Brüssel (dpa/K/SN). Za papjery, kotrež je Wulka Britaniska dotal nastupajo wustup z EU předpołožiła, ma prezident komisije­ EU Jean-Claude Juncker zaničacy posudk. „Wšitke papjery (…) sym sej z trěbnej dokładnosću přečitał, ale žana jenička mje prawje njespokoja.“ Wjele prašenjow je hišće wotewrjenych, rjekny Juncker w Brüsselu. Wot Britow stajene žadanje, zdobom wo brexiće a wo zrěčenju wo přichodnych poćahach jednać, wón wotpokaza.

Fabrika móhła rozbuchnyć

Washington (dpa/K/SN). Chemiskej fabrice w sydlišću Crosby, ležanym něhdźe 40 kilometrow sewjerowuchodnje texaskeho města Houston, hrozy hladajo na powodźenja přez wichorisko Harvey rozbuch. W fabrice wužiwane chemikalije su so woćoplili, po tym zo je chłódźernja po wupadźe miliny dźěłać přestała. Organiski produkt peroksid, kiž w tworni zhotowjeja, dyrbja při niskich temperaturach składować. Tole hižo móžno njeje, tuž su ludźi, bydlacych w bliskej wokolinje fabriki, do wěstych kónčin přeměstnili.

Diskusija přeniskich mzdow dla

Bywši nawoda dźěłarnistwa Solidarność a něhdyši statny prezident Lech Wałęsa je mnohim Polakam symbolna figura. Dźensa je wón při pomniku łódźnicy w Gdańsku k 37. róčnicy awgustowskeho zrěčenja kwětki połožił. 1980 běchu tam 41 protestowacych dźěłaćerjow zatřělili. Jich nawoda bě tehdy Wałęsa, kiž je žonje na wobrazu dale z přikładom. Foto: pa/Michał Fludra

Tirana (SN). Sobustaw Federalistiskeje unije europskich narodnych mjeńšin (FUEN), makedonske zjednoćenstwo Ilinden z Tirany, chce škitać prawa Makedonjanow bydlacych w Albanskej. Zjednoćenstwo sej wot albanskich zarjadow žada, dokumenty identity w makedonšćinje wuhotować.

Kaž FUEN nětko zdźěli, je předsyda zjednoćenstwa Ilindow Nikola Gjurgaj wotpowědnu próstwu generalnemu direktorej za porodowy register Bledarej Doracajej posrědkował, zo bychu přichodnje mjezynarodne dokumenty, kaž porod, kwas a dalše, w makedonšćinje zhotowjeli. Móžne su hižo přidatne grjekske, italske, jendźelske a němske dokumenty­ k albanskim.

Po słowach Nikole Gjurgaja by mnohim albanskim wobydlerjam pomhane było přidatne kóšty wobeńć, hdyž trjebaja woni wosobinske dokumenty, přełožene z albanšćiny do makedonšćiny dać.

Wot junija jednaja zamołwići Europskeje unije a zastupjerjo Wulkeje Britaniskeje wo brexiće. Wuspěchi jednanjow dotal žane wozjewić njemóžachu. Nětko so tež komisariski prezident EU Jean-Claude Jun­cker słowa jima a předležace britiske dokumenty k brexitej raznje kritizuje. Wulka Britaniska žada sej wjace fleksibility a kompromisow. Kraj je sam wo tym rozsudźił, zo nochce Europskej uniji hižo přisłušeć. Nětko mam zaćišć, zo su hłowu zhubili. Wuskutki brexita tam hižo nětko začuwaja. Hospodarstwo njepřiběra, mnohe banki a předewzaća maja wotpohlad abo su kupu hižo wopušćili, dokelž njewidźa tam žadyn přichod. Mnohe prašenja we wšěch móžnych wobłukach, hač hospodarskich, žiwjenskich, politiskich ..., su wotewrjene. Poprawom měł so brexit hač do kónca měrca 2019 wotměć. Z časom pak dale a bóle broja. Hač drje budźe brexit na kóncu exit? Bianka Šeferowa