New York (dpa/SN). Hłowna zhromadźizna UNO je sej znowa hnydomny a trajacy přiměr bjez wuměnjenjow w Gazaskim pasmje žadała. Němska hłosowaše ze 148 dalšimi čłonskimi krajemi w New Yorku za rezoluciju. Dwanaće krajow bě přećiwo tomu, mjez nimi USA a Israel. W dokumenće žadaja sej mjez druhim pušćenje zastajencow z rukow islamistiskeje Hamas a humanitarnu pomoc za ciwilnu ludnosć w Gazaskim pasmje.

Rezolucije UNO njejsu zawjazowace, maja pak wulki symboliski wuznam. Hłowna zhromadźizna je po zahajenju wójny w Gazaskim pasmje w oktobru 2023 hižo wjacore rezolucije schwaliła.

Humanitarne połoženje w Gazaskim pasmje so dale přiwótřa. Po najnowšich informacijach medijow je tam telekomunikaciska syć wupadnyła. Tuchwilu nimaja žadyn zwisk k pomocnym organizacijam. Tež wažne informaciske styki k ciwilnej ludnosći su přetorhnjene.

Teheran (dpa/SN). Israelske wójsko je prěnje truty z Irana wottřěliło. Iran bě truty bjezposrědnje po israelskim nadpadźe dźensa rano do směra na Israel startował. Po informacijach wójska bě dopołdnja něhdźe sto iranskich trutow po puću do Israela.

Iran je mjeztym wobkrućił, zo je mjez smjertnymi woporami dźensnišeho israelskeho nadpada tež šef generalneho staba iranskeho wójska, generalny major Mohammed Bagheri. Nimo njeho je Israel tež dalšich iranskich oficěrow morił, mjez nimi komandera mócnych rewoluciskich gardow Hesseina Salamija. Toho naslědnika su hižo powołali. Israel twjerdźi, zo su so iranskemu nadpadej wobarali, kiž bě přichodne dny planowany.

Teheran (dpa/SN). Israel je z wobšěrnej wojerskej akciju atomowe objekty Irana nadběhował. Zasadźenje je „prewentiwna, dokładna a kombinowana ofensiwa přećiwo iranskemu atomowemu programej“, israelske wójsko zdźěla. W Teheranje běchu razne detonacije słyšeć. Z Israelom wusko splećene USA njeběchu po informacijach knježerstwa we Washingtonje na nadpadźe wobdźělene.

Wonkowne ministerstwo Irana je israelski nadpad najwótrišo zasudźił. Je to jasne ranjenje charty UNO, rěka w zdźělence ministerstwa. Iran budźe wotpowědujo swojemu prawu na zakitowanje wojersce wotmołwić, w Teheranje zdźělichu. Zdobom wumjetuje Iran knježerstwu USA, zo je za nadpad sobu zamołwite, dokelž njebychu tajke akcije bjez dowolnosće USA móžne byli. Wočakujo wojersku reakciju Irana je zjawne žiwjenje w Israelu dźensa w dalokej měrje zlemjene. Šule, wobchody a zarjadnišća wostachu zawrjene, zjawne zarjadowanje buchu wotprajene. Wobydlerjow namołwja, blisko škitnych bunkrow wostać.

Lipsk (dpa/SN). Města a gmejny Sakskeje žadaja sej wurunanje za swoje kóšty a strukturnu reformu. „Trjebamy nowy rozmach“, rjekny prezident sakskeho zwjazka městow a gmejnow, Bert Wendsche po čłonskej zhromadźiznje w Lipsku. Za to měli so procesy pospěšić, bě­rokratija wottwarić a komunalne samozarjadnistwo wožiwić. Žiwa domizna nastawa tam, hdźež ludźo zamołwitosć přewozmu, wón rjekny.

Zwjazk městow a gmejnow chce we wobłuku wobšěrneje strukturneje reformy winowatostne nadawki komunow na nuznje trěbnu měru wobmjezować a předpisy a měritka znižić. W tymle prašenju su sej komuny Sakskeje přezjedne, Lipšćanski wyši měšćanosta Burkhard Jung zdźěli. „Mnozy maja zaćišć, zo druzy nad hłowami komunow postajeja. To je tež prašenje dowěry“, tak Jung.

Loni bě so w komunach deficit 691 milionow eurow nakopił, najwyši po lěće 1990, tak Wendsche. Njeje to nachwilna słabosć, ale hłuboki strukturny deficit, kiž powšitkownu naladu w městach a gmejnach wotbłyšćuje. Tuž je masiwna pomoc swobodneho stata trěbna.