Konjacy dorost

štwórtk, 06. julija 2017 spisane wot:
Plahowarjo z Budyskeho wokrjesa su w Jěžowje wjace hač 40 žrěbjatow prezentowali. Mjez najlěpšimi běčhu tež wjacori serbscy plahowarjo. W rasy sportoweho konja dobyštaj Michał a Christin Wokec ze Šunowa (na wobrazu). Beno Schlegel z Kulowa pokaza najlěpše žrěbjo zymnokrejnikow a Florian Zahrodnik doby hódnoćenje pola ćopłokrejnych konjow. Nětko jědu plahowarjo na krajny championat žrěbjatow w Moritzburgu. Foto: Bettina Wenderothowa

Dwójna nula dobyła

štwórtk, 06. julija 2017 spisane wot:
Póndźelu bě druha stacija beachvolleyballoweje tury Radija Satkula w Konjecach. 16 mustwow so tam wubědźowaše, a dobyła je Dwójna nula. Wona přewiny w finalu Kamjenjanow. Třeće městno wobsadźi mustwo Volker Racho. Něhdźe 150 ludźi je hry widźało. Přichodny tydźeń budu Satkularjo w Jaseńcy. SN

24. koparski dwubój mjez wučerjemi a maturantami Serbskeho gymnazija Budyšin (SGB) skónči so z dobyćom 4:2 młódšeje generacije. Statistika dotalnych koparskich dwubojow z wida šulerjow wučinja nětko 17 dobyćow, tři remisy a štyri poražki.

„Krimi“ na Radworskim sportnišću!

srjeda, 05. julija 2017 spisane wot:

Poslednju njedźelu w juniju absolwowachu Radworscy koparjo prěnjeho mustwa swoju poslednju dypkowu hru sezony wokrjesneje ligi, stafle II.

Po tym zo běchu Radworčanam dźewjeć dypkow wotćahnyli, dokelž njemějachu postajenu ličbu sudnikow k dispoziciji, je so jim poradźiło deficit nachwatać a sej samo druhe městno tabulki zawěsćić. Wulki són wo postupje do wokrjesneje wyšeje ligi bě nětko jenož hišće móžny z pomocu Łutowskich koparjow. Bychu-li woni přećiwo konkurentej na prěnim městnje tabulki, Běłemu Chołmcej, znajmjeńša njerozsudnje hrali a bychu-li Radworčenjo runočasnje doma mustwo z Noweho Města přewinyli, móhli sej woni postupny són zwoprawdźić. Zo so tale konstelacija k woprawdźitemu krimijej wuwije, drje nichtó wočakował njeje.

Hrě při wysokim saku wotměli

srjeda, 05. julija 2017 spisane wot:

Spočatk junija wotměštej so tradicionelnej volleyballowej hrě na Budyskim Serbskim gymnaziju. Jubilejny 25. duel muskeje generacije rozsudźichu wučerjo z 2:1 přećiwo maturantam, rozžoh­nowace so abiturientki přewinychu wučerki z 2:0.

Sportowu halu Serbskeho šulskeho a zetkawanskeho centruma Budyšin pjelnjachu tón dźeń šulerjo wjacorych lětnikow. Wosebje wulki bě fanowy blok dwanatkarjow. Woni postarachu so ze wšelakorymi „instrumentami“ wo porjadnu sportowu atmosferu a tworjachu tak perfektny ramik wubědźowanja.

11. nowembra 1992 běchu prěni raz dwanatkarjo a pedagogojo noweho Serbskeho gymnazija Budyšin (SGB) při wysokim saku mocy měrili. Tehdy přesadźichu so šulerjo přećiwo wučerjam z 2:1. Rjana tradicija hišće dźensa eksistuje, dokelž je volleyball na kubłanišću nade wšo woblubowany.

Koparjo SGB sej slěbro wubědźili

wutora, 04. julija 2017 spisane wot:

Šulerjo-koparjo 5. a 6. lětnika Serbskeho gymnazija Budyšin (SGB) wubě­dźichu sej w kónčnym wurisanju najlěpšich šěsć šulow Sakskeje slěbornu medalju. W finalu podležachu woni wysokemu faworitej, Gymnazijej Bürgerwiese Drježdźany, přinošowachu pak z wurjadnym rezultatom k najwuspěšnišemu sportowemu lětu na hornjoserbskim kubłanišću.

Staflowy dobyćer

wutora, 04. julija 2017 spisane wot:

Traktor Malešecy

– ST Wjernarjecy 2:1 (2:0)

Zestawa domjacych: Riedesel (46. Seiler), – Schwurack (Wunsch), Swakou, Stewig, Hasse, Benad (68. Günther), Steffek, Koksch, Unger, Hoferichter, Bolz

Do zakopa zakónčaceje dypkoweje hry sezony 2016/2017 dósta mustwo Traktora Malešecy wot wokrjesneho koparskeho zwjazka čestne wopismo a pokal za dočasne staflowe dobyće.

Partiju zahajichu Malešanscy koparjo ze spěšnymi nadběhami. Młody Janis Schwurack docpě z wótrej třělwu nawjedowanje hižo w 5. min. Slědowachu hišće dalše móžnosće, kotrež pak domjacy njewužichu. W 30. min. Marco Benad po róžku na 2:0 zwyši.

W druhim połčasu widźeše něhdźe sto přihladowarjow w Malešecach dale a słabšu kopańcu. Lochkomyslnosć Maleš­anow wjedźeše k tomu, zo mó­žachu hosćo w 62. min. přez Stefana Hölze­la na 2:1 skrótšić.

Kurt Lorenc

Znowa Captainscup přewjedli

wutora, 04. julija 2017 spisane wot:

Worklečanske volleyballistki a volleyballisća wuhotowachu njedawno swój třeći turněr z mjenom Captainscup. Po lońšej přestawce, přetwara sportownje dla, móžeštaj organizatoraj Maćij Šěn a Ludwig Eckert dohromady 14 mustwow witać.

Na beachvolleyballnišću wojowaše wosom dwójkow wo dobyćerski pokal, a paralelnje k tomu wubědźowaše so šěsć cyłkow na trawniku za rjanej ponowjenej Worklečanskej sportownju. Tam hrajachu w modusu kóždy přećiwo kóždemu, z dwěmaj sadźbomaj hač do 15 dypkow. Po 15 hrajnych kołach přesadźi so tu mustwo Dwójna nula. Wone ani jeničku sadźbu njepřěhra a zawěsći sej tak zasłužene prěnje městno. Druhi bě team Tita dźiwow z jednej sadźbu předskoka před zastupnistwom Hintenreiner.

W finalu beachvolleyballa stejachu sej Andrey Antonov/Peter Noack (wobaj MSV Budyšin II) a Milan Budar (Viktoria Worklecy)/Marek Bačko (MTV Mariendorf) napřećo. Budyšanaj so po horcym boju přesadźištaj. Bronzowe městno zaručištaj sej Jurij Lipič (Viktoria Worklecy)/Petrick Leße (ST TuR Drježdźany).

Energija drastisce chłostana

póndźela, 03. julija 2017 spisane wot:

Sportowe sudnistwo Sewjerowuchodneho koparskeho zwjazka (NOFV) je wjacorych přeńdźenjow přiwiska FC Energije Choćebuz dla koparskemu klubej pokutu 16 000 eurow nabrěmjeniło. Nimo toho dyrbi FCE prěnju domjacu dypkowu hru sezony 2017/2018 bjez přihladowarjow přewjesć. Přičiny chłostanja běchu za sudnikow za zelenym blidom tele: hra w Meuselwitzu (wobškodźenje schodow a płota), hra w Lipsku (mjetanje zapalaka) a hra w Budyšinje (pyrotechnika). Za to chce NOFV 6 000 eurow měć, za přeńdźenje při wonkownej hrě w Babelsbergu 10 000 eurow.

„Chłostanje je za naše towarstwo absolutna katastrofa. Z tajkim wusudom njejsmy ličili. Njedóstanjemy w dźěle přećiwo škarakam žanu podpěru. Smy woprawdźe wšitko činili, štož bě móžne, zo bychmy tajkim přeńdźenjam zadźěwali. Za wěstotne naprawy mamy kóžde lěto wudawki w šěsćcyfrowym wobjimje. Nimo toho wuprajamy so jasnje přećiwo prawicarjam. Někotři z našich porjadnych fanow su so jim w Budyšinje do puća stupili. Chłostani su nětko wšitcy. To njeje poměrne“, zwurazni prezidij FCE po pokutnym mandaće, kotryž nochce akceptować. Georg Zielonkowski

Wot zašłeho tydźenja regionalny koparski ligist Budissa Budyšin zaso trenuje. Hłowny nawod ma tučasnje fitnesowy coach Daniel Zönnchen, kiž je poprawom ze sportoweje discipliny biatlon. Swoju prěnju testowu hru mějachu Budyšenjo minjenu srjedu pola mustwa Sportring Mücheln, hdźež su ze 14:0 jasnje dobyli. Foto: Torsten Zettl

Serbska debata

nowostki LND