Drježdźany (SN/BŠe). Sakski ministerski prezident Stanisław Tilich (CDU) swoje stejišćo přećiwo nowym wobswětowym směrnicam za brunicowe milinarnje Europskeje unije zakituje. Po jeho słowach měli so nowe směrnicy jeno žadać, su-li dźensa a w přichodźe techniske móžnosće, je tež zwoprawdźić. „Trjebamy brunicu, zo bychmy energijowu změnu zmištrowali“, Tilich wuzběhny.
Hižo tydźenja bě sakski ministerski prezident w mjenje brunicowych krajow Braniborskeje, Sewjerorynsko-Westfalskeje, Sakskeje a Saksko-Anhaltskeje zwjazkowemu hospodarskemu ministerstwu list pisał. W nim sej žadaše, zo měli přećiwo nowym hranicam žiweho slěbra a dusykoweho oksida skoržić. Nowe směrnicy haća planowansku wěstotu brunicowych milinarnjow, šef sakskeho knježerstwa kritizowaše.
Wosebity dźak dóstachu wohnjowi wobornicy tele dny w južnej Jendźelskej. Woni běchu 18 prosatow před wohenjom wuchowali. Šěsć měsacow pozdźišo překwapi jich burowka z čerstwymi grilowanskimi kołbaskami jednoho z prosatkow, kotrež bu nětko zarězane. Mjeztym zo sej wobornicy dobry słód chwalachu, druzy – předewšěm zastupnicy zwěrinoškitnych organizacijow – zadźerženje burowki raznje kritizuja.
Z falšowanymi pjenjezami płaćiłoj staj studentaj dwaj měsacaj dołho w jednej Mnichowskej barje. W tak mjenowanym darkneće wobstarowaštaj sej za to wopačne 50eurowske bankowki. Zo to tak derje dźe, samo jeju překwapi. Zbožo wšak dołho njetraješe. Posłužowarce w klubje Willenlos wobšudnistwo napadny, a wona zawoła policiju. Sudnicy pósłachu 20lětneju do tydźenskeho aresta. Tež falšowarjow policija nětko ma.
Rotterdam (dpa/K/SN). Po tym zo běchu wčera rockowy koncert ameriskeje skupiny Allah-Las warnowanja před terorom dla w Rotterdamje wotprajili, je policija w nocy dalšeho muža zajała. 22lětneho su zastojnicy z jeho bydlenja w prowincy Sewjerny Brabant sobu wzali, po tym zo bě policiji hroženje atentata dóšło. Wony w Rotterdamje zajaty šofer transportera z kopicu płunowych blešow je njewinowaty. Monter ze Španiskeje, kiž bě pjany był, móžeše wěc z płunowymi blešemi plawsibelnje wuswětlić.
Zemja so zesunyła
Bondo (dpa/SN). Po zesunjenju zemje w šwicarskim kantonje Graubünden je wosom ludźi zhubjenych. Pječa su mjez nimi tež Němcy a Awstričenjo. Za čas njezboža běchu woni w kónčinje Val Bondasca po puću. Po trochowanjach su so něhdźe štyri miliony kubiknych metrow zemje, błóta a kamjenjow do doła sypnyli. To sta so direktnje pódla wsy Bondo z něhdźe sto wobydlerjemi, kotruž su ewakuowali. Zranił so w Bondźe nichtó njeje, wšako maja tam za tajke pady alarmowu připrawu.
Wudawki jasnje přiběrali
Budyšin (SN). Rěčny centrum WITAJ je wčera w swojej bibliotece swěrnych awtorow maćeršćinow počesćił. Mjez nimi běchu mjez druhim dr. Jana Šołćina, dr. Anja Pohončowa, Milenka Ertelowa, Alena Dubawina a Kerstin Klingnerowa. Na te wašnje dźakuje so RCW fachowcam, kotřiž zmóžnjeja serbskorěčny wučbny material z wuwaženym wobsahom k rozdźělnym temam pjelnić. „Maćeršćiny maja wosebity wuznam při posrědkowanju serbšćiny a žadaja sej wjelelětne wutrajne a wěcywustojne fachowe dźěło. Je tuž načasu so awtoram dźakować“, rěka w nowinskej zdźělence.
Spočatk šulskeho lěta bě nowa „Naša maćeršćina 9/10“ w zamołwitosći RCW wušła. Z njej je nowy rjad wučbnicow zakónčeny. Nastorčiła bě zdźěłanje lěta 2007 wučerka Felicitas Kralowa zhromadnje z wučerkomaj serbšćiny Milenku Ertelowej a Katku Bukowej.
Barcelona (SN/JaW). Katalonska wojuje najebać wulke spřećiwjenje Španiskeje dale wo swoju njewotwisnosć. Poćahi mjez centralnym knježerstwom pod nawodom prezidenta Mariana Rajoyja w Madridźe a w Barcelonje skutkowacym regionalnym katalanskim knježerstwom pod wjednistwom Carlesa Puigdemonta su chětro napjate. Carles Puigdemont je za 1. oktober připowědźił referendum wo njewotwisnosći. To zdźěla Zjawna diplomatiska rada Katalonskeje (Diplocat) w nowinskej zdźělence. Njeje wšak to prěni pospyt něhdźe 7,5 milionow Katalanow, kotřiž sebjewědomje swoju mjeńšinowu rěč katalanšćinu nałožuja, wo njewotwisnosći regiona wothłosować dać.
Budyšin (CS/SN). Rěčnica Alternatiwy za Němsku (AfD) za kubłansku politiku w Sakskim krajnym sejmje Andrea Kersten je mać dweju šulskeju dźěsći a tuž derje wě, što so na šulach w swobodnym staće stawa. Mjeztym zo rěči sakska kubłanska ministerka Brunhild Kurth (CDU) wo hłubinje, přez kotruž tuchwilu kročimy, ma Kersten połoženje na kubłanišćach za katastrofalne. Wčera přednošowaše wona w Budyskim hosćencu „Lusatia“. Tam wěnowaše so předewšěm saněrowanja potrěbnym šulam, přemało wučerjam, přidružnikam, wupadej wučbnych hodźin, inkluziji, ćěkancam a politiskemu kubłanju.
Za porjadny twarski staw šulow je mjeztym 34 miliardow eurow trěbnych. Mnohe kubłanišća saněrowanje mjeztym ze spěchowanskich pjenjez financuja, byrnjež komuny za to zamołwite byli. Nastupajo njedostatk wučerjow kritizowaše Andrea Kersten njeatraktiwnosć powołanja. Wuknjenske wuměnjenja za dźěći so pohubjeńšeja, hdyž kursy a rjadownje hromadźe kładu.
Wobraz hoberskeho VW-bullija pyši łuku w šwicarskej wsy Château-d’Œx njedaloko Genfskeho jězora. Z powětra wupadaja awta na dróhach porno bullijej kaž mrowje. Wobraz je 4 200 kwadratnych metrow wulki. Francoz Saype bě jón za VW-festiwal molował, za čož přetrjeba 400 litrow barby, kotraž je biologisce wottwarjomna. Po třoch měsacach so wobraz wotsamo zaso zhubi.
Nimale slepa Američanka je 28 dnjow dołho po lěsu błudźiła a za pućom pytała. Stajnje bě něhdźe dwaj kilometraj wot zjawneje dróhi zdalena, našła pak ju njeje. 25lětnu nańdźechu nahu, wuhłódnjenu a chětro rozdrapanu. Policija tuka na to, zo w jeje padźe drogi wěstu rólu hraja. Mužej, z kotrymajž je žona zhromadnje drogi brała, běštaj wo tym přeswědčenaj, zo staj ju moriłoj.