Přewrót Trumpa euforiju zbudźił
New York (dpa/SN). Njewočakowany přewrót prezidenta USA Donalda Trumpa w prašenju cłow je wiki akcijow wčera wječor na dotal hišće njeznate wašnje wožiwił. Centralny indeks Dow Jones Industrial je straty minjenych dnjow w běhu někotrych mjeńšin wurunał. Tež druhe předewzaća zaso jasnje přidobychu, štož zbudźi hotowu euforiju. Trump bě do toho – hladajo na masiwne turbulency na financnych wikach, swoje runje hakle wukazane cła za 90 dnjow zaso zběhnył. Nětko płaći cło dźesać procentow. Wot wolóženja wuwzata je China. Za importy z Chiny do USA žadaja sej mjeztym hač do 125 procentow cła. China porno tomu žada sej za twory, kotrež z USA do Chiny přiwjezu, 84 procentow.
Trump wopodstatni swoju rigidnu politiku z tym, zo nima China za swětowe wiki „dosć respekta“. Do toho bě China připowědźiła, zo chcyła z USA „hač do kónca wojować“.
China je tež Europskej uniji wažny partner. Přiwšěm EU wjace tworow wot tam importuje hač sama předawa.
Kretschmer: Nowy rozmach
Po předstajenju koaliciskeho zrěčenja mjez CDU/CSU a SPD w Berlinje
Berlin/Drježdźany (dpa/SN). Sakski ministerski prezident Michael Kretschmer (CDU) je sej wěsty, zo so wuchodna Němska we wčera předstajenym koaliciskim zrěčenju mjez CDU/CSU a SPD derje zastupuje. „Mamy wulku podpěru a wulke zhromadne zrozumjenje za to, zo trjebamy druhi wuchodny rozmach“, rjekny Kretschmer na swojim wopyće w Kairu.
Nowy kraje maja při wšěm hišće někotre problematiki, mjez druhim wutwar infrastruktury do směra na Čěsku a Pólsku, štož je so 35 lět zanjechało. W hospodarskej politice měło so tójšto změnić, wosebje to, štož wuchod dale doprědka přinjese. Kretschmer připowědźi mudre instrumenty za dobyće fachowcow za wuchodne kraje, w kotrychž je demografiske wuwiće wobćežne.
Koaliciske zrěčenje ma Kretschmer za změnu časow. „Nowe knježerstwo zahaji změnu politiki“, wón rjekny. Ličby migrantow bórze woteběraja. Nimo toho su so na to dojednali, zo płaćizny energije spaduja, štož hospodarstwo za rozmach nuznje trjeba.
Jedna sada ma dosahać
Na lětanišću liča z nawalom ludźi
Schönefeld (dpa/SN). Přichodny tydźeń započnu so jutrowne prózdniny w Berlinje a Braniborskej. Tohodla wočakuja zamołwići lětanišća stolicy BER něhdźe 1,2 milionaj pasažěrow. Wosebje na jutrownym kóncu tydźenju budu terminale chětro połne, wobhospodarjenska towaršnosć zdźěla. Jeničce mjez ćichim pjatkom a jutrownej póndźelu wočakuja 300 000 pućowacych.
Dźakowano nowym scanneram w terminalu 1 njezhubja ludźo nětko wjace telko časa při wěstotnych kontrolach. Elektroniske nastroje a napoje ludźo potom wjace wupakować njedyrbja. Wob hodźinu móža tam wo połojcu wjace pasažěrow kontrolować, BER zdźěla.
W južnym dźělu hłowneho terminala hač do prózdnin nowe scannery CT zatwarja. Nastroje nastajeja hižo wot kónca 2024. Po prózdninach wosom dalšich kontrolnych pasmow w sewjernym dźělu z nimi wuhotuja. W terminalu 2 scannery hižo wot spočatka lońšeho lěta wužiwaja. Tam je čas čakanja widźomnje woteběrał. Při wšěm wobmjezowanja dale płaća: W bleškach smě maksimalnje sto mililitrow być, cyłkownje nic wjace hač liter.
Železnica zaso w parku po puću
Tematizuja ludomordarstwo
Berlin (dpa/SN). Dźiwadło Maxima Gorkija w Berlinje chce so w ramiku festiwala z masakrom na Armenjanach před 110 lětami zaběrać. Na programje měsac trajaceho rjada zarjadowanjow „100 + 10 – Armenian Allegories“ steji mjez druhim wustajeńca z wjace hač 70 dźěłami tworjaceho wuměłstwa, tak dźiwadło zdźěla. Nimo toho planuja literarne a filmowe wjerški, hóstne hry z Amsterdama, Jerewana, Istanbula a Göteborga a dwě prapremjerje. W srjedźišću steja armenscy wuměłcy ze wšeho swěta a jich wid na tuchwilne politiske wobstejnosće hladajo na podawki lěta 1915.
Festiwal přewjedu wot 24. apryla hač do 31. meje a je zdobom zazběh mjeztym sedmeho wudaća wuměłskeho formata Berlinski nazymski salon.
Stawiznarjo zwěsćichu, zo su tehdy něhdźe 1,5 milionow Armenjanow w Osmanskim mócnarstwje systematisce morili. Běše to sćěh Prěnjeje swětoweje wójny. Turkowska jako prawniski naslědnik Osmanow drje masaker 500 000 ludźi přiznawa, jeho zastopnjowanje jako morjenje ludu pak wotpokazuje. Němska bě masaker 2016 jako genocid zasudźiła.
To a tamne (10.04.25)
Na priwatnu rozmołwu we Vatikanje witał je bamž Francisku wulkobritaniskeho krala Charlesa II. a toho mandźelsku kralownu Camillu. Britiski kralowski por je tuchwilu na statnym wopyće w Italskej. Franciskus gratulowaše woběmaj k 20. kwasnemu dnjej. Charles přeješe Franciskusej bórzomne wustrowjenje.
Legalnu plantažu cannabisa zničiła je policija w sewjerorynsko-westfalskim Hagenje. Nětko ju potrjecheni ze žadanjom za zarunanjom konfrontuja. Cannabisowy klub wočakowaše wot swojich 900 młodych rostlinow 45 kilogramow konopje, štož wotpowěduje 270 000 euram. Policija bě při přepytowanjach přećiwo wikowarjej drogow twarske podłožki namakała, kotrež zastojnikow k plahowarni wjedźechu. Policisća běchu sej wěsći, zo steja před profesionalnej ilegalnej plantažu a hnydom wšitke rostliny zničichu.
Spěšnišo so z wučerjom stać
Drježdźany. W powołanskošulskim centrumje za techniku a hospodarstwo w Freibergu (BSZ) wupruwuje Sakske kultusowe ministerstwo nowy a spěšny kubłanski puć za wučerjow w MINT-wobłuku. Wot přichodneho šulskeho lěta móža tu absolwenća wyšich šulow kaž tež wukubłani fachowi dźěłaćerjo fachowu maturu złožić. Wona je zakład za požadanje wo přirodowědny bachelorowy studij w MINT-předmjetach. Přichodni wučerjo zalutuja tak hač do 2,5 lět porno dotalnym studijnym móžnosćam.
Dalše miliony komunam
Drježdźany (dpa/SN). Sakske komuny přijimaja hač do lěta 2031 něhdźe 129 milionow eurow spěchowanskich srědkow za twarske naprawy w městach. Sakske krajne knježerstwo je wčera wotpowědnemu dojednanju mjez Zwjazkom a krajemi přihłosował. Ministerka za infrastrukturu Regina Kraushaar (CDU) na to pokaza, zo je Sakska wot lěta 1991 něhdźe 6,5 miliardow eurow za wotstronjenje twarskich njedostatkow dóstała.
Sudnik za nawrót nowinarjow
Wot truta nahrawane foto dokumentuje rozměr njezboža w Santo Domingo ...
Wotpokazuja naprawy kultusa
Lipsk (dpa/SN). Tójšto ludźi je wčera w Lipsku přećiwo kubłanskemu paketej sakskeho kultusoweho ministerstwa protestowało. Kaž rěčnik dźěłarnistwa za kubłanje a wědomosć zdźěli, je so něhdźe 1 500 demonstrantow před krajnym šulskim zarjadom zhromadźiło. Centralne žadanje bě „woprawdźite polěpšenje dźěłowych wuměnjenjow“, město krótkodobnych nuzowych rozrisanjow na njedobro wučerjow a kwality kubłanja.
Naprawy potrjechja wosebje staršich wučerjow. Woni maja přichodnje wjace hodźin wuwučować. Dotal su staršim kolegam wot 60. žiwjenskeho lěta kóždolětnje hodźinu spušćili. Tute rjadowanje ma po woli ministerstwa nětko hakle wot 63. žiwjenskeho lěta płaćić.
