Sakske finale w lochkoatletice

wutora, 18. julija 2017 spisane wot:

Minjeny měsac startowachu lochkoatletki Serbskeho gymnazija Budyšin prěni raz w sakskim finalu. Hižo wobdźělenje w Kamjenicy je wusahowacy wukon hladajo na to, zo z nich žana w sportowym zjednoćenstwje jednotliwe discipliny lochkoatletiki njetrenuje.

Naše sportowče, kotrež wudobychu sej w sakskim finalu njedźakowne a přiwšěm wulkotne štwórte městno, su tež w kopańcy, volleyballu, beachvolleyballu, mjetańcy a rejowanskich skupinach jara wuspěšne.

Z 1,40 m we wysokoskoku nastaji Tadeja Šeferec wosobinski rekord. Škoda, zo njezamóchu wšitke serbske lochko­atletki swoje wosobinske najlěpše časy a dalokosće w Kamjenicy pokazać. Při­wšěm bě wubědźowanje jim wšěm rjane nazhonjenje. Gabriela Jendrewscyna

Wojuje wo stajne městno

wutora, 18. julija 2017 spisane wot:

W Njebjelčicach bě Jonas Krawčik, čłon nětčišeje Serbskeje koparskeje wubranki, z kopańcu započał, pola Budissy Budyšin a wosebje pola Dynama Drježdźany je so dale wukmanjał. Po změnje k FC Hornjej Łužicy Neugersdorf hraje Njebjelčan wot noweje sezony 2017/ 2018 zaso za Budissu Budyšin. Tadej Cyž, tohorunja z Njebjelčic, je so z Jonasom Krawčikom rozmołwjał.

Jonaso, po tym zo sy k Budissy Budyšin přišoł, su hižo někotre tydźenje zašli. Połojca přihotowanskeho časa je nimo. Sy dotal spokojom?

J. Krawčik: Sym so tu wot wšeho spočatka derje čuł. Mamy jara młode mustwo a hajimy přijomnu zhromadnosć. Pozitiwne tež je, zo sym w přihotowanskim času dotal bjez zranjenja.

Na kotrej abo kotrych pozicijach je će trenar Torsten Gütschow w testowych hrach zasadźił?

J. Krawčik: Sym fleksibelny, sym pak hłownje na lěwym abo prawym ofensiwnym křidle hrał.

Prěnja dypkowa hra budźe hnydom derby přećiwo FC Hornjej Łužicy Neugersdorf. To je za tebje zawěsće wosebita hra!

Budissa so přećiwnika njebojała

wutora, 18. julija 2017 spisane wot:
Franz Pfanne (naprawo, Budissa Budyšin) přesadźi so w hrajnej scenje na wobrazu přećiwo Alexanderej Ludwigej (nalěwo, Čerwjeno-běli Erfurt). Łužiscy hrajerjo su přećiwo zastupjerjej třećeje ligi w testowej partiji porjadny wukon pokazali a jenož 1:2 podleželi. Koparsku hru we wobłuku treningoweho lěhwa we Weißenseeju je něhdźe 300 ludźi widźało. Foto: Torsten Zettl

Serbski koparski sudnik Michał Neter je jako referee do zwjazkoweje koparskeje ligi młodźiny B a do krajneje ligi muži postupił. Šuler Serbskeho gymnazija Budyšin je nimo Matijasa Krala dalši serbski sudnik, kiž nawjeduje hry w najwyšej lize Sakskeho koparskeho zwjazka. Tež serbska sudnica Lea Krječmarjec smě nětko klasu wyše sudźić – gymnaziastka postupi do wokrjesneje ligi.

Zapadołužiski koparski zwjazk informuje hišće wo dalšich sudnikach, kotřiž su na jeho teritoriju zasadźeni. Do regionalneje ligi postupi Richard Hempel, ze Schleswigsko-Holsteinskeje přińdźe do krajneje ligi Sakskeho koparskeho zwjazka Kevin-Coren Eckert, w krajnej klasy smětaj nětko Nils Fiedler a Maurizio Hoffmann hry nawjedować, do wokrjesneje wyšeje ligi postupja Torsten Aust, Malte Grünert, Eric Stolarski a Sebastian Mieth. A we wokrjesnej lize budu tež Jakob Holling, Mathias Hohlfeld a Enrico Stiebitz zasadźeni. Kilian Hrjehor

Dirk Rettig nowy Kulowski trenar

póndźela, 17. julija 2017 spisane wot:

Po tym zo bě Waldemar Adamowicz po dźewjeć lětach jako hrajer a trenar prěnjeho koparskeho mustwa Módro-běłych Kulow přestał, je Detlef Scholze mustwo spočatk lěta přechodnje přewzał a z nim we wokrjesnej wyšej lize wostał.

W přihotach na nowu hrajnu dobu su z Dirkom Rettigom nětko noweho nazwučowarja angažowali. Kulowskim koparjam je Spalowčan derje znaty. Wón narodźi so 13. nowembra 1969 w Choćebuzu, je ženjeny a ma dwě dźěsći. Z pjeć lětami započa wón z kopańcu pola FC Energije Choćebuz. Tam hraješe we wšitkich dorostowych mustwach. Z 19 lětami dźěše na dwě lěće k Chemiji Gubin a hraješe w lize NDR, kotraž bě tehdy druha najwyša. Z 21 lětami wróći so k Energiji a 1996 změni k FC Rudne horiny Aue. Wot lěta 1998 do 2002 šnórowaše wón kopački za FSV Wojerecy a wot 2002 pjeć lět za FSV Budissu Budyšin. W hrajnym lěće 2007/2008 hraješe za Wojerecy 1919. Kónc lěta 2008 započa Rettig jako trenar FSV Budissy Budyšin II a wukonješe funkciju pjeć lět. Rezerwa Budissy postupi z nim z wokrjesneje wyšeje ligi do krajneje ligi. Dalšej staciji jako trenar běštej SJ Chrósćicy (dwě lěće) a ST Hnašecy/Dobruša.

Dobry test za nowu sezonu

póndźela, 17. julija 2017 spisane wot:

Sokoł Ralbicy/Hórki

– FSV Kemnitz 7:1 (2:1)

Zestawa domjacych: Ch. Gloxyn – M. Matka (57. Kobalc), Korjeńk, Šewc, K. Matka, Młynk, Šołta, D. Gloxyn, Janca, Bjeńš, Kurjat

Tři tydźenje po poslednjej winowatostnej hrě sezony 2016/2017 stejachu koparjo Sokoła Ralbicy/Hórki znowa na hrajnišću. Minjeny pjatk zahajichu woni přihotowansku fazu, a to z nowym trenarjom Jiříjom Krohmerom. Dominik Schlicke je jeho kotrenar. Mustwowy nawoda wostanje Maik Brězan.

Ći, kotřiž stejachu njedźelu na trawniku, su swój nadawk derje spjelnili. Hnydom w 2. min. klinkaše po dwójnej přihrawce mjez Stefanom Bjeńšom a Dennyjom Gloxynom. Druhi mjenowany njeměješe žane ćeže, bul do wrotow sunyć. W 11. min. Kemnitz wuruna. Po foulu postaji sudnik Heiko Hejduška na wólny kop ze zdalenosće 18 metrow, a tón w hornim kuće zadyri. Domjacy srjedźa derje kombinowachu a Uwe Młynk bu na prawej stronje swobodny hraty, ale zwrěšći na wrotarju. Krótko do połčasa pak sčini to lěpje. Přez staciji Kurjat a Bjeńš běše wón swobodny a přewiny wrotarja k 2:1 (43.).

Widźał,słyšał, napisał (17.07.17)

póndźela, 17. julija 2017 spisane wot:

Awtor dźensa

Jurij Nuk

Před štwórć lětom ze­mrě w swojim ródnym měsće Drježdźanach 91lětny Günther Büttner. Wón běše wurjadny trenar běharjow na srjedźnych a dołhich čarach. Narodźił bě so w Dorfhainje, wsy za Freitalom. Wuknył je wón najprjedy powołanje pjekarja. Wot lěta 1952 absolwowaše na nowonatwarjenej Němskej wysokej šuli za fis­kulturu jedyn z prěnich studijnych kursow. Předewšěm je so tam za běhanje zahorił a sej tón wobłuk za hłowne ćežišćo wuzwolił. Běhanje běše za njeho kralowska disciplina a, kaž sam jónu praji, „prěnjotna forma pohibowanja, při kotrejž njesměš žanu kročel wuwostajić. Běharjo dyrbja swoju wahu sami njesć.“

28. Kulow-cup přewjedli

póndźela, 17. julija 2017 spisane wot:

Pjatk wječor je so wólnočasny koparski turněr z mjenom Kulow-cup, kotryž bu wot młodźinskeju skupin Company of Kulow a Die Söffner organizowany, z tak mjenowanej samba-nocu zahajeny. Party na swjedźenskej łuce při Kulowskim měšćanskim haće bě połny wuspěch. Sobotu přewjedźechu tradicionalny koparski turněr z dźewjeć mustwami Kulowskich młodźinskich klubow. Byrnjež hry dešća dla přetorhnyć dyrbjeli, knježeše mjez přihladowarjemi a akterami na hrajnišću wulkotna nalada. Po předkołach a połfinalach sćěhowachu zaměstnjenske hry, kaž tež małe a wulke finale. Kónčnu hru doby cyłk Die Söffner 3:2 přećiwo Company of Kulow. Tak budźetej tejle cyłkaj 29. Kulow-cup zhromadnje zarjadować.

Kral a Lejnjenjo na čole tabulkow

póndźela, 17. julija 2017 spisane wot:

Kónc apryla je so w Adelsdorfje lěuša sezona němskich dumperowych mišterstwow zahajiła. Na to slědowaštej běhaj w Bad Freienwaldźe a Mildenbergu. Předposledni běh budźe 10. septembra w Drjowku, posledni potom 1. oktobra w Hórkach. W tabulce jednotliwcow a w mustwowym hódnoćenju su wotstawki k susodam do poslednjeju běhow sezony chětro snadne.

hódnoćenje jednotliwcow

1. Filip Kral, Róžant52 dypkow

2. Markus Donat, Lejno 48 dypkow

3. Thomas Neumann, Skaup46 dypkow

4. Torsten Gerš, Lejno 44 dypkow

5. Maik Schurig, Quersa 30 dypkow

6. Udo Genilke, Drjowk 29 dypkow

7. Frank Domš, Zejicy 24 dypkow

8. Křesćan Grutka, Chrósćicy 22 dypkow

9. André Grafe, Adesldorf 20 dypkow

10. Udo Peters, Riesa 18 dypkow

mustwowe hódnoćenje

1. Dumperowy klub Lejno 58 dypkow

2. Wubědźowanski team

Adelsdorf/Quersa 56 dypkow

3. Dumperowy team Wuchod 48 dypkow

4. Dumperowy team Drjowk 38 dypkow

5. Bad Freienwalde 32 dypkow

6. Dumperowy team

Južne Smoliny28 dypkow

7. Dumperowy team

Rasselbande10 dypkow

8. Dumperowy team

Sitzenroda8 dypkow

9. Dumperowy team Koselitz0 dypkow

10. Dumperowy team Näser 0 dypkow

Jurij Bjeńš

Marathonowu čaru skatowali

póndźela, 17. julija 2017 spisane wot:
Dierk Šewc (naprawo), předsyda Sokoła Ralbicy/Hórki, je njedźelu tydźenja w Błótach na marathonowej čarje skatował a swój wosobinski čas polěpšił. Šewc bě něšto wjac hač połdra hodźiny po puću a wobsadźi w starobnej klasy 10. městno. Na wo­brazu widźimy rodźeneho Łazkowčana z profijowej spěšnosmykarku Claudiju Pechstein, kotraž je pola žonow dobyła. Foto: Kilian Hrjehor

Serbska debata

nowostki LND