„Wažne je, što po brunicy přińdźe.“ Sada je hesło kandidata Jensa Bitzki, z kotrymž wabi wón na dwurěčnym plakaće wo hłosy za sebje a swoju stronu Zwjazk 90/Zeleni k lětušim wólbam zwjazkoweho sejma. Doba po brunicy z trěbnej strukturnej změnu jima ludźi po wšej Łužicy. To wobkrućichu jemu tež rozmołwy, kotrež je direktny kandidat we wólbnym wokrjesu 156 Budyšin I na stejnišću swojeje strony na Dnju Saksow w Lubiju wjedł. „Młody muž so wobhoni, hač změje po zakónčenju wukubłanja pola LEAG w swojim powołanju scyła hišće dźěłowe městno“, Jens Bitzka powěda. Wón to wězo zaručić njemóže, je pak přeswědčeny, zo trjebaja we Łužicy stajnje derje wukubłanych ludźi.
Seoul (dpa/SN). Po atomowym tesće Sewjerneje Koreje nětko Južna Koreja swoju wojersku móc prezentuje. Jeje wójnske łódźe su w japanskim morju zwučowali, rěka w dźensnišej zdźělence mariny. Hač do soboty planuja hišće dalše zwučowanja. Mjeztym je so zwjazkowa kanclerka Angela Merkel (CDU) na prezidenta USA Donalda Trumpa wobroćiła z próstwu, konflikt měrliwje rozrisać. Trump hrožeše Sewjernej Koreji z wojerskej wotmołwu, dokelž bě njedźelu wodźikowu bombu testowała.
Liča z dalšim hurrikanom
Washington (dpa/SN). Dalši hurrikan z mjenom Irma nabywa nad Atlantikom dale a wjace mocy. Mjeztym je mjezynarodny hurrikanowy centrum USA wjerćaty wichor do štwórteje a tak do druheje najwyšeje kategorije zastopnjował. W přichodnych 48 hodźinach móhł so tón hišće zesylnić. Mjeztym so w Karibice na wichor přihotuja. Tamniše zarjady prošachu wobydlerjow, so wotpowědnje zawěsćić. Hurrikan móhł tež znowa USA, tónkróć Floridu, trjechić.
Pjenjezy njedosahaja
Budyšin (SN). Tuchwilu njeje w Budyšinje hižo centralna městnosć, hdźež je zjawny wosobowy wobchad optimalnje z indiwidualnym wobchadom zwjazany. Tuž so přichodnje Budyski wokrjes, měšćanske zarjadnistwo a wobchadny zaměrowy zwjazk ZVON zhromadnje wo rozrisanje prócuja. Zaměr je, železnicu, bus, awto a koleso lěpje koordinować, za čož pak su wotpowědne twarske wuměnjenja trěbne. Nimo toho měli so jězbne plany a puće linijow přiměrić. Po tym zo je měšćanska rada planowanskemu dojednanju přihłosowała, móža so partnerojo zhromadnje z wobchadnej temu rozestajeć. Do toho zapřijeć chcedźa akterojo wuwiće měšćanskeho wobchada a hłowneho busoweho zastanišća sprjewineho města.
Hołb měješe wosebity kurěrski nadawk spjelnić a z drogami do argentinskeho jastwa lećeć. To pak bě jeho zahuba. Policiji wšak bě strategija skućićelow znata. Tak wona na hołbja łakaše a jeho zatřěli. W móličkim nachribjetniku nańdźechu zastojnicy 40 pilow, někotre gramy marihuany a USB-stick. Hižo w lěće 2013 bě argentinska policija skućićelow lepiła, kotřiž hołbje za tajke drogowe kurěrske lěty zasadźichu.
Z kolesom na awtodróze A 7 po puću bě muž w Delnjej Sakskej blisko Seevetala. Jeho awto njeměješe hižo žadyn bencin a bě stejo wostało. Muž wza sej kanister a šwikny so na koleso, kotrež bě připadnje sobu wzał. Byrnjež po předpisach na nabóčnej čarje napřećo wobchadej a ze swěcu jěł, njebě sej wěsty, kajki strach jemu poprawom hrožeše. Policija jemu přiwšěm popłatk napołoži.
Budyšin (SN/MiR). Za štyri tydźenje smy namołwjeni wolić nowy Zwjazkowy sejm Němskeje. Hač do 3. septembra mějachu komuny swojim wólbokmanym wobydlerjam wotpowědne podłožki připósłać. „Informowanych je w Budyskim wólbnym wokrjesu 156 tuchwilu 215 400 wobydlerjow. Komuny Arnsdorf, Ottendorf-Okrilla, Radeberg, Wachau, Großröhrsdorf z Budyskeho wokrjesa słušeja do wólbneho wokrjesa 160. A za te Budyske wokrjesne zarjadnistwo žanu ličbu wólbokmanych nima“, zdźěli na naprašowanje nawodnica za wólby w Budyskim wokrjesu Andrea Peter. W měsće Budyšinje samym je něhdźe 33 000 wólbokmanych swoje wólbne podłožki dóstało.
Berlin (dpa/SN). Po telewiznym duelu mjez zwjazkowej kanclerku Angelu Merkel (CDU) a kandidatom SPD za tele zastojnstwo Martin Schulz spytatej wobě stronje hišće wo hłosy wolerjow wabić. Najebać to, zo je kanclerka po naprašowanjach telewizny duel dobyła, ma frakciski šef unije Volker Kauder wólby za njerozsudźene. Po słowach zwjazkoweho justicneho ministra Heika Maasa (SPD) je wustup Schulza wčera socialdemokratam zaso wjac zmužitosće spožčił.
Wjace ćišća wukonjeć
Tokio (dpa/SN). Japanska a USA chcedźa po šestym atomowym tesće Sewjerneje Koreje kónc tydźenja zhromadnje maksimalny ćišć wukonjeć. Na to dorozumištaj so dźensa japanski wonkowny minister Taro Kono a jeho hamtski kolega USA Rex Tillerson. Kaž japanske medije zdźěleja, chcetaj so wonaj na dźensa připowědźenym wurjadnym posedźenju Bjezstrašnostneje rady UNO za nowe sankcije přećiwo Pjönjangej zasadźić.
Wuradźuja zhromadnje
Berlin (SN). Předsyda Centralneje rady němskich Sintow a Romow Romani Rose je so z prezidentom zwjazkoweje policije Dieterom Romannom w telefonaće dorozumił, zo maja prawniskostatne kriterije za wšěch wobydlerjow płaćiwe być. Wosebje ma so při tym na škit narodnych mjeńšin dźiwać.
Pozadk rozmołwy je sćěhowacy: We wobłuku swojeho přednoška tydźenja na dnju wotewrjenych duri w Berlinskim zwjazkowym nutřkownym ministerstwje bě Rose zwjazkowej policiji rasizm wumjetował. Do toho bě jeje zastupjer wo tym rěčał, kak móhł so před paduchami škitać a jim kriminelnu turu skazyć. Při tym wón rjekny, zo ma kóžda etniska skupina swoje kriminelne metody.
Nětko staj so Rose a Romann telefonisce wujednałoj a chcetaj so w Podstupimje zetkać, zo byštaj wo potrjebje a móžnosćach zhromadneje kooperacije rěčałoj, kaž w zhromadnej zdźělence rěka. Zdobom prezident zwjazkoweje policije wuzběhny, zo njesmě so statna přisłušnosć wobydlerjow do prašenja stajeć. Pochad a barba kože nimatej kriterij policajskeho dźěła być.
Drježdźany (SN/BŠe). Awtomobilowa branša je wodźacy industrijny wobłuk Němskeje a Sakskeje. Dźensa dźěła w nim wjac hač 80 000 ludźi swobodneho stata. Aktualneho połoženja wotpłunoweho skandala dla bě awtomobilowa branša tež tema posedźenja Sakskeho krajneho sejma.
Hospodarski minister Martin Dulig (SPD) apelowaše na industriju, nastupajo technologiske inowacije njepopušćić a sej dowěru kupcow zdobyć. Producenća jězdźidłow maja zamołwitosć napřećo kupcej. „Dyrbimy dieselowu technologiju dale wuwić“, wón wuzběhny. Awtomobilowa industrija ma so wo to starać, zo přetwar dieselowych jězdźidłow funguje, a za to zamołwići su awtotwarcy. „Wo zakazu dieselowych motorow ničo njedźeržu“, hospodarski minister podšmórny. Tuchwilnu debatu ma wón za šansu, branšu wobnowić. Wustork jědojteho wotpłuna ma so dale a bóle pomjeńšeć. Hospodarske ministerstwo je zwólniwe twarcow a dodawaćelow jězdźidłow podpěrać.