwje dale a wjetši. „Prěni króć po wudyrjenju pandemije zhladuje najwjetši dźěl předewzaćow z wulkim optimizmom na lěto 2021.“ Takle zjima Institut němskeho hospodarstwa wuslědk swojeho najnowšeho konjunkturneho naprašowanja. „Pandemija swoju hrózbu poněčim zhubja“, rjekny zamołwity instituta za naprašowanje Michael Grömling.
Dobra połojca (51 procentow) wšěch 2 000 narěčanych předewzaćow liči lětsa z wyšej produkciju hač w lěće 2020. Jenož 15 procentow wočakuje špatniše wuslědki. Něhdźe 43 procentow předewzaćow chcyło wjace ludźi přistajić hač loni. Nimale runje telko (42 procentow) chcyło wjace inwestować. Přirunujo z nalětnim naprašowanjom je so nalada widźomnje polěpšiła.
Winowatosć šćěpjenja wukazać?
Berlin (dpa/SN). Prezident Zwjazkoweje lěkarskeje komory Klaus Reinhardt žada sej intensiwnišu kampanju šćěpjenja. „Hdźe wostanje telewizijny wabjenski spot do wječornych powěsćow. Mamy pak ludźi tež na městnje informować, wosebje tam, hdźež je zwólniwosć so šćěpić dać skerje snadna. Dyrbimy ludźi narěčeć.“ Kóždy dorosćeny dyrbjał k tomu přinošować, zo wostawa ličba natyknjenjow z koronawirusom dale snadne, a da so šćěpić, Reinhardt potwjerdźa.
Mjeztym dale wo tym debatuja, hač njeměli winowatostne šćěpjenje za personal w šulach a pěstowarnjach wukazać. Prezident zwjazka wučerjow Hans-Peter Meidinger to kritisce wobhladuje. Wón na to skedźbnja, zo su wučerjo zwjetša zwólniwi so šćěpić dać a zo je w někotrych zwjazkowych krajow nimale 90 procentow personala šćěpjenych.
Strowotniski fachowc SPD Karl Lauterbach je přećiwo winowatostnemu šćěpjenju: „Šćěpjenje přećiwo koronawirusej dyrbi dale dobrowólny rozsud kóždeho jednotliwca wostać. To smy slubili.“
„Wuznawamy so k stawiznam“
Zhorjelska synagoga po wobšěrnym ponowjenju swjatočnje wotewrjena
Zhorjelc (AK/SN). Po wobšěrnym ponowjenju je Zhorjelska synagoga – natwarjena mjez 1909 a 1911 w młodźinskim stilu – zaso wužiwajomna. Přichodnje ma wona jako kulturny forum a dom modlenja městno zetkawanja, stawiznow, wučby a zhromadnosće być. „Naše europske město Zhorjelc je symbol zhromadźenstwa, wotewrjenosće swětej napřećo a tolerancy. Mjez nami nimaja antisemitizm, populizm, ekstremizm a rasizm žane městno“, podšmórny Zhorjelski wyši měšćanosta Octavian Ursu (CDU) wčera na swjatočnym poswjećenju. „Njekłonimy so jeno před židowskimi woporami nacionalsocialistiskeje diktatury, ale wuznawamy so tež k zachowanju synagogi a k stawiznam města. Na swjatočnosć přichwatali běchu nimo wyšeho měšćanosty społnomócnjena zwjazkoweho knježerstwa za kulturu a medije Monika Grütters, sakski ministerski prezident Michael Kretschmer (wobaj CDU), zastupnicy měšćanskeje a krajneje politiki kaž tež židowskeho žiwjenja.
To a tamne (13.07.21)
Urin psow je w Japanskej prawdźepodobnje sćežor ample powalił. Přepytowanje deleka wotłamaneho železneho sćežora přez fachowcow policije je wunjesło, zo bě wokoło stołpa 40 króć wjace urina hač pola druhich tajkich sćežorow w měsće Suzuka. Přepytowarjo su přeswědčeni, zo je so sćežor na křižowanišću z woporom korozije stał. Pódla njeho je šćežka, po kotrejž so ludźo ze swojimi štyrinohatymi lubuškami wuchodźuja.
Wosrjedź awtodróhi z připowěšaka skočiła je kruwa w hornjej Bayerskej. Ratar bě howjado po A 8 do směra na Mnichow transportował, jako wone z nakładowanskeje rampy skoči. Na to běžeše awtam napřećo po jězdni. Ratar to hakle pytny, jako jeho šoferojo trubjo na to skedźbnichu. Z wulkej prócu so burej a přiwołanej policiji skónčnje poradźi, kruwu popadnyć a ju wróćo na připowěšak dóstać.
Přihotuja klimowu konferencu
Vatikan (B/SN). W přihotach na klimowy wjeršk w šotiskim Glasgowje w nowembrje (COP26) zdźěłuje 40 nabožnych nawodow-specialistow a dźesać wědomostnikow stejišćo za swětowu politiku. Za to ma so 4. oktobra we Vatikanje konferenca pod hesłom „Faith and Science: Towards COP26“ wotměć. Je chětro wěste, zo so bamž na njej wobdźěli, rjekny arcybiskop Paul Gallagher. Nuznosć, rozrisać socialne a wobswětopolitiske prašenja, kotrež je bamž w swojej encyklice „Laudato si“ naćisnył, dźeń a bóle přiběra.
Nowa domizna za wěriwych
