Jenož hišće 2G
Zeleni a FDP z prěnimi rozmołwami
Berlin (dpa/SN). Dospołnje njewočakowano su so wodźacy zastupnicy Zelenych a FDP hižo wčera wječor k prěnim rozmołwam wo móžnym wobdźělenju w nowym knježerstwje zetkali. Předsydaj Zelenych Annalena Baerbock a Robert Habeck zetkaštaj so z předsydu FDP Christianom Lindnerom a generalnym sekretarom strony Volkerom Wissingom. Wšitcy štyrjo stajichu foto kwarteta do interneta a pisachu: „Pytajo za nowym knježerstwom pruwujemy zhromadnosće a mosty nad so dźělacym, a smy samo něšto namakali. Napjate časy.“
Zeleni a liberalni móhli po wólbach zwjazkoweho knježerstwa tak mjenowanu amplowu koaliciju z SPD abo tež zwjazk z CDU wutworić. SPD z kanclerskim kandidatom Olafom Scholzom je wólby dobyła. CDU je razne straty poćerpjeła. Hłowny zaměr Zelenych a FDP je, so na zasadne směrnicy zhromadneho politiskeho dźěła jako wuměnjenje za „nowostart“ knježerstwoweje politiki dojednać. Hakle pozdźišo chcedźa ze stronu móžneho kanclera rěčeć.
Nowe wuměnjenja
Warnuja před katastrofu
Za wotstup Lascheta
To a tamne (29.09.21)
Nimo lećaca tonuška je smalerja na sewjeru Francoskeje před pokutu škitała. „Maće dwě móžnosći tomu zadźěwać, zo was błyskač lepi“, piše policija k njewšědnemu podawkej w pobrjóžnym městačku Grègesu. „Pak dodźeržiće předpisanu spěšnosć, pak dyrbiće so na zbožo spušćić.“ K tomu wozjewi policija foto błyskača, na kotrymž křidło nimo lećaceje tonuški čisłowu taflu awta zakrywa. „Poručujemy skerje, nohu z płunoweho pedala wzać“, policija piše.
Swoju mać z awta wuzamknyła bě lěto stara holčka. Do toho bě mać w bayerskim Kreuzwertheimje dźěsću, kiž w awće sedźeše, klučik awta k hrajkanju přewostajiła. Při tym stłóči holca na kluč a zamkny tak awto wotnutřka. Přirěčowanje maćerje ničo njepomhaše. Skónčnje dyrbjachu wohnjowu woboru wołać. Wobornicy awto na to wotewrěchu.
Altmaier gratuluje dobyćerjam
Berlin (dpa/SN). Zwjazkowy minister za hospodarstwo Peter Altmaier (CDU) je SPD, Zelenym a FDP k jich wuslědkam při wólbach zwjazkoweho sejma gratulował. Runočasnje wón dźensa w rozhłosu potwjerdźi, zo nima unija nadawk, nowe knježerstwo wutworić. „K tomu słuša zwěsćenje, zo tym gratulujemy, kotřiž su hłosy wolerjow přidobyli“, wón rjekny. Hladajo na móžnu koaliciju pod nawodom CDU wón rjekny: „Njewuprajamy žane žadanja. Njesměmy pak so zdobom swojej zamołwitosći wuwinyć.“
Zahaja rozmołwy wo koaliciji
Berlin (dpa/SN). Nawodnistwo Berlinskeje SPD hišće njewě, z kim chce přichodnje w nowym krajnym knježerstwje hromadźe dźěłać. Kónc tydźenja chcedźa rozmołwy zahajić. „Započinamy ze Zelenymi, potom tež z Lěwicu, potajkim z dotalnymi partnerami“, rjekny zastupowacy předsyda Read Saleh rozhłosownikam. Potom matej FDP a CDU sćěhować. „Je wěc respekta, zo ze wšěmi rěčimy.“ Berlinska SPD bě wólby ze swojej kandidatku Franzisku Giffey dobyła.
Pau žada sej konsekwency
Zemjerženje sylnosće 5,8 na Richterowej skali je wčera Heraklion na ...
Šef AfD z wuslědkom njespokojom
Berlin (dpa/SN). Po stratach hłosow wolerjow při wólbach zwjazkoweho sejma je předsyda AfD Jörg Meuthen konsekwentnu analyzu móžnych zmylkow připowědźił. „Pod smužku njemóžemy drje to jako wuspěch wobhladować“, rjekny Meuthen, kiž njebě sam za zwjazkowy sejm kandidował, wčera w Berlinje. AfD bě z hesłom „Zmužitosć k wěrnosći“ nastupiła. K tomu tež słuša, „zo sej wěcy rjenje njebarbimy“. Zapósłanc Europskeho parlamenta rjekny, zo dyrbjało so wo tym rěčeć, hač je mudre było, žadanje za wustupom Němskeje z Europskeje unije do wólbneho programa zapisać.
„Stoprocentowsce spokojom z wuslědkom njejsym“, rjekny načolny kandidat AfD Tino Chrupalla, kiž stronu jako ko-předsyda zhromadnje z Meuthenom nawjeduje. Wón rěčeše najebać to wo „stabilnym wuslědku“. Dalša načolna kandidatka Alice Weidel rjekny, zo „njeda sej wuslědk wólbow wočornić, wot nikoho“.
Unija debatuje wo poražce
Wjetšina přećiwo nowemu knježerstwu pod nawodom CDU
Berlin (dpa/SN). W rjadach CDU spjećuja so přiběrajcy planam kanclerskeho kandidata Armina Lascheta, najebać historisku wólbnu poražku při wólbach zwjazkoweho sejma zhromadne knježerstwo ze Zelenymi a FDP wutworić. Předsyda delnjosakskeje CDU Bernd Althusmann sej žadaše: „Nětko měli wolu wolerjow ponižnje přiwzać, přistojnje a z krutym rjapom. Ludźo su změnu chcyli.“ Hessenski ministerski prezident Volker Bouffier podšmórny: „Nimamy žane prawo na knježerstwowu zamołwitosć.“ Předsyda Młodeje unije Tilman Kuban rjekny: „Smy wólby přehrali, dypk.“ Jasny nadawk leži po jeho měnjenju pola SPD, Zelenych a FDP.
