W dźěłowym kruhu chce SPD serbske temy rozjimać
Kamjenc (SN/at). SPD w Budyskim wokrjesu chce so we wobłuku dźěłoweho kruha ze serbskimi naležnosćemi zaběrać. Přeprošenje předsydkow městneju zwjazkow Kamjenc a Wojerecy Kathrin Michel a Margitty Albrecht kaž tež předsydow Budyskeho městneho a wokrjesneho zwjazka dr. Měrćina Krawca a Kevina Stanulle do Kamjenca je wčera dźesać wosobow, Němcow a Serbow, sćěhowało. Mjez nimi běštaj tež předsyda Domowiny Dawid Statnik a Harald Baumann-Hasske, zapósłanc Sakskeho krajneho sejma a jedyn z narěčenskeju partnerow frakcije SPD za serbske naležnosće.
Přitomni zwěsćichu, zo je trjeba so ze serbskimi prašenjemi na bazy rozestajeć. Tu zdobyte informacije móhli skutkowanje frakcije w krajnym sejmje, ale tež dźěło jako koaliciski partner w sakskim knježerstwje podpěrać, rozłoži šef SPD za město Budyšin a wokolinu dr. Měrćin Krawc na naprašowanje. „Chcemy so ze serbskimi temami zaběrać, je sćěhować, tež z hosćimi, zo njebychmy stajnje jenož w swójskim kruhu byli“, Krawc podšmórny.
Pola Lufthansy so dojednali
Frankfurt nad Mohanom (dpa/SN). Po lěta trajacym tarifowym konflikće z pilotami předewzaća Lufthansa je nětko k wujednanju dóšło. Dotal běchu piloća 14 króć dźěło złožili. We wšitkich dypkach su so piloća a Lufthansa ze zastupjerjemi dźěłarnistwa Cockpit dorozumili, zdźěli dźensa lětanska towaršnosć. Dojednanja wo mzdach a zawodnych rentach płaća hač do junija 2022.
Racija w Audi-centrali
Ingolstadt (dpa/SN). Mnichowske statne rěčnistwo je dźensa rumnosće centrale awtotwarca Audi přepytało. Pozadk toho je wotpłunowy skandal. Audi bě w USA dieselowe awta z ilegalnej software předawał, kotraž hódnoty wotpłuna pomjeńša. Njeposrědnje po wotkryću skandala w USA bě Mnichowske statne rěčnistwo pruwowanske jednanje zahajiło. Rěčnik koncerna Audi nochcyše so dotal k wumjetowanjam wuprajić.
16 miliardow eurow minusa
Něhdźe 850 předewzaćow po cyłej Sakskej tónle tydźeń za akciju ...
W Nižozemskej dźensa wola
Seehofer z wulkej delegaciju w Ruskej
Podpěra Delnim Serbam z Čěskeje
To a tamne (15.03.17)
24hodźinsku jězbu z awtom na so wzałoj staj čłonaj Domu reprezentantow USA, dokelž njemóžeštaj sylneho sněhowanja a wichora dla z lětadłom lećeć. Wostudło pak jimaj njebě, wšako wusyłaštaj swój roadtrip w interneće. Tak powědaštaj republikan a demokrat na 2 575 kilometrow dołhej jězbje wo politiskich temach, reagowaštaj na komentary a wotmołwještaj na prašenja zajimcow.
Zo prominentni přećiwo nowemu prezidentej USA wustupuja, njeje žane potajnstwo. Tajkej přećiwnikaj Donalda Trumpa staj mjez druhim filmowc Robert de Niro a spěwarka Madonna. A dalši so jimaj nětko přidruža, rap-spěwar Snoop Dogg. W scenje swojeho noweho hudźbneho wideja třěli wón z brónju na klawna, kiž je Trumpej podobny. Z brónje pak njewutřěli kulku, ale chorhojčku z napisom „Bang“.
Bamž anglikanow wopytał
Vatikan (B/SN). Jako prěni biskop Roma je bamž Franciskus anglikansku wosadu města wopytał. Gratulujo k 200lětnemu wobstaću zwurazni wón swoju nadźiju na ekumenu. „Druhdy móže puć k jednoće pomały a njewěsty być, tola z našeho zetkanja móžemy zmužitosć čerpać.“ Runočasnje swjaty wótc wobkrući, zo pruwuje móžnu jězbu z primasom anglikanow Justinom Welbyjom do Južneho Sudana.
Ćěkancow přiwzać
Waršawa (B/SN). Waršawski arcybiskop Kazimierz Nycz sej žada, zo ma Pólska ćěkancow ze Syriskeje přiwzać. Po terorowym nadpadźe w Brüsselu w měrcu 2016 je knježerstwo we Waršawje wozjewiło, zo hižo dalšich ćěkancow njepřiwozmje. Katolska cyrkej w Pólskej, kotrejž wjace hač 90 procentow ludnosće přisłuša, njeje dotal jeničku knježacu stronu Prawo a sprawnosć wotewrjenje kritizowała. Žadanje arcybiskopa Nycza je prěnje eksplicitne wuprajenje na temu migraciska politika w Pólskej.
Marshallowy plan podpěrać
Poleći hakle pjatk do USA
Berlin (dpa/K/SN). Kanclerka Angela Merkel (CDU) so nětko prěni raz z prezidentom USA Donaldom Trumpom zetka. To je rěčnik Běłeho domu připowědźił. Poprawom by so zetkanje dźensa wotměć dyrbjało, ale ameriska strona bě je sylneho sněhowanja a wichora na wuchodźe kraja dla přesunyła. Rěčeć chce Merkel z Trumpom wo poćahach USA z Němskej kaž tež z Europskej uniju jako partneromaj we wikowanju, we wěstotnych naležnosćach a w hódnotach.
Rubiško zakazać dowolene
Luxemburg (dpa/SN). Dźěłodawarjo smědźa po dźensnišim rozsudźe Europskeho sudnistwa sobudźěłaćerkam zakazać, na dźěłowym městnje rubiško nosyć. Wuměnjenje pak je, zo su tam swětonahladne znamjenja generelnje zakazane. Přeće kupca, zo njesmě žona z rubiškom za njeho dźěłać, pak za zakaz njedosaha. W Němskej je nošenje rubiška generelnje dowolene. Přiwšěm su w jednotliwych padach wobmjezowanja móžne, wo kotrychž ma so dokładnje wotwažować.
Inflacija přiběrała
