Unija zwólniwa sonděrować
Berlin (dpa/SN). Unija CDU/CSU je zwólniwa z SPD wutworjenje noweho zwjazkoweho knježerstwa sonděrować, wona pak wobsteji na wulkej koaliciji. To bě wčera wječor po rozmołwje čołow tychle třoch stron zhonić. Předsydstwo socialdemokratow chce jutře wo tym rozsudźić. Ćišć na předsydu SPD Martina Schulza přeběra, dokelž lěwicarjo w stronje jednanja jeničce wo wulkej koaliciji wotpokazuja.
May zesłabjena na wjeršku EU
Brüssel (dpa/SN). Poražka britiskeje premierki Theresy May wčera w parlamenće kraja wobćežuje ju na dwudnjowym wjerškowym zetkanju Europskeje unije dźensa a jutře w Brüsselu. Opozicija a někotři zapósłancy knježerstwowych Toryjow su přesadźili, zo dyrbi May zrěčenja wo wustupje kraja z EU parlamentej předpołožić. Statni a knježerstwowi šefojo EU pytaja wotmołwu na palace problemy, mjez druhim tež nastupajo brexit.
Pence wopyt přestorčił
Zaćišća połne bě wčera schadźenje słónca w sakskej krajnej ...
Sakska je europski modelowy region
Drježdźany (SN). Sakska je jedyn z pjeć regionow, kotrež je komisija EU za pilotowy projekt „Industrial Transition“ wuzwoliła. Tu kaž tež w Hauts-de-France (Francoska), Nora Mellansverige (Šwedska), Piemonće (Italska) a Waloniskej (Belgiska) maja wobšěrne strategije zdźěłać, zo bychu tam z hospodarskej změnu skutkownje postupili a so klimowej změnje spřećiwjeli. W tychle regionach su hłowne industrijne hałzy z wulkim wustorkom wuhlikoweho dioksida.
Po słowach ministra Martina Duliga (SPD) je jako přinošk Němskeje přetwar brunicoweje industrije we Łužiskim a srjedźoněmskim rewěrje pola Lipska předwidźany, kaž ze sakskeho hospodarskeho ministerstwa rěka.
Dalšich 54 000 rentnarjow ma dawki płaćić
Budyšin (SN/at). Zwyša-li so klětu renty, dyrbi po wšěm zdaću dalšich 54 000 rentnarjow dochodowy dawk płaćić. Stat móže z dalšimi dochodami 300 milionow eurow ličić. To wuchadźa z wotmołwy zwjazkoweho financneho ministerstwa na prašenje frakcije Lěwicy w zwjazkowym sejmje. Ministerstwo piše dale, zo rozsudźa wo dokładnym zwyšenju rentow wot 1. julija 2018 hakle klětu w měrcu. Tuchwilu je rěč wo tym, renty na wuchodźe wo 3,2 procentaj a na zapadźe wo tři procenty zwyšić.
Tamna strona klětušeho zwyšenja renty je, zo su něhdźe 4,4 miliony wuměnkarjow winowate, na rentu dawk płaćić, skoro dwójce telko kaž w lěće 2005. Wosebje we wuchodnej Němskej překroči wjace rentnarjow bjezdawkowy minumum eksistency, kotryž wučinja 2018 za samostejacych 9 000 eurow a za poriki 18 000 eurow. Štóž leži z lětnej bruttorentu minus pawšale za wabjenske kóšty (102 euraj) a minus wosobinskeje rentoweje bjezdawkoweje sumy nad zakładnym bjezdawkowym přinoškom (klětu 9 000 eurow), je winowaty, financnemu zarjadej dawkowu deklaraciju zapodać.
Tři serbske słowa móhli być
Dobre přeća a wočakowanja, ale tež kritika Michaelej Kretschmerej
Drježdźany (SN/at). Sakski krajny sejm je Michaela Kretschmera (CDU) wčera za noweho sakskeho ministerskeho prezidenta wuzwolił. Jenož 69 ze 77 hłosow koaliciskeju frakcijow bě za kandidata.
Prěni gratulant bě předsyda frakcije CDU Frank Kupfer, kotryž rjekny mjez druhim: „Přejemy sej dobre zhromadne dźěło a přilubimy Michaelej Kretschmerej jako knježerstwo nošaca frakcija swoju podpěru.“ Jeho kolega z SPD Dirk Panter skedźbni na wozjewjenje wotpohladow koaliciskeho wuběrka: „Budźemy we wobłukach kubłanje, wěstota, komuny, infrastruktura, wutwar spěšneho interneta kaž tež socialne a hladanje nowe puće namakać, zo bychmy wočiwidne problemy zmištrowali.“
Kretschmer njesměł so „wulkim wužadanjam kaž su to trěbny kónc wudobywanja brunicy a strukturna změna we wuhlowych regionach wotwlakować. Tak móhła so Sakska stać z pućrubarku za škit klimy a pokazać, kak inowatiwne, na přichod wusměrjene energijowe zastaranje funguje“, poruči frakciski předsyda Zelenych Volkmar Zschocke
Dokładna ličba je pohon
To a tamne (14.12.17)
Sowa je so do hale twornje VW w Brauntalu zadobyła a spjećuje so hižo tydźeń wšěm pospytam, ju wuswobodźić. Ptaka su w produkciskej hali za kolesyny wuhladali. Wutwarichu wokna, zo by so wón na swobodu dóstał, a sokołar spyta jeho won wabić. Kaž VW zdźěla, direktny strach za sowu njewobsteji. Po wšěm zdaću ma w hali dosć cyrobizny. Kónc tydźenja znowa spytaja ju wuswobodźić.
Mały plastikowy bow połny drobnych pjenjez je 69lětna na dnju swj. Mikławša w sewjerorynsko-westfalskim Meerbuschu namakała a policiji donjesła. Kripo zwěsći bórze na to mějićela nimale 600 eurow: Spediter bě pjenjezy wot kupca kasěrował, na nakładnym awće wotstajił a na nje zabył. Krótko po tym, zo bě wotjěł, padny bow z awta. Byrnjež so žona namakarskeje mzdy wzdała, je so jej předewzaćel z darikom dźakował.
Minority SafePack wospjet tema
Podstupim (SN/bn). Na 25. zjawnym posedźenju Rady za serbske naležnosće Braniborskeje wčera na Podstupimskim měšćanskim hrodźe su čłonojo gremija kaž tež zastupjerjo krajneho knježerstwa a Domowiny cyłkownje sydom dnjowych dypkow wobjednali. Po protokolarnej kontroli sćěhowaštej rozprawje społnomócnjeneje za naležnosće Serbow w Braniborskej Ulriki Gutheil, kotruž zastupowaše Měto Nowak, a předsydy serbskeje rady Torstena Maka.
W kontrowersnym dypku dorěčachu so radźićeljo k zwrěšćenej reformje noworjadowanja wokrjesnych přestrjenjow. Najwažnišo radźe je, zo změje přichodnje kóždy wokrjes serbskeho sydlenskeho ruma tež serbskeho zastupjerja.
Čłonka předsydstwa Domowiny Judit Šołćina wabješe we wobłuku wuradźowanja znowa za wobydlersku iniciatiwu Minority SafePack. „Zaměr wospjetneho wuzběhowanja tejele akcije hłownje je, zjawnosć a wosebje zapósłancow hišće raz wo njej informować. Serbska rada je jako cyłk iniciatiwu hižo podpisała, a to přejemy sej tež wot našich parlamentownikow a wobydlerjow“, Mak podšmórny.
Dźensa rozmołwa unije a SPD
Berlin (dpa/SN). Hromadźe ze šefomaj SPD Martinom Schulzom a CSU Horstom Seehoferom zahaji předsydka CDU a zwjazkowa kanclerka Angela Merkel dźensa wječor nowy pospyt, zwěsćić zhromadnosće za nowe zwjazkowe knježerstwo. W SPD su wulke předsudki porno nowej wulkej koaliciji po klasiskim mustrje. Wot socialdemokratow namjetowany model kooperaciskeje koalicije w uniji wotpokazuja. Merkel je tež přećiwo mjeńšinowemu knježerstwu.
Pozitiwny wothłós
Paris (dpa/SN). Škitarjo klimy su přewažnje pozitiwnje na wuslědki wčerawšeho klimoweho wjerška w Parisu reagowali. Na zetkanju z wjace hač 4 000 wobdźělnikami ze 130 krajow připowědźichu mjez druhim wulcy inwestorojo a wuwićowe banki konkretne kroki, zo bychu bój přećiwo změnje klimy podpěrali. Francoski prezident Emanuael Macron je namołwił, zo bychu před lětomaj wobzamknjene Pariske klimowe dojednanje skónčnje zwoprawdźeć započeli.
Demokrat Jones dobył
