Waršawa (dpa/SN). W Pólskej su na jednym dnju telko infekcijow z koronawirusom zwěsćili kaž wot nowembra nic wjace. Strowotniske ministerstwo we Waršawje přizjewi wčera 17 260 dopokazanych nowych padow w běhu 24 hodźin. Ličba smjertnych woporow wot spočatka pandemije je wo 398 na nimale 46 000 rozrostła. Pólska ma něhdźe 38 milionow wobydlerjow. Poćežowanje strowotnistwa dale přiběra. W chorownjach lěkuja nimale 18 400 pacientow, wjace hač 1 900 z nich na intensiwnych stacijach, hdźež dyrbja jich z kislikom zastarać.
Pólska bě naposledk wšelake škitne naprawy zběhnyła. Tam smědźa hotele, kina, muzeje a płuwarnje z wobmjezowanej kapacitu wotewrjene być. Rěčnik knježerstwa njewuzamkuje, zo naprawy hladajo na wuwiće znowa přiwótřa.
Praha. Tež po prěnim tydźenju krutych škitnych naprawow je čěske ministerstwo za strowotnistwo kónc minjeneho tydźenja rekordne ličby nowonatyknjenjow wozjewiło. Sobotu zwěsćichu zamołwići dalšich 9 000 potrjechenych wobydlerjow, wo 1 200 wjace hač sobotu do toho. Njedźelu je strowotniski minister Jan Blatný čěskim wobydlerjam najbóle kritiski tydźeń připowědźił. W dale a wjace přepjelnjenych chorownjach wojuja lěkarjo wo žiwjenje ćežko schorjenych. Wjace hač 700 dźěći a młodostnych lěkuja mjeztym na intensiwnych stacijach.
Praha. Ličba natyknjenych z koronawirusom w Čěskej přiběra najebać hižo dlěje hač měsacaj trajacu statnu karantenu a zakaz nócneho wuchoda. Minjenu sobotu zwěsćichu strowotniske zarjady 7 798 dalšich padow, to bě najwjetša ličba wot 9. wulkeho róžka a 1 000 nowoinfekcijow wjace hač sobotu do toho. Tuchwilu registruja 150 000 koronainficěrowanych, 1 500 z nich lěkuja na intensiwnych stacijach chorownjow. Tam wostawa połoženje napjate, medicinarjo dźěłaja dale na hranicy poćeženja.
Praha. „Za 300 milionow ludźi, dorozumjacych so w někajkej słowjanskej rěči, je to wězo zajimawe“. K tomule njewšědnemu spomnjenju je nawodu Instituta archeologije a muzeologije Brnjanskeje Masarykoweje uniwersity Jiřija Macháčeka pohnuje unikatna namakanka, kotraž wobsahuje runjewon sensacionelnu powěsć: „Před hlaholicu znajachu Słowjenjo germanske runy.“ Pismo hlaholicu, hłownje na zakładźe grjekskeho alfabeta stworjene, běštaj w 9. lětstotku bratraj Cyril a Metod na Morawu přinjesłoj.
Zo su Słowjenjo hižo wjele prjedy wo runach Germanow zdaća měli, sćěhuja wědomostnicy-specialisća z wurjadnje žadneje namakanki w podobje zwěrjaceho hrjebła. Kósć běchu archeologojo hromadźe ze wšelkej keramiku Praskeho typa lěta 2017 pola južnomorawskeho sydlišća Lány wuryli. Po dokładnym wučisćenju kosće studentka Alena Slamová zwěsći, zo bywaja na njej spodźiwne znamjenja. Tute zidentifikowachu eksperća njenadźicy jako germanske runy. Namakanka ma tuž tajki fundamentalny wuznam, zo pišu nowiny wo trěbnosći přepisanja stawiznow Słowjanow.
Praha (dpa/SN). Čěski prezident Miloš Zeman do toho wěri, zo budźe koronapandemija w kraju najpozdźišo w septembru přetrata. Wšitcy, kotřiž chcedźa přećiwo koronawirusej šćěpjeni być, budu hač do toho šćěpjeni“, rjekny Zeman telewizijnemu sćelakej CNN Prima News, kaž powěsćernja ČTK rozprawja. Nimo toho Zeman wěri, zo „trochu wobłudnjena skupina“, kotraž nochce so šćěpić dać, hač do toho swoje nastajenje změni.
Čěska bědźi so tuchwilu z dale přiběracej ličbu natyknjenjow. Wot wčerawšeho płaća tam po cyłym kraju razne wobmjezowanja. Tak smědźa ludźo swój bydlenski wobwod jenož hišće we wuwzaćnych padach wopušćić. Čěske wobwody wotpowěduja w swojej wulkosći němskim wokrjesam. Tež přechodźowanje a sportowe aktiwity su na swójske město abo gmejnu wobmjezowane. Naprawy płaća tři tydźenje. 26 000 policistow a 5 000 wojakow chce dodźerženje wukazow přepruwować.
Waršawa. Přiwótřeny pólski zakoń wo wotehnaću dźěći mjeztym Europsku uniju zaběra. Noworjadowanje, po kotrymž dyrbja žony dźěćo tež potom porodźić, hdyž je w maćernym žiwoće zbrašene, wotnětka płaći, po tym zo su je oficialnje wozjewili. Najwyše sudnistwo bě přiwótřenje loni w oktobrje na iniciatiwu wjacorych zapósłancow knježaceje narodnokonserwatiwneje strony PiS schwaliło. Wótrych protestow po cyłym kraju dla je knježerstwo na to dlěje hač tři měsacy wahało zakoń zeskutkownić.
Praha (dpa/SN). Čěski ministerski prezident Andrej Babiš je jasne přiwótřenje naprawow přećiwo koronawirusej připowědźił. „Je wažne dospołnej katastrofje w chorownjach“ zadźěwać, rjekny 66lětny wčera w Praze. Nadrobnosće chcyše wón dźensa ze zastupnikami opozicije, dźěłodawarjow a dźěłarnistwow rozjimać. Konkretne naprawy Babiš žane njemjenowaše, rjekny pak: „Hdźež njeje žadyn kontakt, njemóže so wirus dale dawać.“ Załožer populistiskeje strony ANO warnowaše: „Tónle wirus je woprawdźe killer, tež młodźi ludźo wuměraja.“
Nimo britiskeje warianty koronawirusa su w Čěskej nětko tež pad južnoafriskeje mutacije zwěsćili.