Widźał,słyšał, napisał (31.07.17)

póndźela, 31. julija 2017 spisane wot:

Awtor dźensa

Tadej Cyž

Přiwisnicy kopańcy, wšojedne na kotrej runinje, su zawěsće zbožowni, zo je lětnja přestawka w někotrych klasach zakónčena. Hač k zazběhej elitoweje klasy wšak dyrbimy hišće trochu čakać.

W druhej zwjazkowej lize su Dynamowcy wčera wuspěšnje do sezony startowali a z 1:0 MSV Duisburg přewinyli. Mjez fanami w stadionje bě tež zaso tójšto serbskich. Cyłk Uwe Neuhausa, kotryž bě po hrajnej dobje 2016/2017 wukonosylnych koparjow zhubił, je sej tuž prěnje wažne dypki wudobył. Hač do kónca transferneje periody wuhladamy zawěsće hišće toho abo tamneho noweho hrajerja w čorno-žołtym trikoće. Na kóncu pak je wažne, zo wostanu realisća. Dočasne zachowanje klasy a jednocyfrowe městno w tabulce byštej hižo wulkej wuspěchaj byłoj, wšako kóždy wě, kak ćežke druhe lěto je a kak spěšnje sy zaso w zestupnym boju.

Pěskečanski koparski cyłk turněr dobył

póndźela, 31. julija 2017 spisane wot:

Na tradicionalnym koparskim turněrje we wobłuku Serbskopazličanskeho wjesneho swjedźenja hrajachu sobotu na sportnišću, kotrež bu hakle loni wote­wrjene. Na wurisanju wobdźělichu so wjesne koparske cyłki z Njebjelčic (młodźina a stara garda), Pěskec, Radworja, Worklec a Serbskich Pazlic. Modus bě kóždy přećiwo kóždemu z hrajnym časom 12 mjeńšin.

Bój wo bul běše w kóždej hrě jara wulki, přiwšěm knježeše tež fairnosć. Přihladowarjo widźachu 15 partijow z dohromady 36 wrotami. Najwjace docpěchu w hrě Njebjelčicy-młodźina – Pěskecy, kotraž skónči so 0:7. Pěskečenjo su tež cyłkowny koparski turněr dobyli. Woni mějachu w hódnoćenju dźesać dypkow a wrotowy poměr 13:3 wrotow.

Dawid Matik

Wuslědki (31.07.17)

póndźela, 31. julija 2017 spisane wot:

Regionalna koparska liga

Chemija Lipsk – Lok Lipsk 0:1 (0:1)

Neugersdorf – Budissa Budyšin 3:0 (2:0)

Altglienicke – Auerbach 1:1 (1:0)

Nordhausen – Halberstadt 1:1 (1:1)

Luckenwalde – BFC Dynamo 1:4 (1:0)

Fürstenwalde – Berlinski AK 2:2 (0:1)

Babelsberg 03 – Hertha BSC II 2:1 (1:0)

Neustrelitz – Energija Choćebuz 0:4 (0:1)

1.Energija Choćebuz 1 4  :  0 3

2.BFC Dynamo 1 4  :  1 3

3.Neugersdorf 1 3  :  0 3

4.Babelsberg 03 1 2  :  1 3

5.Lok Lipsk 1 1  :  0 3

6.Berlinski AK 1 2  :  2 1

6.Fürstenwalde 1 2  :  2 1

8.Nordhausen 1 1  :  1 1

8.Auerbach 1 1  :  1 1

Sport (28.07.17)

pjatk, 28. julija 2017 spisane wot:

Swjećić a sportować

We wobłuku wjesneho swjedźenja w Serbskich Pazlicach přewjedu tam jutře, sobotu, na nowym sportnišću koparski turněr. Cyłkownje šěsć cyłkow so na nim wobdźěli: Pančicy-Kukow, Worklecy, Pěskecy, Njebjelčicy-stari knježa, Njebjelčicy-młodźina a hosćićel Serbske Pazlicy. W 13 hodź. započnu hrać.

Regionalna liga startuje

Regionalna koparska liga sewjerowuchod zahaji jutře, 29. julija, w 12 hodź. z brizantnym duelom BSG Chemija Lipsk – 1. FC Lokomotiwa Lipsk sezonu 2017/2018. Dalšu šlagrowu hru změje štwórta najwyša liga Němskeje njedźelu wot 11.15 hodź. To nastupitej FC Hornja Łužica Neugersdorf a Budissa Budyšin přećiwo sebi. Njedźelu w 13.30 hodź. hrajetej potom TSG Neustrelitz a FC Energija Choćebuz wo dypki.

Tura Satkule z premjeru

Radworska młodźina wuhotuje póndźelu, 31. julija, předposlednju staciju 4. bičwolejbuloweje tury Radija Satkula. Dokelž w Radworju hišće njeběchu, je to premjera. Tydźeń pozdźišo, 7. awgusta, přihoty na wulke finale, kotrež budźe 28. awgusta w Miłoćicach, w Budyšinje zakónča.

Testowe koparske hry

29.7. 14:00 Großenhainske KT

  – Jednota Kamjenc

29.7. 17:00 ST Mały Wosyk

Jědnatki třěleli

štwórtk, 27. julija 2017 spisane wot:

Minjenu sobotu su delni Sulšečenjo swoje mjeztym štwórte třělenje jědnatkow we wobłuku wjesneho swjedźenja přewjedli. 24 mustwow so na nim wobdźěli. K wjeselu wšitkich su tež lětsa wurisanje hač do kónca přewjedli, byrnjež je sylne zliwki přeco zaso mylili. Po napjatych bojach Salowčenjo dobychu.

Prěni króć su sobotu tež na wulku koparsku dartowu sćěnu třěleli. Marko Koplanski z Nowoslic doby ze 128 dypkami před Clemensom Volkmarom z Kašec (117 dypkow).

Hišće raz k třělenju jědnatkow: Lětsa trjechichu aktiwni 366 króć, telko kaž hišće ženje do toho. Dohromady su statistikarjo w Sulšecach nětko 1 139 přetworjenych jědnatkow widźeli. Tysacte wrota poradźichu so Norbertej Grafej z mustwa Dołha garda w předkole přećiwo Pičkam ze suda. Graf dósta za to čestnu medalju.

Kónčne zaměstnjenje třělenja jědnatkow:

1. Salow

2. Spale

3. 1. FC Alkohol Sernjany

4. Brěžki

5. Pički ze suda

6. Šmiga Lepperschdorf

7. Koćina

8. Wildecker Herzbuben

9. 1. FC Alkohol Nowoslicy

10. Einsteinowy klub Wojerecy

11. Konjecy

12. Najmłódši dźe po piwo

13. Pěskecy

14. Pantherowi namrěwcy

15. Dołha garda

16. Lok Mučow

17. Přetworjerjo

18. Haslow

Test njerozsudnje wušoł

štwórtk, 27. julija 2017 spisane wot:
Před 500 přihladowarjemi je so tule minjenu njedźelu na Budyskej Młynkec łuce Josef Müller (nalěwo, Budissa Budyšin) w testowej hrě z BSG Wismutom Gera, kotraž skónči so 0:0, přećiwo Timej Slawikej přesadźić spytał. Budyšan chcyše so hišće raz za startowu formaciju poskićić. Njedźelu dožiwja lubowarjo kopańcy w Neugersdorfje wot 11.15 hodź. w regionalnej lize­ sewjerowuchod derby mjez FC Hornjej Łužicu Neugersdorf a FSV Budissu Budyšin. Foto: Torsten Zettl

Šesty cup piratow přewjedli

srjeda, 26. julija 2017 spisane wot:
Minjenu sobotu a njedźelu přewjedźe 19 cyłkow 6. cup piratow na beachvolleyballnišću we Wojerecach. Mustwa wojowachu w měšanych teamach, w kotrychž běchu stajnje dwě žonje a dwaj mužej. Dwuboje wotměchu so na třoch hrajnišćach a hrajny modus běše kóždy přećiwo kóždemu. Wobdźělnicy běchu z Wojerec a blišeje wokoliny­, z Lipska, Choćebuza a Drježdźan. Turněr dobyło je mustwo z mjenom Chippendales. Foto: Werner Müller

Testowu partiju jasnje přěhrali

srjeda, 26. julija 2017 spisane wot:

BSV Sebnitz

– SJ Chrósćicy 5:1 (2:0)

Zestawa hosći: Cyž – Dórnik, Sentivan, Runt, M. Zahrodnik, Domaška, Młynk, Kunze, F. Zahrodnik, Němec, Věchet

Zańdźenu sobotu podachu so koparjo 1. mustwa Chróšćanskeje SJ k testowej hrě do Sebnitza. Byrnjež tam poražku 1:5 poćerpjeli, běše duel tola cyłkownje wurunany. Hižo po někotrych hratych mjeńšinach měješe Radim Věchet po přihrawce Josefa Němeca, kiž bě so přećiwo škitarjej přesadźił, prěnju składnosć. Wrotar pak kop wotwobara. Wotnětka hosćićeljo na hrajnišću dominowachu. Tomáš Hurab, kiž bě před lětami z Chrósćic do Sebnitza šoł, třěli we 8. min. 1:0. Domjacy po nawjedowanju dale sylnje kombinowachu a wuhrachu sej tójšto móžnosćow. Přichodna šansa pak skićeše so Chróšćanskemu nowopřichadej Němecej. Jeho sylny kop dźěše jenož do žerdźe. Hosćićel drje měješe wjele składnosćow, młody wrotar Matej Cyž, kiž steješe prěni raz za 1. mustwo SJC w klětce, pak je solidnje a zdźěla sylnje wotwobara. W 35. min. pak prasny wón njezbožownje do nadběhowarja, a sudnik pokaza na dypk. Jědnatku přetwori Vladimir Semanco, kiž bě tež jónu w Chrósćicach hrał.

Pjata stacija bičwolejbuloweje tury serbskeho młodźinskeho sćelaka Radijo Satkula wjedźeše zajimcow wčera na Pančičansko-Kukowske sportnišćo. Tam bě mustwo Dwójna nula samo dwě hrajnišći přewostajiło. 16 cyłkow so najebać dešć wobdźěli, z toho štyri z Pančic-Kukowa samych. Turněr doby zaso Dwójna nula II. Team hosćićelow přewiny w finalu mustwo Mixery, hru wo třeće městno dobychu Micki z kocorom přećiwo Nukničanam. Foto: Gloria Žurec

Na triatlonje w Lipsku startowałoj

wutora, 25. julija 2017 spisane wot:
Marian Žur z Lejna a Beno Šołta z Miłoćic – čłonaj triteama Serbja – wobdźělištaj so wčera na 34. Lipšćanskim triatlonje. Při perfektnych wuměnjenjach staj wobaj swój wosobinski čas w Lipsku polěpšiłoj. Do wjacorych ćežkich kolesowarskich njezbožow pak wobaj na zbožo zaplećenaj njeběštaj. Dalše wubědźowanje za sportowcow triteama Serbja budźe 26./27. awgusta we Łazu na a při Třižonjanskim jězoru. Tam wotměje so potom triatlon KnappenMan. SN

Serbska debata

nowostki LND