Za kotru płaćiznu?
To a tamne (24.11.17)
Nimale pjećmetrowska pyton z mjenom Tinkerbell je sej w Stockporće, wulkokónčinje Manchestera, k susodam „wulećała“. Mějićelej staj to hakle pytnyłoj, jako chcyštaj hada nazajtra picować. Mataj dźesać pytonow, ale šěsćlětna Tinkerbell pobrachowaše. Hnydom staj policiju zawołałoj. Howno hada na susodźic zahrodźe pak pokaza jimaj prawy puć. Hromadźe wonaj podchłódźenu pyton domoj donjeseštaj a běštaj zbožownaj, jako móžeštaj ju zaso „potołkać“.
Woruch za samodruhe žony je w Hamburgu zasadźenje wohnjoweje wobory zawinił. W drastowym wobchodźe w St. Pauliju běchu wóń kura zwěsćili a nuzowe čisło wolili. Wobornicy drje to tež čujachu, přičinu pak njenamakachu. Ta wšak so bórze wukopa. Susodna gynekologiska praksa poskića samodruhim žonam wosebitu woruchowu terapiju.
Pofalla zwěsća wotputanje
Berlin (dpa/SN). Do zahajenja zetkanja Pětrohródskeho dialoga w Berlinje zwěsća jeho předsyda Ronald Pofalla w přewšo poćeženych němsko-ruskich poćahach po aneksiji połkupy Krim prěnje signale wotputanja. Jako přikładaj wón mjenuje, zo ruska strona mjeztym lěpje z kritiku wobchadźa, kaž tež namjet prezidenta Wladimira Putina, na wuchodnej Ukrainje módronahłownikow Zjednoćenych narodow zaměstnić.
Mjenje přinoška, wyša renta
Berlin (dpa/SN). Najebać wotwidźomny financny ćišć rentowe kasy přinoški klětu snadnušce zniža, zdobom pak renty čujomnje zwyša. Přinoškowa sadźba za zakonske rentowe zawěsćenje woteběra wot 1. januara 2018 wo 0,1 dypk na 18,6 procentow. Zwjazkowy kabinet je wčera wotpowědnemu postajenju socialneho ministerstwa přihłosował. Zdobom wšitko za to rěči, zo změja rentnarjo na wuchodźe a zapadźe wot 1. julija tři procenty wjace renty.
Mladić na čas žiwjenja do jastwa
Snano rozsudna rozmołwa ze Schulzom
Připokazanki hinak wobličić
Wudospołnjenje čłonow CDU z Hućiny do nawodneho namjeta přiwzali
Połčnica (SN/at). Politiku korigować chcedźa čłonojo Budyskeho wokrjesneho zwjazka CDU. Za to su na njedawnym wokrjesnym stronskim zjězdźe w Połčnicy z wjetšinu nawodny namjet schwalili. Na wotpowědny wot wobchodniskeho wokrjesneho předsydstwa zdźěłany naćisk běchu gmejnske, měšćanske a regionalne zwjazki strony něhdźe 30 wudospołnjenjow zapodali.
Klětu z lětadłom z Lipska do Chiny
Chongqing/Drježdźany (SN). Direktny zwisk ma lětanišćo Lipsk/Halle hižo klětu z chinskej metropolu Chongqing zwjazać, kotraž ma 30 milionow wobydlerjow. Předwidźane su prawidłowne lěty. Na to je so sakski minister za wobswět a ratarstwo Thomas Schmidt (CDU) z wyšim měšćanostu Chongqinga Chenom Luypingom dojednał, kaž ministerstwo wutoru zdźěli.
Předstajomny je kombinowany nakładowy a wosobowy wobchad. Tón móhł so wosebje na chinskich turistow wusměrić, kotřiž do Němskeje pućuja. Jednaćel towaršnosće Lětanišćo Lipsk/Halle zwr Johannes Jähn chce nětko styki z partnerami w Chinje nawjazać, kotrychž bě jemu wyši měšćanosta Chen mjenował.
Lětanišćo Chongqing je minjenej lěće 20 nowych mjezynarodnych zwiskow wutworiło. Kapacita bu tak rozšěrjena, zo móže tam lětnje 60 do 70 milionow pasažěrow wotlećeć, loni bě jich 36 milionow.
Dale chce Chen podpěrać zhromadny slědźenski projekt Fraunhoferskeho instituta za elektroniske nanosystemy w Kamjenicy z uniwersitu Chongqing kaž tež wuměnu studentow a wučomnikow.
To a tamne (23.11.17)
Sta wuměłcow chcedźa wot wutory we Würzburgu swětowy rekord za „najdlěšu warjetejowu show swěta“ pokazać. Měli k tomu 6 050 minutow bjez přestawki wustupować. Hač do soboty w 22.49 hodź. budu profijowi a hobbyjowi wuměłcy z Němskeje a dalšich krajow swoje zamóženje demonstrowali. Zarjadowar mjenuje jewišćowy program „titu dźiwow“.
Kaž Hadam a Jěwa móžeš wot spočatka měsaca tež w Parisu derje jěsć hić. Wšu swoju drastu a mobilny telefon maja hosćo w restawranće nahich „O’Naturel“ do dinnera do kamora połožić, kaž powěsćernja AFP rozprawja. Domjace črije přewostaja hosćenc, wuwzaće pak je za žony, kotrež nochcedźa so swojich nadróžnych črijow wzdać. Lokal ma běłe sćěny a čorne stólcy. Swoje městno dyrbiš do toho rezerwować dać.
W skupinje lěpje dźěłaja
Paris/Berlin (dpa/SN). Socialne kompetency na dźěłowych wikach nabywaja na wuznamje. Nětko je PISA-studija prěni raz přirunowała, kak derje móža šulerjo w skupinje problemy rozrisać. Wuslědki su dźensa předstajili, po kotrychž leži Němska nastupajo tule socialnu kompetencu mjez 10. a 14. městnom z 50 kubłanskich systemow. Byrnjež to fachowcy za „jara dobry wuslědk“ měli, je kóždemu pjatemu dźewjatkarjej w Němskej ćežko, problemy w teamje rozrisać.
Při wotsunjenju kooperować
Wanzleben (dpa/SN). Sakska, Saksko-Anhaltska, Durinska a Braniborska móhli přichodnje při wotsunjenskej jatbje wušo hromadźe dźěłać. Na to su so nutřkowni ministrojo krajow wčera na zetkanju w saksko-anhaltskim Wanzlebenje dorozumili. Šefojo ressortow su sej přezjedni, zo trjebaš w tymlu času wotpowědne móžnosće, zdźěli hosćićel, nutřkowny minister Saksko-Anhaltskeje Holger Stahlknecht powěsćerni dpa. Jeho sakski kolega Markus Ulbig (wobaj CDU) tuchwilu tajke zarjadnišćo wuhotuje.
Dojednanje podpisałoj
Steinmeier strony namołwił
Berlin (dpa/SN). Zwjazkowy prezident Frank-Walter Steinmeier chce dźensa popołdnju ze šefom FDP Christianom Lindnerom wo tym rěčeć, hač su hišće šansy za jamaisku koaliciju. Powěsćernja dpa rozprawja tež wo zetkanju Steinmeiera do toho z předsydomaj Zelenych Simonu Peter a Cemom Özdemirom.
Po zwrěšćenych sonděrowanjach jamaiskich partnerow bě zwjazkowy prezident wčera strony namołwił, so znowa wo wutworjenje knježerstwa prócować. „Štóž so we wólbach wo politisku zamołwitosć požada, njesmě so potom tłóčić, hdyž ju ma“, rjekny Steinmeier wčera po zetkanju z kanclerku Angelu Merkel (CDU) na hrodźe Bellevue.
Merkel je za nowe kanclerstwo k dispoziciji, mjeńšinowe knježerstwo z měnjacymi wjetšinami wona wotpokazuje.
Ćišć na SPD mjeztym přiběra. Strona njeměła so zamołwitosće za kraj wzdać a so znowa do wulkeje koalicije z uniju podać, kaž bě słyšeć. To pak stronske předsydstwo wčera wotpokaza, byrnjež zwonka njeho tež hłosy za tajki krok byli.
To a tamne (21.11.17)
Bjezmała by 63lětna Natalja Wlasowa z Woronježa dobyće rekordneho lotoweho jackpota w Ruskej zapasła. Pruwujo tipowanski lisćik njebě jeje wnučka pytnyła, zo je wowka dobyła. Hakle tydźeń pozdźišo, jako z wozjewjenjow zhoni, zo dobyćerja jackpota z regiona pytaja, Wlasowa sama lisćik hišće raz pruwowaše a njemóžeše swoje zbožo zapřimnyć. Wona bě rekordny jackpot poł miliardy rublow (něhdźe 7,2 milionaj eurow) dobyła.
Pozdatna bomba před twarjenjom sudnistwa w sewjeroitalskim Mailandźe wopokaza so jako něšto cyle hinaše hač myslene – jako młynčk za marihuanu. To zwěsćichu specialisća hakle, po tym zo bu areal wobšěrnje zrumowany a woni metalowy objekt přepytowachu. Mějachu jón za ručnu granatu, kaž italska powěsćernja Ansa informuje.
