Barcelona (dpa/SN). We wobłuku konflikta wokoło hibanja wo njewotwisnosć Katalonskeje su separatistiske organizacije wobydlerjow regiona namołwjeli bankam zeškodźeć. Tak měli ludźo masiwnje pjenjezy ze swojich kontow najwjetšich pjeć bankow wotzběhować. Akciju chcychu dopołdnja w postajenym času wotměć. Namołwa měri so přećiwo zajeću prezidentow wobydlerskeje iniciatiwy katalanskeje narodneje zhromadźizny a kulturneho towarstwa Omnium Cultural.

Konflikt mjez katalanskim regionalnym a španiskim centralnym knježerstwom je so po wotběženju ultimatuma wčera přiwótřił. Španiski ministerski prezident Mariano Rajoy bě sej žadał, hibanja wo njewotwisnosć zakońčić. Tole je regionalny prezident Carles Puigdemont wotpokazał. Tuž připowědźi Rajoy nućenske naprawy, wo kotrychž chce rada ministrow jutře w Madridźe wuradźować. Mjeztym su kónc tydźenja w Barcelonje demonstracije předwidźane.

Drježdźany (SN). Sakske statne knježerstwo je na swojim kabinetnym posedźenju wutoru wobzamknyło změnić zakoń, po kotrymž dóstanu slepi wobydlerjo wosebitu přiražku. Tole měli Sakskemu krajnemu sejmej předpołožić. Naćisk změny zakonja předwidźi zwyšenje přiražkow potrjechenym. Tak měli sylnje słabowidni měsačnje dźesać eurow wjac dóstać, štož wučinja potom 62 eurow. Wosobam bjez słucha chcedźa město 103 eurow měsačnje 115 eurow dać. Sylnje­ zbrašenym dźěćom chcedźa při­ražku wot 77 eurow na 100 eurow mě­sačnje zwyšić. Prěni raz předwidźi naćisk zakonja tež měsačnu přiražku slepym a hłuchim we wysokosći měsačnje 147 eurow.

„Moderatne zwyšenja su hladajo na socialnu politiku woprawnjene. Chcemy wšitkim potrjechenym polěpšenje žiwjenskeje situacije zmóžnić“, zwurazni sakska socialna ministerka Barbara Klepsch (CDU). Za swójby ze zbrašenymi dźěćimi je spěchowanje a hladanje lo­gistiske a časowe wužadanje. Ze zwyšenjom přiražki ma jich sakske knježerstwo bóle podpěrać.

Žona šefa chudeho kraja w Africe smě tež raz stokaratny diamantny pjeršćeń w hódnoće 1,35 milionow dolarow měć. Ke kwasnemu dnjej je sej mandźelska prezidenta Simbabwe Grace Mugabe přeće spjelniła a wosebitu debjenku skazała. Zjawnosć njeby drje ženje wo tym zhoniła, tola pjeršćeń je nětko pad za sudnistwo. Po měnjenju Mugabe njebě debjenka kwalitatiwna dosć, tuž žada sej wot wikowarja 1,23 miliony dolarow wotškódnjenja.

Z rekordnymi 6,52 promilomaj w kreji su wopiteho muža w Mnichowje našli. Wutoru bě so na tamnišim dwórnišću zwjezł, zwjazkowa policija zdźěli. Kaž so wukopa jednaše so wo 61lětneho ze sakskeje Šwikawy. Policija dowjeze muža do chorownje. Kaž zastojnicy dale rozprawjachu móžeše wón samo hišće rěčeć a twjerdźeše, zo je tola jenož jednu měrku (Maß) piwa pił.