Kijew (dpa/SN). Ukraina chce w boju přećiwo Ruskej swoju brónjensku industriju dale wutwarić a so nadźija, zo zwjazkarjo to runje tak činja. Ukrainski wonkowny minister Dmytro Kuleba rěčeše w sćelaku ARD wčera wo trěbnej wojerskej koaliciji Ukrainy a zwjazkarjow. „Dyrbimy rozsudźeni wostać, hromadu dźeržeć a so mjez sobu podpěrować.“ Do toho bě Ruska zdźěliła, zo je swoju wojersku produkciju po zahajenju wójny přećiwo Ukrainje masiwje wutwariła. To potrjechi wosebje rakety a bojowe truty.

Kuleba rjekny, zo su signale, kotrež je prezident Wolodymyr Zelenskyj ze swojeho najnowšeho wopyta we Washingtonje sobu přinjesł, najebać blokowanu wojersku pomoc USA, nadźijepołne. Rozmołwy Zelenskeho ze senatorami a republikanami běchu „jara rjane“. Tež rozsud Rady EU, z Ukrainu rozmołwy wo čłonstwje w Europskej uniji zahajić, su wažny signal do směra na USA, zo wostanje Europa sylna. Runje to zamołwitych w USA pohonja, „so na dobro Ukrainy rozsudźić“, bě sej Kuleba wěsty.

Naćisk koalicije dotal w sakskim krajnym sejmje dosć přiwisnikow nima

Drježdźany (SN/mb). Po dźesać lětach je so sakski krajny sejm zašły tydźeń prěni raz zaso ze změnu wustawy swobodneho stata zaběrał. Tehdom su CDU, SPD, FDP, Zeleni a połojca frakcije Lěwicy zakaz zadołženja zawjedli. Jenož za čas přirodnych katastrofow abo hospodarskich wušparanjow su wuwzaća móžne. Nětko su frakcije aktualneje koalicije CDU, SPD a Zelenych naćisk za změnu krajneje wustawy zapodali (Serbske Nowiny rozprawjachu), kotrež wosebje zesylnjenju direktneje demokratije słuži.

Diskusije w Pirnje po dobyću kandidata AfD při wólbach wyšeho měšćanosty dawaja mały dočasny zaćišć na to, štož nas klětu w Sakskej wočakuje: Štó je poprawom wina na dobyću strony, z kotrejž nochce nichtó ničo činić měć? By snadź lěpje było, by-li zastupniča CDU swoju kandidaturu cofnyła abo tola snadź kandidat swobodnych wolerjow? Sakska CDU wšak so po njedawnym woprašowanju wolerjow zaso nadźija, zo so z 33 procentami sama přećiwo AfD předrěje a zo pomoc tamnych stron na kóncu scyła njetrjeba. Hač k wólbach klětu nazymu pak je hišće trochu časa. Snano by wunošne było, dotalne wólbnobojowe srědki na jich skutkownosć pruwować. Wočiwidnje njeje posudk wustawoškita, zo je AfD prawicarsko-ekstremistiska, ničo wuskutkował. A hdyž nastupja strony z hesłom „Přećiwo hidźe, šćuwańcy a wumjezowanju“ přećiwo AfD, dyrbja so prašeć dać, hač so z „palnymi murjemi“ sami na wumjezowanju njewobdźěla. Marko Wjeńka

Derje do Chiny dolećałoj staj pandamjedwjedźej Pit a Paule z Berlinskeje coologiskeje zahrody. Po wjace hač dźesać hodźinach stej wobaj nětko w Chengdu w tamnišej staciji za plahowanje pandamjedwjedźow a jich přeslědźenje. Staršej wobeju wostanjetaj w Berlinje. Přećah lěta 2019 rodźeneju dwójnikow bě hižo dlěši čas planowane. Pandemija bě tomu dotal zadźěwała. Mjedwjedźej stej kaž jeju staršej swójstwo Chinskeje republiki.

Na awtodróhowym wotpočnišću zabyli su 73lětnu wčera, njedźelu. Žona bě so minjenu nóc na parkowanišću při A 96 w Bayerskej na nuznik podała. Jako so nawróći, bě awto preč. 67lětny bratr bě na jězbje z Bosniskeje do Šwicarskeje pozastał a njebě pytnył, zo je tež žona wulězła. Tole widźo, so hnydom zawróći. Sobudźěłaćer tankownje bě hižo policiju wołał, „rozpjeršeneje žony bjez kabata“ dla.