Kijew (dpa/SN). Při nowych ruskich ra­ketowych nadpadach su dźensa we wšelakich kónčinach Ukrainy wjacori ludźo žiwjenje přisadźili. W stolicy Kijewje je žona zemrěła, tamniše wojerske zarjadnistwo zdźěla. Měšćanosta Witalij Kličko rěčeše nimo toho wo dźewjeć zranjenych. W centrumje stolicy běchu rano detonacije słyšeć. Tež w Charkiwje a Dnipropetrowsku su ruske rakety do domow zrazyli a wjacorych wobydlerjow morili. Po wšěm kraju su powětrowy alarm wukazali. Pólske wójsko je nadpadow dla wjacore lětadła zasadźiło, kotrež powětrowy rum nad krajom stražowachu.

Při prawdźepodobnje wot Ukrainy organizowanym nadpadźe na zawod ruskeho předewzaća za zemski płun Novatek je w Pětrohródskej kónčinje wulko­woheń wudyrił. Sobudźěłaćerjow su ewakuowali. Wěcna škoda je jara wulka. Ukrainske medije rěča, powołujo so na knježerstwo kraja, wo „specialnej operaciji“ ukrainskeje tajneje słužby. Terminal su pječa z trutami nadpadnyli. Oficialne wobkrućenje z Kijewa njepředleži.

Wonkowni ministrojo EU wuradźuja wo konflikće na Bliskim wuchodźe

Brüssel (dpa/SN). Po USA zwyši nětko tež Němska zhromadnje z EU ćišć na pře­ćiwnikow rozrisanja dweju statow w konflikće na Bliskim wuchodźe. „Ći, kotřiž nochcedźa wo tym ničo wědźeć, njejsu dotal žanu druhu alternatiwu nastor­čili“, kritizowaše wonkowna ministerka Annalena Baerbock (Zeleni) wčera na wjeršku EU w Brüsselu tuchwilne połoženje. Při rozrisanju dweju statow měł njewotwisny palestinski stat měrniwje w susodstwje Isreala eksistować.

Centralny nadawk nětko je, tak Baerbock, Israelej wujasnić, zo móže kraj jenož w pokoju a wěstoće žiwy być, hdyž su tež Palestinjenjo we wěstoće a dostojnosći žiwi.

Dźěći maja so ćežko při hrach tež jónu přěhrać. Dorosćeny wě, zo njemóžeš jenož dobyć – poražki su wobstatk žiwjenja, tež demokratije. Sym w Serbskim sejmje jónu debatu wo wójnje w Ukrainje dožiwił, ­běše telko wšelakich měnjenjow kaž w towaršnosći. Tohodla njejsu wo stejišću wothłosowali, wšako njebě konsensa. To samsne sym pola druhich temow w zwjazkowym předsydstwje Domowiny na wědomje brał: Hdyž hrožeše strach, zo wjac hač jedyn z „Ně“ wothłosuje, su na­jebać jasnu wjetšinu dale formulacije změnili, doniž njejsu nimale wšitcy młowojtemu kompromisej přihłosowali. Bohudźak je w Drježdźanach a Berlinje dosć dorosćenych, kotřiž za nas rozsudźeja. Ale snadź chcemy so sami z dorosćenymi stać? Po wothłosowanju w krajnym sejmje sedźa zapósłancy wjetšiny a mjeńšiny rady hromadźe při piwje. A štóž je dźensa mjeńšina, móže jutře wjetšina być. Dru­hdy demokratija boli, ale bjez bolosćow njeje zrałosće. Marcel Brauman

Berlin (dpa/SN). Sakski minister za ratarstwo Wolfram Günther (Zeleni) je zežiwjenskemu hospodarstwu swobodneho stata dobre wuwiće wobswědčił. Branša je stabilnje nastajena, ma pak tež wichorojte lěta za sobu, rjekny wón wčera na Zelenym tydźenju w Berlinje. „Ekstremne wjedro, zwyšene płaćizny zawodowych srědkow a problem pobrachowacych fachowcow branšu wužaduja. K tomu přińdźe wotwisnosć wot chabłacych płaćiznow na swětowych wikach, dale a komplikowaniše spěchowanje ratarstwa a njejasne ramikowe wuměnjenja po lětdźesatki trajacej wopak wusměrjenej ratarskej politice.“ Branša steji pod wulkim ćišćom, Günther rjekny.

Po jeho słowach su minjene lěta w Sakskej wo wjele wjace regionalnych a bio-produktow předawali. Tam bě inflacija snadniša hač pola konwencionalnych žiwidłow, minister potwjerdźi. Dobry poskitk biologiskich a regionalnych žiwidłow nimo toho turizmej w Sakskej polěkuje. „Tule ma Sakska dobre poskitki. To na Zelenym tydźenju pokazujemy.“ Sakska žiwidłowa industrija je loni 7,7 miliardow eurow wobrota nadźěłała.