Zelenskyj: Połoženje wobćežne
Kijew (dpa/SN). Ukrainski prezident Wolodymyr Zelenskyj je po wopyće na fronće wojerske połoženje w potrjechenej kónčinje „jara wobćežne“ mjenował. Problemy maja Ukrainjenjo na wotrězkach fronty, hdźež Rusojo najwjetše rezerwy koncentruja, rjekny Zelenskyj w swojim wšědnym widejowym poselstwje. „Woni znjewužiwaja pobrachowacu pomoc na dobro Ukrainy.“ Zelenskyj wobžarowaše pobrachowacu municiju za artileriju, lětadła wotwobarace systemy a daloko sahace rakety. Kijew prócuje so doraznje wo dalšu wojersku pomoc zapadnych krajow, Zelenskyj swojim krajanam wobkrući. Hakle kónc tydźenja běchu so ukrainscy wojacy z města Awdijiwka wróćo sćahnyć dyrbjeli.
W Němskej chcedźa frakcije knježerstwoweje koalicije zwjazkowe knježerstwo namołwjeć, Ukrainje dalše brónje přewostajić. W tym zwisku rěča indirektnje wo němskich raketach typa Taurus, kotrež hač do 500 kilometrow daloko leća a kotrež móhli objekty daloko za ruskimi wojerskimi linijemi nadběhować.
Minister fregatu wopytał
Němska wójnska łódź „Hessen“ hotuje so na misiju w Čerwjenym morju
Souda (dpa/SN). Krótko do zahajenja strašneho zasadźenja němskeje fregaty „Hessen“ w Čerwjenym morju je zakitowanski minister Boris Pistorius (SPD) dźensa něhdźe 240 wojakow na łódźi wopytał. Minister je wčera wječor na kupu Kreta dolećał, hdźež je 143 metrow dołha wójnska łódź po puću z Wilhelmshavena do krizoweje kónčiny pozastała. Dyrbjał-li zwjazkowy sejm misiji kaž planowane pjatk přihłosować, chce so „Hessen“ hnydom po tym po Suezowym kanalu do Čerwjeneho morja podać.
Wonkowni ministrojo čłonskich statow EU běchu hižo wčera zelenu swěcu za operaciju „Aspides“ dali. Je to dotal najstrašniše zasadźenje mariny w stawiznach zwjazkoweje wobory. Prěnjotny nadawk misije je škit wikowanskich łódźow před nadpadami militantneje islamistiskeje milicy Huthi z Jemena. Milica chce sej z nadpadami na ciwilne łódźe kónc israelskich nadpadow na Gazaske pasmo wunuzować. Nastork wójny w Gazskim pasmje bě masaker islamistiskeje Hamas a druhich palestinskich skupin 7. oktobra 2023 w Israelu.
Ze samsnej měru měrić
Wustróžane reakcije na smjerć kritikarja Krjemla Alekseja Nawalnyja w jednym z ruskich chłostanskich lěhwow su dospołnje woprawnjene. Prezident Wladimir Putin opoziciju a wšěch, kotřiž njejsu jemu derje zmysleni, bjez hnady jako agentow a teroristow přesćěhuje. Kritiske medije su dawno womjelkli. Lisćina zasudźenych abo na mysteriozne wašnje zemrětych opozicionelnych je prosće předołha, hač zo by hišće něchtó do připada wěrić móhł.
Rozhorjenje zapada po smjerći Nawalneho je pak jenož potom wěrjomne, hdyž we Washingtonje, Brüsselu, Berlinje a druhdźe ze samsnej měru měrja. Tutón tydźeń rozsudźi sudnistwo w Londonje wo dóńće Juliana Assangea, kiž je wójnske złóstnistwa USA wotkrył. Za to chcedźa jeho w USA 175 lět do jastwa tyknyć a takrjec žiweho pohrjebać. Zwjazkowe knježerstwo měło sej wot USA žadać, zo Assangea dlěje njewobskorža. Hewak njewostanje žałosćenje Nawalnyja dla ničo druhe hač falšne. Marko Wjeńka
Woheń pizzy dla
To a tamne (20.02.24)
Něhdźe 60 000 litrow drohotneho wina w hódnoće 2,5 milinow eurow rozkidał je njeznaty w španiskej winicarni. Pozdatny sabotažny njeskutk sta so w nocy na njedźelu w Castrillo de Duero, 150 kilometrow sewjernje stolicy Madrida. Nahrawanja wěstotnych kamerow pokazuja, kak so zakukleny njeznaty w nocy do pincy zadobudźe a cyle zaměrnje honače pjeć hoberskich winowych tankow wotwjertnje. Wočiwidnje je so skućićel w pincy derje wuznawał. Wobsedźer winicy móhł sej myslić, štó je jemu to načinił, nochce pak nikoho wobwinować.
Paduchow pyšneho kobołka (Bärlauch) je policija w Lipšćanskim łučinowym lěsu lepiła. Tři žony a dwaj mužej běchu wjace hač 50 kilogramow kobołka wuryli. Jich wočakuje chłostanje. Pyšny kobołk je woblubowana rostlina, smě pak so jenož w snadnych mnóstwach žnjeć.
Biskopka poradźuje bamža
Vatikan (B/SN). Anglikanska biskopka Jo Bailey Wells je kardinalnej radźe we Vatikanje wospjet wo „nazhonjenjach ze swjećiznu žonow w jendźelskej cyrkwi rozprawjała, a bamž a jeho poradźowarjo su kedźbliwje připosłuchali“. Po jeje měnjenju bě bamž Franciskus na minjenym posedźenju spočatk februara diakonatej žonow wotewrjeny.
Metropolita wupokazali
Tallinn (B/SN). Hłowa ortodoksneje cyrkwje w Estiskej, metropolit Eugenij Rešetnikow, je wospjet rusku wójnu přećiwo Ukrainje zjawnje wusprawnjał. Knježerstwo Estiskeje je tuž metropolita nućiło, kraj wopušćić. Dowolnosć přebywanja w Estiskej je za 66lětneho staćana Ruskeje 6. februara wotběžała a njebu podlěšena. Metropolit Eugenij pak wostanje dale hłowa tamnišeje cyrkwje.
Přichod měšnistwa
Zelenskyj z podpěru spokojom
Kijew (dpa/SN). Ukrainski prezident Wolodymyr Zelenskyj je spokojny z Mnichowskeje wěstotneje konferency wotjěł. „Naš ukrainski wid na globalne wuwiće su partnerojo na europskej runinje podpěrowali“, rjekny Zelenskyj w swojim wšědnym widejowym poselstwje. W rozmołwach běchu jemu w Mnichowje stajnje zaso podpěru w boju přećiwo ruskim nadpadnikam přilubili, wón rjekny. Połoženje na frontach pokazuje, „zo dyrbi bój přećiwo Ruskej dale hić“.
Wuradźuja z von der Leyen
Berlin (dpa/SN). Předsydstwo CDU je dźensa dopołdnja w Berlinje zhromadnje z prezidentku komisije EU Ursulu von der Leyen wuradźował. Wobkedźbowarjo wočakowachu, zo rěča mjez druhim wo móžnej dalšej dobje zastojnstwa von der Leyen na čole komisije EU. Předsydstwo CDU dyrbi ju europskej stronskej swójbje EVP formelnje jako kandidatku namjetować. Doba namjetowanja móžnych kandidatow so srjedu skónči.
Putin: Ukraina přewšo wažna
