Skónčnje so přesadźili
To a tamne (27.07.23)
Swoju wowku z wnučkowym trikom zjebać chcył je 29lětny w Demminje w Mecklenburgsko-Předpomorskej – bjez wuspěcha. Muž bě swoju 85lětnu wowku zazwonił a jej napowědał, zo je w lěsnej chaće w „rukach dwělomnych muži“, kotřiž chcyli jemu křiwdu načinić, jeli njewobstara 600 eurow. Wowce bě tole „spodźiwne“. Wona zazwoni policiju. Zastojnicy móžachu 29lětneho zazwonić a jeho přeswědčić, akciju skónčić. Wón přizna, zo trjeba pjenjezy za wólnočasne wudawki. Nětko dyrbi muž z chłostanjom ličić.
Nócna posyłka muki je w Erfurće zasadźenje policije zawinowała. Wobydlerka bě zastojnikow alarmowała, dokelž bě pječa wutřěle słyšała. Policisća zwěsćichu, zo bě šofer nakładneho awta w fabrice nudlow kotoł muki z powětrom wupryskał. Při tym nastachu woprawdźe na wutřěle podobne zwuki.
Kretschmer za pragmatizm
Drježdźany (dpa/SN). „Cyle jasne wotmjezowanje wot AFD“ njeje po měnjenju sakskeho ministerskeho prezidenta Michaela Kretschmera na komunalnej runinje móžne. Politikar CDU zasadźuje so w rozmołwje z nowinarjemi Frankfurter Allgemeine Zeitung w dźensnišim wudaću za „pragmatiske wobchadźenje“ ze stronu. We wěcnych rozsudach njedosaha rjec: „Smy přećiwo tomu, dokelž je AfD za to“, Kreschmer rjekny. Wědomi pak měli sej wšitcy być, što AfD w Němskej planuje.
Morjenja dla zasudźeni
Brüssel (dpa/SN). W procesu islamistiskich nadpadow 2016 w Brüsselu dla je sudnistwo wjacorych wobskorženych teroristiskeho mordarstwa dla zasudźiło. Tole je rěčnica sudnistwa wčera wječor w belgiskej stolicy zdźěliła. Šěsć wobskorženym móžachu mordarstwo dopokazać, třoch su wuwinowali. Wo chłostanjach chcedźa w septembru rozsudźić. Při terorowych nadpadach 22. měrca 2016 běchu nadpadnicy cyłkownje 32 ludźi morili a 340 zranili.
Žadaja sej pjenjezy za šule
Stawkowacy šoferojo z wuchodneje Europy steja na juhohessenskim ...
Žada sej wěstotu za eksport žita
Lěwica: Program za škit klimy
Srjedźiznu towaršnosće njezabyć
Berlin (dpa/SN). Hladajo na dobre wuslědki woprašowanjow za AfD žadaja sej dźěłodawarjo a rjemjeslnicy Němskeje wot tamnych politiskich stronow eficientnu politiku na dobro srjedźizny towaršnosće. „Dobre wuslědki woprašowanjow za AfD zludaja mje wosobinsce, ale tež jako předewzaćela“, rjekny prezident zwjazka dźěłodawarjow Rainer Dulger powěsćerni dpa. Prezident centralneho zwjazka rjemjesła Němskeje Jörg Dittrich namołwja, zo njesměli strony na kromach towaršnosće ludźi pohnuć, zakłady zhromadneho žiwjenja w towaršnosći do prašenja stajeć.
Dulger je sej wěsty, zo dyrbjeli so zamołwići z njespokojnymi wobydlerjemi rozestajeć. AfD ma nastupajo škit klimy, wobchad a migraciju politiski poskitk, kiž nochce žane změny. To narěči wolerjow, kotřiž su wot chabłacych politiskich stronow přesłapjeni, Dulger rjekny. „Woprašowanja nas namołwjeja, so zaso bóle srjedźiznje towaršnosće wěnować. Wona je nošny stołp našeje zhromadnosće. Ju zanjechać, je jara strašne.“
Hněw je rozumliwy
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Naměstnik šefredaktora: Axel Arlt 577 238
tel.: 03591 / 577 232 faks: 03591 / 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Zamołwita za rozšěrjenje: Manja Bujnowska 577 262
Předań nawěškow: Janka Rögnerowa 577 220 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
To a tamne (26.07.23)
Němski atlet Jons Deichmann je dobre tři tydźenje po starće w New Yorku z kolesom do Los Angelesa dojěł a tak prěnju etapu přeprěčenja USA zmištrował. Po 5 500 kilometrach je 36lětny Deichmann wčera pacifiski pobrjóh docpěł a je pola Santa Monica do morja skočił. Deichmann bě kónc junija w New Yorku wotjěł. Dźensa je sej atlet dźeń přestawki popřał. Jutře chce so wón – běhajo – na wróćopuć podać a spočatk nowembra zaso w New Yorku być.
Z prašenjom, hač nochcedźa sobu činić, staj so paduchaj a w Krefeldźe na wopačnych wobroćiłoj. Mužej w starobje 18 a 20 lět běštaj so pěškow prašałoj a so na to samaj do składa žiwidłow zadobyłoj. Snano nochcyštaj tež jenož swědkow měć: Narěčani wołachu policiju, kotraž derje znateju napiteju paduchow hišće we wobchodźe zaja.
