To a tamne (21.11.23)
Dospołnje měrny wostał je šofer taksija w Hammje pola Dortmunda při rubježnym nadpadźe. 40lětny sobujěducy bě wčera pistolu wućahnył, na šofera měrił a bróń demonstratiwnje nabiwał. Najebać to 52lětny šofer rubježnikej přirěčowaše a jeho pohnu, pistolu złožić. Na kóncu skućićel šofera prošeše, jemu znajmjeńša tyzku cigaretow kupić a jeho domoj dowjezć. Tón pak wołaše město toho policiju, kotraž rubježnika zaja.
Hodowny štom za Běły dom přijimowała je first lady USA Jill Biden. Něhdźe 5,60 metrow dołhu jědlu su po starej tradiciji z konjacym zapřahom k sewjernemu zachodej knježerstwoweje centrale we Washingtonje přiwjezli. Narostł je štom w zwjazkowym staće North Carolina. Mandźelska prezidenta so na starodawne wašnje pohončam a konjam dźakowaše a „wulkotny štom“ chwaleše.
Křesćenjo wjace daruja
Berlin (B/SN). W Němskej pěstuja ludźo princip solidarnosće a socialneho angažementa. Tuž wosebje powšitkownowužitne projekty a organizacije spěchuja, zběrajo pjenjezy za nje. Starši ludźo daruja wjace hač młódši, wotwisnje wot zasłužby a stawa kubłanja. Křesćenjo wjace a časćišo pjenježne dary přewostajeja, zo bychu pomhali tym, kotřiž su najbóle potrěbni.
Hodźinu prašenjow wotměł
Vatikan (B/SN). Bamž Franciskus je njedawno 7 000 dźěći we Vatikanskej awdiencowej žurli přijał. „Sym stajnje wjesoły, hdyž so z wami zetkawam, dokelž mi stajnje něšto nowe posrědkujeće“, zwěsći bamž. 14 hólcow a holcow prašeše so jeho hladajo na škit wobswěta a wójny na swěće.
Radio Horeb pomha
Balderschwang (B/SN). Radio Horeb zasadźuje so za ludźi w chorownjach a w kónčinach, hdźež wulka nuza knježi, kaž na wjele městnach w Africe. Tuchwilu zběraja pjenjezy předewšěm za radijowe dušepastyrstwo, za wusyłanje Božich słužbow a žiwjensku pomoc. Radijo Horeb ma 65 kruće přistajenych sobudźěłaćerjow a 1 000 dobrowólnych pomocnikow.
Swjate lěto 2025
Kretschmer wobkrućeny
Kamjenica (dpa/SN). Dźesać měsacow do wólbow krajneho sejma je sakska CDU Michaela Kretschmera na čole strony wobkrućiła. Za 48lětneho hłosowaše na krajnym zjězdźe strony w Kamjenicy minjenu sobotu něhdźe 89 procentow wšěch wjace hač 200 delegatow. Kretschmer rěčeše wo wulkotnym wuslědku. Wón je wot lěta 2017 krajny předsyda CDU kaž tež ministerski prezident swobodneho stata. Jako tajki nawjeduje koaliciju CDU zhromadnje z SPD a Zelenymi.
Bohačkojo sobuwina
Berlin (dpa/SN). Ekstremny konsum bohatych ludźi a superbohačkow pospěša po měnjenju wuwićoweje organizacije Oxfam woćoplenje zemje na runjewon šamałe wašnje. Najbohatši procent swětoweho wobydlerstwa je lěta 2019 telko klimje škodźacych płunow naprodukował, kaž pjeć miliardow ludźi, dwě třećinje najchudšich wobydlerjow zemje. Přičiny su nadměrne wužiwanje lětadłow, hoberske chěže a gigantiske łódźe.
Afriski wjeršk w Berlinje
Składnostnje wčerawšeho dnja ludoweho žarowanja je Carola Veit ...
Wojowanjaw Ukrainje traja
Kijew (dpa/SN). Ukrainske wójsko je po swójskich informacijach na tysac kilometrow dołhej fronće na wuchodźe a juhu kraja znowa dźesatki ruskich nadpadow wotwobarało. Posudk generalneho staba wo wojerskim połoženju naliči dźensa rano jeničce za wčerawši dźeń 46 ruskich nadběhow. Wšitke pak su Ukrainjenjo wotwobarali. Ćežišća běštej měsće Marjinka a Awdijiwka. Runje tam Rusojo spytaja, ukrainskich zakitowarjow města wobkružić. Mokre nazymske wjedro tuchwilu wobě stronje haći.
Zakitowanski minister USA Lloyd Austin je na njepřipowědźeny wopyt do ukrainskeje stolicy Kijewa dojěł, hdźež planuje rozmołwy ze zastupnikami knježerstwa. Hłowne poselstwo Austina je: „USA Ukrainu w boju wo swobodu přećiwo ruskej agresiji dale podpěruja, nětko kaž tež w přichodźe.“
Třećina ludźi w Gazy na ćěkancy
FDP: Na socialnym polu lutować
Dalša swětłownja we Łužicy
Slědźenski centrum za klimje přichilene twarstwo ma w Budyšinje nastać
Budyšin (SN/BŠe). Etatowy wuběrk zwjazkoweho sejma je w nocy na minjeny pjatk wobzamknył, klětu cyłkownje 3,6 milionow eurow za slědźenišćo klimje přichileneho twarstwa w Budyšinje přewostajić. Za slědowace štyri lěta je nimo toho hač do 65 milionow eurow dalšich spěchowanskich srědkow za slědźenski centrum LAB – Living Art of Building – předwidźanych. Wo tym informowachu pjatk zapósłancy zwjazkoweho sejma Torsten Herbst (FDP), Kathrin Michel (SPD) a dr. Paula Piechotta (Zeleni). Hłowne stejnišćo centruma ma w Budyšinje być. Zdobom maja dalše městnosće po cyłej Němskej nastać. Za inwesticiju stej wokrjesaj Budyšin a Zhorjelc připrajiłoj, z pomocu městow a gmejnow hač do 450 milionow eurow swojich srědkow z hornca za změnu strukturow přewostajić.
To a tamne (20.11.23)
Fatalne misnjenje při wubědźowanju Formule I w Las Vegasu změje dosć drohe konsekwency: Běrow prawiznikow je zhromadnu skóržbu w mjenje něhdźe 35 000 wopytowarjow zapodał, žadajo sej 960 milionow eurow wotškódnjenja. Defektne wěko kanala bě štwórtk prěni trening po 19 mjeńšinach přetorhnył. Hakle hodźiny po tym móžachu z tym pokročować. To běchu wopytowarjo tribuny a wubědźowanišćo dawno wopušćili.
W hrjebi tčacy wostało je policajske awto w Šwikawskim wokrjesu při přesćěhowanju šofera awta. Tón bě so wčera w Crimitschauwje policajskej kontroli wuwinył. Jako policisća za nim jědźechu, suny so jich awto w křiwicy z jězdnje. Dalše policajske awto móžeše podhladneho skónčnje zadźeržeć. Po prěnim přepytowanju je 23lětny muž do jězby drogi brał. Wěcna škoda wučinja 32 000 eurow.
Antiserbske nadběhi su „wuwzaće“
Antiserbske podawki su drje „wuwzaće“, ale hdys a hdys je na partyjach młodźiny abo w stadionach „njepřećelskosćow“. Tak zjima předsyda Domowiny Dawid Statnik połoženje we Łužicy.
Wojerecy/Budyšin (AK/SN/mb). Na fachowym dnju wo ekstremizmje je so wčera we Wojerecach něhdźe 50 ludźi mjez druhim z towarstwow a zarjadow wobdźěliło. Organizowali su zetkanje iniciatiwy „Partnerstwa za demokratiju“ we Wojerecach a w Budyskim wokrjesu, ludowa uniwersita a Brigitty Reimannowa měšćanska knihownja Wojerecy. W ramiku zarjadowanja su štyri dźěłarnički přewjedli. Dawid Statnik, předsyda Domowiny, wuměnu wo temje „njepřećelskosć přećiwo serbskej ludnosći“ nawjedowaše.
