Tójšto fanow kopańcy wuži sobotu wosebitu składnosć kónca tydźenja a dojědźe sej do Kulowa. Tam swjećeše sportowe towarstwo DJK Módro-běli Kulow swój 100lětny jubilej z přećelskej hru přećiwo třećemu ligistej FC Energiji Choćebuz. Duel, kotryž steješe pod hesłom „Módro-běli zetkaja čerwjeno-běłych“, bě za hosćićelow wjeršk jubileja.

Wulke předwjeselo knježeše do podawka w Kulowje. Detlef Scholze, wiceprezident DJK Módro-běłych Kulow, wuzběhny wuznam hry za towarstwo a hrajerjow: „To je highlight towarstwoweho jubilejneho kónca tydźenja a absolutny wjeršk za koparjow našeho cyłka.“ Wón doda, zo drje běchu přihoty za jubilej napinace byli, tola rozmołwy z nawodami Energije Choćebuz běchu na zbožo njekomplikowane a derje rjadowane. „To je prosće wjeselo wobradźało“, tak Scholze.

FSV Luty II –

SJ Njebjelčicy 0:11 (0:4)

Zestawa SJ Njebjelčicy: D. Weclich – D. Kral, Reineke, Schulze, Heymann, P. Hrjehor, F. Hrjehor, Čornak (25. Hahn), Lehmann, Bjeńš, O. Domš  

K zakónčacej hrě sezony nastupi mustwo SJ Njebjelčicy přećiwo poslednjemu tabulki we Łutach. Při tutym zetkanju dźěše jenož hišće wo to, hrajnu dobu derje zakónčić a sej z dobyćom třeće městno zawěsćić. Wulkotnje motiwowachu hrajerjow SJN swójscy fanojo, kotřiž běchu sej we wulkej ličbje do Łutow dojěli. W Njebjelčicach přebywaše cyły kónc tydźenja partnerske sportowe towarstwo z čěskeho Roztoky. Tež ći Njebjelčanow we Łutach podpěrachu.

Před połdra tydźenjom wotmě so na Chróšćanskim sportnišću wulki sportowy swjedźeń z něhdźe 300 šulerkami a šulerjemi zakładnych šulow Chrósćicy, Pančicy-Kukow a Worklecy.

Zarjadowanje wotmě so we wobłuku swjedźenskeho tydźenja składnostnje jubileja 800 lět Chrósćicy. Wokrjesny sportowy zwjazk je zarjadowanje sobu organizował a nimo zabawneho sportoweho dnja kwalifikaciju za Němske sportowe znamješko zmóžnił. Jednotliwe sportowe stacije běchu tak natwarjene, zo móžachu so wšitke discipliny přewjesć, kiž su za sportowe znamješko trěbne: běh na 800 metrow (za wutrajnosć), skakanje z powjazom a dalokoskok (za koordinaciju), mjetanje bulikow a dalokoskok z městna (za mocy) kaž tež sprint na 30 metrow (za spěšnosć). W kóždej disciplinje so najlěpše wuslědki při hódnoćenju wobkedźbuja a ze štyrjoch kategorijow wuńdźe na kóncu sportowe znamješko w bronzy, slěbru abo złoće.