W pasažěrskim lětadle 13 000 metrow wysoko dźowku porodźiła je 18lětna Francozowka. Wona bě minjeny pjatk z mašinu Turkish Airlines po puću z ginejskeje stolicy Conakry do Istanbula, jako­ so hrona započachu. Wobsadka lětadła, kotraž bě za tajke pady wukubłana, młodej žonje pomhaše. Pasažěrojo su jako­ dar pjenjezy za dźěćo zběrali. W interneće wozjewichu pozdźišo foto wobsadki z nowonarodźenej a tekstom „Witaj w lětadle, princesna“.

W starym přezerzawjenym horncu njezbožownje zapopadnył je so sornik w sewjerorynsko-westfalskim Wülfra­thu. Žona bě jeho z horncom wokoło šije w přirowje wuhladała. Tež prědnjej noze w sudobju tčeštej, kotrež njeměješe hižo spódk. Přiwołany hajnik stary hornc z wosebitymi nožicami rozrěza a pušći sornika njezranjeneho na swobodu.

Budyšin (SN). Policija wostanje na Budyskich Žitnych wikach dale prezentna, zo by hrožacym zražkam mjez prawicarskimi ekstremistami a młodymi ćěkancami zadźěwała. Tole připowědźi policajski prezident Conny Stiehl na wčerawšim, mjeztym 4. Budyskim wjeršku, kotryž bě serbski zapósłanc CDU w Sakskim krajnym sejmje Marko Šiman zwołał. Wón kritizowaše, zo njeje Budyšin swoje při­lubjenja dotal spjelnił, wjace socialneho dźěła w problemowych kónčinach města organizować.

Dojednanje z Grjekskej

Valetta (dpa/SN). Po tydźenje trajacych jednanjach wo dalšej pjenježnej pomocy Grjekskej su dźensa rano prěnje konkretne wuslědki docpěli. Tole wobkrućichu wobdźělnicy jednanjow powěsćerni dpa. Nětko chcedźa financnych ministrow europasma­ informować. W srjedźišću jednanjow stejachu dalše lutowanske naprawy grjekskeho knježerstwa a reformy, kotrež sej pjenjezydawarjo wot Athena žadaja. Naprawy su wuměnjenje dalšeje pjenježneje pomocy.

Za dalše styki z Trumpom

Moskwa/Washington (dpa/K/SN). Raznje zasudźił je ruski prezident Wladimir Putin ameriske bombardowanje přećiwo syriskemu knježerstwowemu wójsku, mjenujo je nadpad na suwerenitu Syriskeje. „Prezident Putin ma amerisku ataku­ za agresiju přećiwo suwerenemu statej, přećiwo prawu ludow, a to hišće z wumysleneje přičiny“, praji rěčnik prezidenta Dmitrij Pjeskow. Syriske wójsko hižo žane chemiske brónje nima, štož je po jeho wotbrónjenju tež přisłušna mjezynarodna­ Organizacija za zakaz chemiskich­ bróni swój čas wobkrućiła.

Ruska je njesměrneje brizancy podawka dla za dźensa wurjadne schadźowanje Bjezstrašnostneje rady UNO zwołała. Nimo­ toho je jako reakciju na wójnske zasahnjenje Američanow, kotrež je sej po zdźělenju syriskeho wójska šěsć smjertnych woporow žadało, dojednanje z wójskom USA nastupajo zhromadne dźěło k zadźěwanju strašnych podawkow nachwilnje wusadźiło. Po hódnoćenju ruskeho wonkowneho ministerstwa je „njepřemyslene postupowanje“ USA syrisku krizu jenož pohłubšiło.