To a tamne (19.04.17)
Něhdźe 400 eurow je dotal njeznaty jutry w Konstanzu rozdźělował. Pjenjezy tčachu při woknach awtow abo w listowych kašćikach, policija zdźěli. Pjenjezy w hódnoće 20 a 50 eurow běchu ze symbolemi pomolowane, kotrež so tež w interneće wužiwaja. Policija nětko pruwuje, hač móhli pjenjezy z njeskutka pochadźeć. Dotal wšak žane pokiwy za to nimaja. W tym padźe směli wobdarjeni pjenjezy wězo wobchować, rěčnik zdźěli.
Preč ćisnjeny zbytk cigarety je w Koblencu tójšto mjerzanja zawinował. 41lětny šofer wosoboweho awta bě jón z wokna šnypnył. Myslo sej, zo je wětřik cigaretu na zadnju ławku awta stłóčił, so muž za njej wobhladowaše. Při tym zajědźe na prawy bok, zrazy do parkowaceho awta a je na před nim stejace awto suny. Wšitke tři awta dyrbjachu wotwlec. Policija trochuje škodu na 11 000 eurow.
May nowowólby připowědźiła
London (dpa/SN). Premierministerka Wulkeje Britaniskeje Theresa May je dźensa njejapcy nowowólby připowědźiła. Hižo jutře maja zapósłancy delnjeje komory wo tym wothłosować. Tuchwilu su nowowólby parlamenta hižo 8. junija planowane. Jako přičinu mjenuje May hrožacu njewěstosć. Wulka Britaniska trjeba krute a stabilne knježerstwo.
Z małej mzdu wysoki dawk
Berlin (dpa/K/SN). W Němskej płaći kóždy jědnaty dźěławy – 4,2 milionaj dźěłopřijimarjow – načolnu dawkowu sadźbu we wysokosći 42 procentow. Tole zdźěla nowina Handelsblatt, citujo z dotal njewozjewjeneje studije Kölnskeho instituta němskeho hospodarstwa. Studija znazornja tež, kak sylnje bywaja ći z dawkami poćeženi, kiž maja mału abo přerěznu zasłužbu. Singl z 1 900 eurami měsačnje dyrbi 46 procentow wotwjesć, tón z 3 250 eurami 51 procentow.
Přiběracy šrot w swětnišću
Něhdźe 150 ludźi je so wčera na jutrownym pochodźe w Choćebuzu ...
Erdoğan dobył
Přiměr na Ukrainje kruće dodźeržeć
Rozprawa: Lěto 2016 za mjeńšiny wuspěšne było
Berlin (SN). Zwjazkowy sejm je rozprawu społnomócnjeneho zwjazkoweho knježerstwa za narodne mjeńšiny Hartmuta Koschyka (CSU) wozjewił.
Rozprawa skići přehlad wo ćežišćach dźěła zwjazkoweho społnomócnjeneho na dobro mjeńšin a wusydlerjow w zašłym lěće. Zo je škit narodnych mjeńšin w Europje wažna naležnosć, pokazuje so mjez druhim w tym, zo je wonkowny minister Sigmar Gabriel (SPD) mjeńšinowu politiku jako jedne z ćežišćow za čas deklarował, jako bě Němska loni z předsydku Organizacije za wěstotu a zhromadne dźěło, Koschyk piše.
Hladajo na narodne mjeńšiny naliča rozprawa najwšelakoriše zarjadowanja a rozmołwy. „Lěto 2016 bě dosć wuspěšne. Móžu na wuspěchi a wjele dobrych přikładow poradźeneje integracije, sebjewědomja a dobreho dźěła zhladować. Dźakuju so wšitkim, kotřiž su so z wulkim angažementom za wusydlencow, wuhnatych a za narodne mjeńšiny zasadźowali. Bjez jich dźěła njeby tež moje dźěło wuspěšne było.“
To a tamne (18.04.17)
Kotre jejko je najtwjerdše? Tole bě hesło wubědźowanja na wikach w badensko-württembergskim Leutkirchu. Prawidła při tymle zarjadowanju su cyle jednore. Dwaj wobdźělnikaj bijetaj swojej warjenej jejce na hornim a delnim kóncu hromadźe. Jejko, kotrež njeje so rozbiło, je dobyło. Mjeztym maja wobdźělnicy wubědźowanja samo wěstu strategiju, kak swoje jejka wosebje twjerde zwarja.
Wosrjedź jutrownych prózdnin su młodostni w Münsteru ludźi na spontanu party do sportoweje hale přeprosyli. Do toho pak běchu so do njeje zadobyli. Za slědowacy swjedźeń žadachu sej samo zastup. Kedźbliwemu susodej bě skónčnje napadnyło, zo so sobotu wječor a w prózdninach njewšědnje wjele młodych ludźi na šulskim dworje zetkawa a tuž zawoła policiju. Zastojnicy ilegalne zarjadowanje zakónčichu.
Merkel kritizuje deficity
Berlin (dpa/SN). Zwjazkowa kanclerka Angela Merkel (CDU) je deficity w někotrych zwjazkowych krajach w boju přećiwo terorej kritizowała. Bohužel mamy „jara wšelaki niwow zakonjow w jednotliwych krajach“, rjekny Merkel nowinarjam. Kraje dyrbjeli na tym dźěłać, samsny wěstotny niwow docpěć. Tak njejsu prewentiwne naprawy, kaž wobkedźbowanje potencielnych teroristow, we wšěch zwjazkowych krajach dowolene.
Přećiwnicy w dźěle haćeni
Berlin (dpa/SN). Přećiwnicy wustawoweje reformy w Turkowskej dyrbja so we swojim wólbnym boju z masiwnymi haćenjemi a mylenjemi bědźić. Tole rjekny nowinarjam nawoda skupiny wólbnych wobkedźbowarjow Organizacije za wěstotu a zhromadne dźěło Michael Link. Tak je prawo zhromadźowanja po lońšim wojerskim puču chětro wobmjezowane. Tež rozprawnistwo njeje wuwažene. Nimo toho tójšto politikarjow w jastwje sedźi. Turkojo rozsudźa jutry njedźelu wo nowej wustawje, kotraž ma móc prezidenta Recepa Tayyipa Erdoğana zesylnić, prawa parlamenta pak w dalokej měrje wobmjezować.
Rekordny niwow pjenjez
