Berlin (dpa/SN). Dwójny kanuwowy olympiski dobyćer a 16króćny swětowy mišter Ronald Raue planowane skrótšenja wjacorych milionow eurow w načolnym sporće Němskeje kritizuje a je so w tym zwisku z apelom na politikarjow wobroćił. Při tym njeńdźe jenož wo načolny sport, rjekny 41lětny bywši atlet swětoweje klasy dźensa w rańšim magacinje ZDF. „Dźe wo wjele wjace. Dźe wo towaršnostne wuprudźenje, kotrež móže sport wuskutkować. Dźe tež wo hódnoty a normy, kotrež sport posrědkuje.

Cyłkownje dyrbjeli sej zamołwići přemyslić, a tu „bjeru zwjazkowe knježerstwo do zamołwitosće“, kotru rólu ma sport w towaršnosći zabrać, Rauhe rjekny. W zwjazkowym etaće financneho ministra Christiana Lindnera (FDP) planuja klětu w načolnym sporće skrótšenja we wobjimje dźesać procentow wot dotal 303 na něhdźe 276 milinow eurow.

Wosebje potrjechenej stej Institut za slědźenje a wuwiwanje sportowych nastrojow (FES) a Institut za nałožowane treningowe wědomosće (IAT). Tam chce knježerstwo 19 procentow dotalnych spěchowanskich srědkow šmórnyć.

Sćazany mobilny telefon dźesaćlětneho hólca je w Bayerskej zasadźenje policije zawinował. Starosćiwy wobydler bě zastojnikow wołał, rozprawjejo wo „chětro brutalnje“ klinčacym žałosćenju dźěsća we wjaceswójbnym domje w Landshuće, policija zdźěla. Mać bě hólcej zakazała, handy wužiwać. Najebać mjerzanje dźěše so dźěsću derje, policija piše. Hač móžachu dźesaćlětneho změrować, njeje znate.

Kmótřa mjenow za wjedrowe wyšiny a nižiny přichodneho lěta móža so jutře pola towarstwa Berlinska karta wjedra přizjewić. Wyšiny maja klětu muske a nižiny žónske mjena. Kmótřistwo za wyšinu płaći 390, za nižinu 260 eurow. Dochody ze zhromadneho projekta ze Swobodnej uniwersitu w Berlinje su na dobro studentskeho wobkedźbowanja wjedra. Tak chcedźa 115 lět trajacy klimowy projekt uniwersity dale wjesć.

Kijew (dpa/SN). Ukrainski prezident ­Wolodymyr Zelenskyj je zakitowanskeho ministra Oleksija Reznikowa pušćił a chcył parlamentej Rustema Umerowa za naslědnika namjetować. Tole je Zelenskyj wčera w swojim widejowym poselstwje připowědźił. Prezident je sej wěsty, zo trjeba kraj we wójnje přećiwo Ruskej ­nowe wašnje postupowanja. Umerow, naslědnik krimskich Tatarow, zasadźuje so za wuswobodźenje Krimy. Reznikow bě wot 2021 zakitowanski minister kraja.

Eksport Němskeje woteběrał

Wiesbaden (dpa/SN). Wosłabjene naprašowanje na swětowych wikach na eksport orientowane hospodarstwo Němskeje dale poćežuje. Druhe połlěto 2023 je so po najnowšich ličbach Statistiskeho zwjazkoweho zarjada z minusom při wuwožowanju tworow započało. Wuhlady najwažnišeje branše mašinotwara su přiběrace ćěmne. Wonkowne wikowanje njeje wjace „sylny a robustny motor“ ­rozrosta němskeho hospodarstwa, štož něhdy bě, ale je dale a bóle „borzdźidło“.

Wopyt Mongolskeje skónčił