Dale antižidowske předsudki

srjeda, 11. meje 2022 spisane wot:

Přepytowanje wunjese razne nastajenje mjez muslimami a w rjadach AfD

Berlin (dpa/SN). Byrnjež wulka wjetšina ludźi w Němskej antisemitizm jako problem wobhladowała, su antižidowske předsudki po najnowšim přepytowanju dale jara rozšěrjene. To płaći za muslimow bóle hač za druhe skupiny woby­dlerstwa, kaž woprašowanje instituta ­Allensbach w nadawku American Jewish Committee (AJC) wunjese. Při předstajenju wuslědkow wčera w Berlinje zasadźowaše so społnomócnjeny zwjazkoweho knježerstwa za bój přećiwo antise­mitizmej Felix Klein za naprawy přećiwo hidy Židam napřećo předewšěm w mošejach. Tež přiwisnicy AfD zwuraznjeja wosebje často antižidowske předsudki.

Za studiju je so AJC w decembru a januaru 1 025 němskorěčnych ludźi nad 18 lětami a 561 němskorěčnych muslimow nad 18 lětami woprašeć dało. Po tym ma šěsć wot dźesać woprašanych antisemitizm w Němskej za daloko rozšěrjeny fenomen. Nimale dwě třećinje stej sej wěstej, zo je problem minjene dźesać lět přiběrał. Mjez woprašanymi muslimami ma 53 procentow problem za dale a wjetši.

Tunja jězdźenka ničo za wsy

srjeda, 11. meje 2022 spisane wot:

Berlin (dpa/SN). Wot junija hač do awgusta planowana měsačna jězdźenka za dźewjeć eurow za busy a železnicy budźe po měnjenju sejma němskich wokrjesow w prěnim rjedźe na dobro ludźi we wulkich městach. Jako naprawa, kotraž ma něhdyšich a nowych wužiwarjow zjawneho bliskowobchada zdobyć, je zniženje tarifow we wjesnych kónčinach lědma kmane, rjekny prezident Reinhard Sager wčera w Berlinje. Akcija je časowje wobmjezowana a njewjedźe k rozšěrjenju poskitka. Lěpje by było, planowane miliardy za wutwar syće čarow a za krótše wotstawki mjez jězbami nałožować.

Wurjadna jězdźenka ma wot 1. junija po wšej Němskej jězby w blisko- a regionalnym wobchadźe zmóžnić – za dźewjeć eurow, a tak wo wjele tuńšo hač z normalnym měsačnym tiketom. To ma dźěl paketa amploweje koalicije k podpěrje ludźi drohich płaćiznow energije dla być. Runočasnje chcedźa ludźi po tutym puću pohnuć, zaso wjace z busami a železnicu jězdźić. Zwjazk poskitk financuje a přewostaja zwjazkowym krajam 2,5 miliardow eurow za wupadnjene dochody w zjawnym bliskowobchadźe.

To a tamne (11.05.22)

srjeda, 11. meje 2022 spisane wot:

Wotpinjeneje miliny dla byštej so sotře w Indiskej bjezmała na wopačneho muža wudałoj. Žonje běštej na zhromadnej hosćinje samsnu njewjesćinsku drastu woblečenej. Jako nadobo milina wupadny, přewjedźeštej žonje wšelake kwasne wobrjady z wopačnym mužom. Hakle, jako so swěcy zaso zaswěćichu, swójby misnjenje widźachu. Duchowni na to kwasne wobrjady wospjetowachu – tónkróć w prawej zestawje.

Dospołnje nahi a k tomu hišće pjany šofer wosoboweho awta je w Dobrjoługu-Góstkowje (Doberlug-Kirchhain) na juhu Braniborskeje zasadźenje policije zawinował. Policistam wón napadny, dokelž jědźeše přespěšnje po seklojtej čarje a na signale zastojnikow njereagowaše. Hakle z pomocu hozdźikoweje deski móžachu jeho zadźeržeć. Drasty namakachu w kófrowej rumnosć. Test wunjese 1,62 promilow.

Žadataj sej přiměr w Ukrainje

wutora, 10. meje 2022 spisane wot:

Berlin (dpa/SN). Zwjazkowy kancler Olaf Scholz (SPD) a runje znowa wuzwoleny francoski prezident Emmanuel Macron žadataj sej zhromadne konkretne kročele do směra na přiměr w Ukrainje. „Štož chcemy docpěć, je přiměr, tak spěšnje kaž móžno“, rjekny Macron w Berlinje. „Jenož tak móža so jednanja mjez Ukrainu a Ruskej zakónčić, zo bychmy měr a cofnjenje ruskich jednotkow docpěli. To je naš zaměr.“ Ukrainje pak njesměli žadyn diktat nanuzować.

Mjeza bórze překročena

Genf (dpa/SN). Globalna přerězna temperatura lěta móhła hižo hač do 2026 prěni króć mjezu 1,5 stopnjow přirunujo z niwowom časa do industrializacije překročić. Tole je swětowa wjedrowa organizacija WMO dźensa w Genfje zdźěliła. To wšak njerěka, zo je mjeza potom dołhodobnje překročena, dokelž móže so wona tež zaso znižić. Powšitkownje pak ­wočakuja dale přiběrace temperatury w přichodnych lětach. Kraje běchu so w klimowym zrěčenju 2015 w Parisu zawjazali, mjezu 1,5 stopnjow dodźeržeć.

Wjace politiskich deliktow

W Awstriskej je wčera při železniskim njezbožu njedaloko Wiena jedyn ze sobujěducych žiwjenje přisadźił. Po prěnich informacijach je wagon z kolijow wuskočił a so zwróćił. Dwě wosobje so ćežko zraništej, jědnaće ludźi snadnje. Njezranjenych pasažěrow dowjezechu do centruma katastrofoweho škita. Přičinu njezboža dotal hišće njeznaja. Foto: dpa/Thomas Lenger

Zakoń za wjace bróni podpisał

wutora, 10. meje 2022 spisane wot:
Washington (dpa/SN). Prezident USA Joe Biden je wčera zakoń podpisał, kotryž zmóžnja spěšniše dodawanje bróni do Ukrainy a druhich wuchodoeuropskich krajow. Biden rěčeše wo „wažnym instrumenće k podpěrje ukrainskeho knježerstwa a ukrainskeho ludu k zakitowanju swojeho kraja a demokratije“ přećiwo wójnje ruskeho prezidenta Wladimira Putina. „Kóšty boja njejsu snadne. W boju popušćić pak by hišće dróše było.“ Ukrainski prezident Wolodymyr Zelenskyj reagowaše zwjeseleny na podpisanje zakonja a rěčeše wo „historiskej kročeli“. Zakoń dawa prezidentej USA prawo, Ukrainje a druhim wuchodo­europskim krajam, kotrež su wot ruskeho nadpada potrjechene, wojerski material požčić abo přenajeć. Podobny zakoń bě kongres USA w lěće 1941 schwalił. Wón dowoleše Americe, wojerski material we wulkich mnóstwach dodawać.

Baerbock do Ukrainy dojěła

wutora, 10. meje 2022 spisane wot:
Kijew (dpa/SN). Zwjazkowa wonkowna ministerka Annalena Baerbock je dźensa jako prěni sobustaw zwjazkoweho knježerstwa po zahajenju ruskeho nadpada na Ukrainu stolicu Kijew wopytała. Politikarka Zelenych informowaše so na spočatku swojeho wopyta wo połoženju w měsće Buča, hdźež běchu po cofnjenju ruskich jednotkow wjace hač 400 morjenych našli. W běhu dnja wočakowaše ju wonkowny minister Dmytro Kuleba. Minjeny kónc tydźenja bě prezidentka zwjazkoweho sejma Bärbel Bas Ukrainu a stolicu Kijew wopytała.

Ruske rakety měrja so na Odessu

wutora, 10. meje 2022 spisane wot:
Kijew (dpa/SN). Při ruskich raketowych nadpadach na ukrainske přistawne město Odessa je znajmjeńša jedyn z woby­dlerjow žiwjenje přisadźił, pjeć ludźi je so zraniło. Tole rozprawja powěsćernja Unian, po informacijach wójska. „Njepřećel psychologiski ćišć dale wukonja a ze swojimi hysteriskimi nadpadami přećiwo měrniwym ciwilistam a ciwilnej infrastrukturje pokročuje“, w zdźělence rěka. W měsće běchu wjacore detonacije słyšeć. Po informacijach medijow su ruske rakety mjez druhim nakupowanski centrum a skład tworow trjechili. Město na juhu Ukrainy je wot minjeneje soboty cil zesylnjenych ruskich raketowych nadpadow. Wčera popołdnju su wjacore ruske rakety za čas wopyta prezidenta Rady EU Charlesa Michela do města zrazyli. Wón dyrbješe so z ukrainskim ministerskim prezidentom w škitnych rumnosćach schować. „To je woprawdźite nastajenje Ruskeje k EU“, komentowaše prezident Wolodymyr Zelenskyj.

Mjeńšiny trjebaja připóznaće

wutora, 10. meje 2022 spisane wot:

Prezident FUEN Loránt Vincze Europsku uniju raznje kritizował

Wien (SN/JaW). „Ethniske mjeńšiny w Europje su zanjechana skupina a njeje polěpšenje połoženja zwěsćić.“ To rjekny prezident Federalistiskeje unije europskich narodnych mjeńšin FUEN Loránt Vincze na njedawnym regionalnym forumje Zjednoćenych narodow za mjeńšinowe naležnosće we Wienje.

Prašenju, hač je so za mjeńšiny w Europje w minjenych 30 lětach něšto polěpšiło, je so wón wědomje wěnował. Před 30 lětami wšak bu „Stejišćo UN wo prawach wosobow, kiž narodnym abo etniskim, nabožnym a rěčnym mjeńšim přisłušeja“ schwalene. A nic jenož tónle wažny dokument bu w 1990tych lětach wobzamknjeny. Vincze skedźbni na Europsku rěčnu chartu a ramikowe dojednanje wo narodnych mjeńšinach Europskeje rady. „Mjeńšiny trjebaja připóznaće, přiměrjeny prawniski ramik a jeho nałožowanje. Někotre staty pak maja město toho jenož nadknjejstwo a asimilaciju w poskitku“, wón šwikaše.

Mjenje alkohola?

wutora, 10. meje 2022 spisane wot:
Wiesbaden (dpa/SN). W prěnim lěće ­pandemije je so ličba dźěći, młodostnych a młodych dorosćenych z akutnym alkoholowym zajědojćenjom jasnje pomjeń­šiła, zdźěli minjeny pjatk Zwjazkowy sta­tistiski zarjad ze sydłom we Wiesbadenje. Něhdźe 12 200 padow starobneje klasy 12 do 19 lět dyrbjachu w lěće 2020 stacionarnje w chorownjach zastarać, štož je 40 procentow mjenje hač lěto do toho. Tež padow w tamnych starobnych skupinach bě mjenje. Přiwšěm je niwow přirunujo z lětom 2000 jara wysoki. Bě jich před wjace hač dwaceći lětami hišće něhdźe 54 000 padow registrowachu 2020 74 000 padow. Riziko zajědojćenja z alkoholom pola młodostnych běše w lěće 2020 najwyši, rozłoži zwjazkowy statistiski zarjad. Pola 15- do 19lětnych zwěsćichu z 254 ­padami na 100 000 wobydlerjow najwyšu hódnotu wšitkich starobnych skupin. W starobje 50 do 54lětnych běchu to ­porno tomu 126. Něhdźe 54 300 muži dyrbješe zajědojćenja dla do chorownje, 71,2 procentaj wšěch tajkich padow. Předewšěm w starobnej ­klasy 60 do 64 lět je nadwaha muži ze zajědojćenjom alkohola dla jasnje spóznać. W starobnej klasy 10- do 14lětnych je podźěl žonow z 61 proc. wyši hač tón muskich.

nawěšk

nowostki LND