Swětowa klimowa konferenca w Dubaju problemow dla podlěšena

Dubai (dpa/SN). Krótko do planowaneho kónca swětoweje klimoweje konferency w Dubaju chcedźa Němska, EU a dalše staty hišće daloko sahace polěpšenja předležaceho kónčneho teksta přesadźić. Naćisk hosćićela ze Zjednoćenych arabskich emiratow, kotryž su wčera wječor předpołožili, zastopnjujetej němska wonkowna ministerka Annalena Baerbock a hłowna zamołwita EU za klimowu konferencu Wopke Hoeckstra jako přesłapjacy a njedosahacy. Zastupnicy wobswětoškitnych organizacijow reagowachu zludani a rozhorjeni. Pozadk hněwa je, zo so wot wjace hač sto krajow žadany kónc wužiwanja wuhla, zemskeho wolija a płuna w kónčnym teksće scyła wjace njejewi – hinak hač hišće w dotalnych naćiskach.

Swětowa klimowa konferenca w Dubaju je wulce wuspěšna – znajmjeńša z wida lobbyistow. Wjace hač 70 000 wobdźělnikow je so dwaj tydźenjej we wonym słónčnym arabskim kraju nad Persiskim zaliwom schadźowało: Na kóncu steja wšitcy z prózdnymi rukami. Jednory čłowjek kaž ty a ja móhł so prašeć: Što su woni tam poprawom cyły čas činili? Přewšo pilni běchu wočiwidnje lobbyisća, zastupnicy najwšelakorišich zajimow hospodarstwa. Nic mjenje hač 1 400 z nich běchu cyle oficialnje na konferencu akreditowani. Na kóncu su hosćićeljo Zjednoćenych arabskich emiratow naćisk kónčneje deklaracije předpołožili, w kotrymž wo skónčenju wužiwanja wolija, wuhla a płuna ani wjace njerěča. Wočiwidnje su lobbyisća dosć derje dźěłali. Wobkrućeni su nětko tež wšitcy, kotřiž su wot spočatka warnowali: Štóž wolijowym šajcham w Dubaju nawodnistwo swětoweje klimoweje konferency dowěrja, tón tež wjelka prosy, wowče stadło stražować. Marko Wjeńka

Huštań (Ch.Pin/SN). Na dwurěčne kemše stej wosada Grabičanski jězor cyrkwinskeho wobwoda Delnja Łužica, region Zły Komorow, a Kupka serbska namša druhu adwentnu njedźelu do Huštanja (Wüstenhain) pola Wětošowa přeprosyłoj. Běchu to druhe tajke kemše, na kotrež je 43 kemšerkow a kemšerjow přichwatało. Bohosłužbu sobu wuhotowali su młodźi ludźo Pauline, Annelie, Wanda a Kito, kotřiž su podawizny swj. Borbory přednjesli, žony, kotraž je so přećiwo woli nana wukřćić dała a za kotruž je wišnjowa hałžka w jatbje znamjo nadźije a sćerpnosće była. Wosadna Karina Raddacowa, zbobom čłonka Serbskeje přirady Ewangelskeje cyrkwje Berlin-Braniborska-šleska Hornja Łužica (EKBO), je tutu scenu hrać namjetowała. Ju přełožiła a z gymnaziastkami a gymnaziastom w serbskej rěči nazwučowała je Christiana Piniekowa. Młodźi ludźo su zdobom dwurěčne próstwy přednjesli.

Jenož pohladać chcył je bywši wrotar němskeho narodneho koparskeho mustwa Jens Lehmann pola susoda – z motorowej piłu w ruce. W sudniskim procesu w Starnbergu so wón dźensa zakitowaše, mějo so za wopor njewoprawnjeneho wobwinowanja. Statne rěčnistwo Lehmannej wumjetuje, zo je garažu susoda z motorowej piłu wobškodźił, ­dokelž ta jemu wuhlad na jězor kažeše. Awtomatiska kamera bě 54lětneho wobkedźbowała. Čehodla je Lehmann kozoł garaže přerězał, wón „wjace njewě“.

Do bydlenskeho domu zrazył je wulki, 32 tonow ćežki měšak betona dźensa rano w Schleswigsko-Holsteinskej. Nakładne awto z wjacorymi wóskami bě do toho z jězdnje w Blomesche zjěło. 29lětny šofer so při njezbožu snadnje zrani. ­Chětro wobškodźeny dom dyrbja nětko najprjedy raz statisce přepytować.