Žadaja sej lěpši dźěłoškit Tesly
Podstupim (dpa/SN). Frakcija Zelenych w Krajnym sejmje Braniborskeje žada sej wot awtotwarca Tesla z USA kročele k zniženju ličby dźěłowych njezbožow. „Wočakuju wot předewzaća, zo wšitko čini, zo by přičiny njezbožow zwěsćił a naprawy za škit dźěławych zwoprawdźił“, rjekny frakciski předsyda Benjamin Raschke minjeny pjatk w Podstupimje. „Kóžde předewzaće je winowate, wšitko za to činić, zo by ličba dźěłowych njezbožow tak niska kaž móžna była.“
W fabrice twarca elektroawtow Tesla w Grünheide južnje Berlina mějachu wot spočatka 2021 sydom ćežkich dźěłowych njezbožow. Socialne ministerstwo kraja nima tole za njewšědne. Porno tomu rozprawjeja medije wo mnohich dźěłowych njezbožach. Jeničce wot junija do nowembra 2022 na wšě 190. To by wšědnje jedne było. Tesla pokazuje na prawidłowne kontrole zarjadow za dźěłoškit.
Fico wólby dobył
Praksy protesta dla zawrjene
Berlin (dpa/SN). Tysacy domjace a fachowe lěkarske praksy su dźensa zawrjene, Zwjazk lěkarjow praksow a Virchowy zwjazk stej k akciji namołwjałoj. Zamołwići chcedźa z akciju na „bolostne lutowanske naprawy“ skedźbnić, kotrež politika a chorobne kasy zawinuja. Tohorunja njeje dosć fachowcow k dispoziciji. Dale pokazaja lěkarjo na to, zo je jim přiběraca běrokratija wulke wužadanje. Tohorunja ćerpja woni wysokich energijowych kóštow a inflacije dla.
Praksy njemóža pacientow hižo w dosahacej měrje zastarać, zdźěli němski předsyda Virchoweho zwjazka Dirk Heinrich dźensa w rańšim magacinje sćelaka ZDF. Lutowanskich naprawow a skrótšenja wukonow dla je dale a mjenje terminow za pacientow k dispoziciji. Tak njeje hižo žaneje wosebiteje přiražki, jelizo lěkarjo spočatk lěta nowych pacientow přiwzaja.
Bjezposrědnje do akciskeho dnja je zwjazkowy strowotniski minister Karl Lauterbach (SPD) žadanje lěkarjow za wjace pjenjez wotpokazał.
CDU: Rentnarjo dale dźěłać
Wuspěchi Ukrainy nadhódnoćene
Wien (dpa/SN). Dźělne wuspěchi Ukrainy při jeje přećiwnej ofensiwje přećiwo ruskemu wójsku su po měnjenju fachowca powšitkownje nadhódnoćene. „Jednotliwe zakitowanske linije Rusow Ukrainjenjo z wulkimi stratami přewinu, tola woprawdźity přełam njedocpěja“, rjekny fachowc awstriskeho wójska za Ukrainu Markus Reisner powěsćerni dpa. „Poprawom dyrbjeli wšitke alarmowe zwony klinčeć, zo njeje so po 117 dnjach přećiwneje ofensiwy hišće žadyn operatiwny přełam radźił.“ Ukraina ma po jeho měnjenju přemało wojerskeho materiala, zo móhła so ruskim nadpadam za frontu wobarać. Dyrbjało-li so ruskemu wójsku poradźić, zastaranje z milinu čujomnje mylić, by tež ukrainska brónjenska industrija zlemjena była.
Reisner w tym zwisku na to pokazuje, zo su na přikład němske tanki Leopard 2 nadźiju na wulku skutkownosć w boju jenož zdźěla spjelnili. Wot něhdźe 90 přewostajenych tankow tutoho typa je znajmjeńša třećina jězdźidłow zničenych abo wobškodźenych. Straty na woběmaj bokomaj su hoberske. Ukraina je 80 000 wojakow zhubiła, Ruska 140 000.
To a tamne (02.10.23)
Pasanća zazwonichu zawčerawšim policiju w Hannoveru, dokelž běchu wutřěle słyšeli. Prawdźepodobnje běchu je wobdźělnicy kwasneho korsa zawinowali a tuž zastojnicy ćah z awtami zadźeržachu. Cyłkownje wosom awtow policisća dokładnje přepytachu. Tež njewjesta dyrbješe z awta wulězć. Kaž policija zdźěli, pak njejsu ani jeničke brónje namakali.
Šok poćerpi 62lětny muž w Olbernhauje, jako sej zastojnicy minjeny štwórtk žadachu, zo ma so na zemju lehnyć. Policisća pytachu mjenujcy za njeznatym strašnym mužom a běchu přeswědčeni, zo su jeho našli. Tola po přepruwowanju 62lětneho so wukopa, zo tomu tak njeje. Dokelž je so muž při akciji zranił, pad nětko kriminalna inspekcija přepytuje.
Skónčnje dźe dale – tola zaso za wutwar A 4 planuja
Budyšin/Berlin (SN/mb). Wulki bě loni nazymu šok we Łužicy, hdyž je zwjazkowe knježerstwo wšu swoju dźěławosć za wutwar awtodróhi 4 cofnyło – a tohodla je poselstwo ćim lěpše, kotrež je Budyski zapósłanc krajneho sejma Marko Šiman (CDU) wčera z dwuhodźinskeje „dźěłoweje rozmołwy“ w zwjazkowym ministerstwje za digitalne a wobchad do swojeje domizny přinjesł: Woni z přetorhnjenym planowanjom nětko zaso pokročuja. To je parlamentariski statny sekretar při ministerstwje Michael Theurer (FDP) delegaciji Hornjołužiskeje iniciatiwy předewzaćelow wobkrućił. Załoženje tuteje iniciatiwy je Šiman před pjatnaće lětami nastorčił, jej mjeztym zastupjerjo 35 firmow přisłušeja. Wčera w Berlinje běchu nimo Šimana tež Dirk Petasch z blidarnje we Wulkej Dubrawje, Silvio Buchhorn („SLB Stadt- und Landbau Budyšin“) a Peter Boxberger, inženjer za měrjenje z Kamjenca, přitomni, kotřiž zdobom rjemjesło, wjetše zawody regiona a samostatnych reprezentuja.
Korsika budźe awtonomna
Ajaccio (dpa/SN). Francoski prezident Emmanuel Macron je žadanja za wjetšej samostatnosću srjedźomórskeje kupy Korsika akceptował. Na posedźenju parlamenta kupy w stolicy Ajaccio Macron wčera přilubi, zo chcył so w běhu poł lěta ze zamołwitymi kupy na rjadowanje dojednać. Poměr mjez Korsiku a knježerstwom w Parisu je wobćežny. Lětdźesatki běchu separatisća zdźěla namócnje wo samostatnosć kupy wojowali. Mjeztym knježa tam moderatni nacionalisća.
Zelenskyj: Smy bórze w NATO
Kijew (dpa/SN). Po wopyće generalneho sekretara NATO Jensa Stoltenberga w Kijewje je sej ukrainski prezident Wolodymyr Zelenskyj znowa čłonstwo swojeho kraja w NATO žadał. Ukraina je sej zasłužiła, so z čłonom NATO stać, a „wona to tež budźe“, rjekny Zelenskyj w swojim widejowym poselstwje. Kijew chcył w tymle prašenju praktiske polěpšenja docpěć. Stoltenberg bě wot Ruskeje nadpadnjeny kraj hižo druhi króć wopytał.
Železniske čary wutwarić
W nižozemskim Rotterdamje steja ludźo před domom, w kotrymž bě ...
Wuměnjenja za wučomnikow polěpšić
Drježdźany (SN/BŠe). Wjace hač štwórćina wučomnikow cyłeje Sakskeje ma dołhi puć k powołanskej šuli. „Dlěje hač 90 mjeńšinow su woni po puću“, wuchadźa z naprašowanja sakskich industrijnych a rjemjeslniskich komorow. Něhdźe třećina wučomnikow dyrbi šulski puć zmištrować, kotryž je wjace hač 50 kilometrow dołhi. Tohodla trjebaja woni přebywanišća blisko powołanskeje šule. Tola tajkich njeje tuchwilu w dosahacej měrje k dispoziciji.
Wuslědki naprašowanja njejsu spokojace. Předewšěm w kónčinach na wsach maja wučomnicy ćeže powołanske šule docpěć. Lěpše wobchadne zwiski abo dobre přebywanske móžnosće stej alternatiwje, kotrejž móhłoj połoženje polěpšić. „Hižo do zahajenja wukubłanja so młodostni wo ramikowych wuměnjenjach informuja, k čemuž docpějomnosć powołanskeje šule słuša. Jelizo su wuměnjenja špatne, rozsudźi so młodostny w najhóršim padźe přećiwo wukubłanju“, zwurazni prezident Lipšćanskeje industrijneje a wikowanskeje komory Kristian Kirpal.
