Prěni raz wulke myto dobył

póndźela, 03. julija 2017 spisane wot:

Kulowske jěchanske towarstwo je mjeztym na swojim jěchanišću při Lubohozdźanskim puću hižo 46. jěchanski a skakanski turněr přewjedło. Organizatorojo, kotřiž běchu kónc apryla sezonu 2017 zahajili, mějachu znowa ruce połnej dźěła­. Přihotować, přewjesć a wuhódnoćić dyrbjachu zarjadowarjo 550 startow z 200 jěcharkami a jěcharjemi a 300 konjemi z něhdźe 60 sportowych towarstwow.

Na woběmaj dnjomaj mějachu w Kulowje pruwowanja w dresurje a skakanju w klasach E do M. Podpěrałoj stej 46. jěchanski a skakanski turněr mjez druhim Wuchodosakska nalutowarnja Drježdźany a firma Idee Kaffee. Wubědźowanja dožiwiło je 1 000 přihladowarjow.

Prěni raz poradźi so Kulowčanej hłowne skakanje klasy M z hwězdźičku dobyć. André Schlegel přesadźi so z kobłu Kolett přećiwo 17 kontrahentam. Druhe městno wobsadźi Sasha Rubienke z towarstwa BSV Gubin-sewjer na koble Celine a třeće Roby Schubert z jěchanskeho towarstwa Při Tuchorskim lěsu na konju Quick Step. Nadine Schneider (Kulow) doby skakanje klasy A na koble Cilly. Werner Müller

Wuspěšnu sezonu njewšědnje wuklinčeć dali

póndźela, 03. julija 2017 spisane wot:

Sezona we wobwodnej volleyballowej lize je zakónčena, a tule nětko krótki re­zimej. Wšako běše hrajna doba 2016/ 2017 za Worklečanskich muži z titulom wicemištra zaso jara wuspěšna, byrnjež so són postupa do sakskeje klasy wo­spjet njespjelnił. Fanojo pak widźachu wjele rjanych a napjatych hrow w Ralbičanskej sportowni w času, jako bu Worklečanska ćěłozwučowarnja přetwarjena. Njeby-li so přistajer Marcel Rjelka zranił, štó wě …?

Wuslědki (03.07.17)

póndźela, 03. julija 2017 spisane wot:

Wokrjesna wyša koparska liga

1. ST Ćisk 30  103 : 25 74

2. Sokoł Ralbicy/Hórki 30 77  : 38 59

3. Rakečanske ST 30 75  : 53 56

4. ST Hnašecy-Dobruša 30 65  : 56 51

5. LSV Hory 30 77  : 46 50

6. SC Großröhrsdorf 30 50  : 39 45

7. ST Kinspork/Łužnica 30 69  : 48 41

8. Motor Kumwałd 30 53  : 73 38

9. Póst German. Budyšin 30 53  : 73 37

10. Drohotka Ramnow 30 43  : 60 35

11. Wojerowski FC 30 61  : 56 34

12. Zeleno-běli Bukecy 30 57  : 85 33

13. Módro-běli Kulow 30 47  : 57 32

14. ST Wjelećin 30 65  : 105 31

15. TSV Połčnica  30 51  : 79 27

16. FV Ottendorf-Okrilla 30 37  : 90 21

Sport (30.06.17)

pjatk, 30. junija 2017 spisane wot:

Sport na wjesnym swjedźenju

14. a 15. julija zarjaduje ST Wóslink/Skaskow na sportnišću w Skaskowje wjesny swjedźeń. Pjatk wot 18.30 hodź. wubědźuje so šěsć wohnjowych woborow, nazajtra, sobotu, wot 14 hodź. budźe dźěćacy swjedźeń.

Dynamocamp w Delanach

Koparska šula Dynama Drježdźany chce w oktoberskich prózdninach zaso camp w Ralbicach pola Sokoła Ralbicy/Hórki zarjadować. Wot 9. do 13. oktobra smědźa tam holcy a hólcy w starobje sydom do 14 lět kóždy dźeń pod nawodom profesionelnych nazwučowarjow tre­nować. Camp płaći 194 eurow, swójby z wjacorymi dźěćimi dóstanu dźesać procentow rabata. Dalše informacije pod www.dynamo-dresden.de

Beachvolleyball Satkule

Po tym zo je 4. beachvolleyballowa tura Radija Satkula w Róžeńće startowała, zastanje wona prěnju póndźelu julija w Konjecach. Tež tam zetkaja so mustwa zaso we 18 hodź., hry započnu so poł hodźiny pozdźišo. Dalše terminy:

10.7. 18.30 hodź. w Jaseńcy

17.7. 18.30 hodź. w Kulowcu

24.7. 18.30 hodź. w Pančicach

31.7. 18.30 hodź. w Radworju

7.8. 18.30 hodź. w Budyšinje

28.8. 18.30 hodź. w Miłoćicach

Wubědźowanja wobornikow

7.7.  19:00  w Róžeńće

30.7. 14:00  w Smjerdźacej

25.8. 18:30  we Wotrowje

Testowe koparske hry

Felix Geisler zaso pola FCE

štwórtk, 29. junija 2017 spisane wot:
Nawrót koparja Felixa Geislera (nalěwo) k regionalnemu koparskemu ligistej Energiji Choćebuz je perfektny. We Wětošowje rodźeny bu pola Energije w dorosće wukubłany a wróći so nětko wot FSV Zwickauwa. Z FCE podpisa wón zrěčenje na jedne lěto, kotrež so wo dalše lěto hač do kónca junija 2019 podlěši, postupi-li mustwo do třećeje ligi. Foto: Georg Zielonkowski

Poslednju hru sezony přěhrali

štwórtk, 29. junija 2017 spisane wot:

SG Großnaundorf

– SJ Njebjelčicy 5:2 (3:1)

Zestawa hosći: Hahn – Hrjehor (59. Lejnart), Kral, Zeller, Pawlik, Šołta, Haška, Janca, Hoelzel, Hanuza, Korjeńk (63. Čornak)

Bjez wulkeho zapala a bjez trěbneje bojownosće pola načolnika a postupnika do wokrjesneje wyšeje ligi njeje móžno wobstać. Koparjam Njebjelčanskeje SJ bě drje wěste, zo maja pjate městno w kónčnej tabulce zaru­čene, přiwšěm chcychu so hišće raz prócować.

Domjacy cyłk trjechi do přestawki troje wrota. Dwoje z nich běštej daraj, dokelž škit hosći do toho raznje dosć zapřimnył njebě. W 44. min. bu Leopold Hoelzel wot Großnaundorfskeho wrotarja w šěsnatce njefairnje atakowany. Postajenu jědnatku Ronny Hanuza wěsće k 3:1 přetwori. Hižo w 50. min. zwyši hosćićel na 4:1. Pjate wrota padnychu dźesać mjeńšin pozdźišo. Hosćićelski najlěpši nadběhowar Maik Fließbach bě wuspěšny. Kónčny staw na 5:2 postaji w 83. min. Robert Lejnart. To běchu zdobom najrjeńše wrota dnja. Lejnart docpě je z połneho běha diagonalnje wysoko do lěweho kuta.

Sokoł Ralbicy/Hórki II

– Nadrózna Hrabowka 1:0 (1:0)

Zestawa domjacych: Měškank – M. Matka, T. Matka, Bogusz, Młynk, Jakubaš, Šěn, Čórlich, Serbin, Gerlich, J. Matka

Za wobaj cyłkaj bě hižo do koparskeje hry wšo zrjadowane: Nadrózna Hrabowka budźe tež přichodnu sezonu dale we wokrjesnej lize hrać, Sokoł Ralbicy/Hórki II zestupi. Přiwšěm stej sej wobaj kruće předewzałoj hrajnu dobu 2016/ 2017 z dobrym wukonom zakónčić.

Rjenje bě, zo wobkedźbowaše poslednju partiju delanskich koparjow tónraz tójšto přihladowarjow. Wopyt z čěskeho městačka Spálené Poříčí bě drje hodźinu do toho Ralbicy wopušćił, ale tójšto wjesnjanow wosta při sportnišću, zo bychu rezerwu Sokoła podpěrali. Ta měješe tež lěpši start a wuhra sej dobre šansy. Jurij Matka, Markus Serbin a Handrij Jakubaš pak je njewužiwachu. Tónle brach wšak bě so tež přez cyłu sezonu ćahnył. Hakle w 44. min. docpě Serbin po dobrej kombinaciji z Matku 1:0.

Po połčasu so hra wosłabi, Ralbičenjo pak snadny předskok derje zakitowachu. Jeničce po třoch róžkach za sobu so mócnje paleše, ale tež to Sokoljo bjez škody přetrachu.

Volleyball hrać

srjeda, 28. junija 2017 spisane wot:
We wobłuku wjesneho swjedźenja w Nowej Wjesce přewjedu sobotu, 1. julija, wot 13 hodź. volleyballowy turněr na trawniku. Wjesne a wólnočasne cyłki smědźa so hišće hač do pjatka pola Filipa Krala přizjewić. SN

Z dypkom klasa zawěsćena

srjeda, 28. junija 2017 spisane wot:

SV Haselbachtal

– ST Marijina hwězda 2:2 (0:2) 

Zestawa hosći: O. Schmidt – Rab, Škoda, Łušćanski, Lipič, R. Hawš, Jurš, O. Hawš, P. Schmidt (90. Čornak), Winkler (87. Czapik), Pakoßnick (77. Bělk)

Poslednja winowatostna hra sezony 2016/2017 wjedźeše prěnje koparske mustwo sportoweho towarstwa Marijina hwězda do Rychbacha k SV Haselbachtalej. Pančičenjo dyrbjachu na kóždy pad dypkować, zo njebychu z wokrjesneje klasy zestupili. To so jim z 2:2 tež poradźi, byrnjež do toho 2:0 nawjedowali.

Prěnje akcenty w chětro wurunanej partiji sadźeše před 180 přihladowarjemi Haselbachtal. W 13. min. přesadźi so Richard Hawš na prawym boku a posłuži Jakoba Pakoßnicka, kiž pak wrota snadnje misny. 0:1 (18.) nasta po standardźe. Tobias Škoda bě bul do šěsnatki kopnył, a Alex Winkler zhłójčkowa jón do syće. W 41. min. hosćo na 0:2 zwyšichu. Wotkop wrotarja Olivera Schmidta podlěši Winkler na Pakoßnicka, kiž wuži njedorozumjenje mjez wrotarjom a škitarjom.

Wčera wječor zahajichu rozhłosownicy młodeje žołmy Radija Satkula w Róženće swoju beachvolleyballowu turu po serbskej Łužicy, zo bychu so zhromadnje z młodostnymi na wulki turněr w Miłoćicach přihotowali. Něhdźe 90 přihladowarjow bě do Róžanta přišło. Mjez dwanaće mustwami přesadźi so Volker Racho w finalu přećiwo cyłkej OSSV. Team Radija Satkula wobsadźi třeće městno. Přichodny tydźeń wusyłaja live z Konjec. Foto: Jakub Wowčer

Serbska debata

nowostki LND