Frankfurt n. W. (dpa/SN). Na Europskej uniwersiće Viadrina w Frankfurće nad Wódru chcedźa Ukrainje přichodnje při slědźenju a wuwučowanju wjetšu kedźbnosć wěnować. K tomu su wčera Center of Polish and Ukrainian Studies jako nowu wědomostnu instituciju wotewrěli. Za nowy center su wobstejacy centrum za interdisciplinarne studije Pólskeje rozšěrili. W nowym kubłanišću chcedźa slědźenske projekty a wuwučowanske poskitki zdźěłać. Zajimcy maja přidatnje składnosć, so intensiwnje akademisce ze stawiznami, kulturu, politiku a towaršnosću Ukrainy zaběrać. W tym zwisku planuja wuske zhromadne dźěło z druhimi slědźenišćemi w Europje a na druhich kontinentach. Braniborske ministerstwo za wědomosć bě centrum nastorčiło.

Kijew (dpa/SN). Ukrainski prezident Wolodymyr Zelenskyj je připowědźił, zo chcył podłu wšěch wotrězkow fronty škitne rumnosće a wobtwjerdźenja natwarić dać. „Trěbnosć je wočiwidna“, rjekny wón wčera wječor w swojim widejowym poselstwje. Ze zakitowanskim ministrom a wodźacymi zastupnikami wójska je wón mjeztym wo twarje tajkich objektow rěčał, Zelenskyj rjekny. Wobkedźbowarjo běchu minjeny čas zwěsćili, zo je ukrainska napřećiwna ofensiwa zwrěšćiła. Natwar twjerdźiznow podłu tysac kilometrow dołheje fronty je pokazka na to, zo so nawodnistwo w Kijewje nětko na zakitowanje tuchwilnych wojerskich pozicijow koncentruje.

Tel Aviv/Gaza (dpa/SN). Nadźija na po­dlěšenje přiměra w Gazaskim pasmje njeje so spjelniła. Israelska armeja wot dźensnišeho zaso přećiwo islamistiskej Hamas wojuje. Wojerske lětadła wot ranja zaso objekty Hamas w dospołnje zawrjenym Gazaskim pasmje bombarduja, israelska armeja po tydźeń trajacym při­měrje zdźěli. Runočasnje je Hamas dalše rakety do směra na Israel startowała.

Arabski sćelak Al-Dshasira rozprawja po informacijach swědkow wo ćežkich wojowanjach w měsće Gazy a druhich kónčinach na sewjeru pasma Palestinjanow. W centrumje města zasadźa israelska armeja mjeztym tež tanki, kotrež operuja njedaloko lěhwow ćěkancow Nuseirat a Bureidsch. Pječa bombarduja israelske lětadła wot najnowšeho tež objekty na juhu Gazaskeho pasma, štož dotal činili njejsu.

Israel a Hamas běštej so z posrědkowanjom Katara, Egyptowskeje a USA před tydźenjom na přiměr dojednałoj. W tymle času su dźesatki israelskich zastajencow a jatych Palestinjanow pušćili.

Serbske Nowiny wudawaja so w Domowina-Verlag GmbH Ludowym nakładnistwje Domowina 

Jednaćel: Syman Pětr Cyž

Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.

Šefredaktor a zamołwity redaktor w zmysle

nowinarskeho zakonja: Marcel Brauman 577 232/233 Naměstnik šefredaktora: Axel Arlt 577 238

tel.: 03591 / 577 232 faks: 03591 / 577 202 e-mail:  www.serbske-nowiny.de

Adresa redakcije a nakładnistwa: Sukelnska 27, 02625 Budyšin

Adresse der Redaktion und des Verlages: Tuchmacherstraße 27, 02625 Bautzen

Zamołwita za rozšěrjenje a marketing:

Patricia Róblowa 577 273

Předań nawěškow: Janka Rögnerowa 577 220 e-mail:

Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory

Vertriebskennzeichen: 2 B 2560 B