Lipsk (dpa/SN). Sakski ministerski prezident Michael Kretschmer je so za to wuprajił, jasnje dźělić mjez mediciniskim cannabisom a priwatnym wužiwanjom drogi. „Tule w Lipsku wuknjemy, zo stej to dwě wšelakej wěcy, kotrejž dyrbimy jasnje dźělić“, rjekny politikar CDU při wopyće Lipšćanskeje skupiny „Grünhorn“, kotraž wužiwanje cannabisa w zjawnosći rjaduje a organizuje.

Byrnjež Kretschmer priwatnemu wužiwanju konopje dale kritisce nastajeny był, chcył so wón za to zasadźeć, zo w mediciniskim wobłuku konop jako hojenski srědk dale nałožuja. Při tym měli so jasne rjadowanja zdźěłać, kotrež zasadźenje mediciniskeho cannabisa dołhodobnje zmóžnja a jeho wuwiću polěkuja.

Po dźělnym legalizowanju konopje loni su běrokratiske zadźěwki widźomnje znižili. Mjenje trezorow, mjenje papjery za dokumentaciju a mjenje policajskich kontrolow, zdźěla wikowar lěkow Canymed. Unija CDU/CSU bě w přihotach wólbow zwjazkoweho sejma připowě­dźiła, zo chcyła zakoń k wužiwanju ­cannabisa zaso wotstronić. Tón rjaduje priwatne a lěkarske wužiwanje.

Prastare čłowjeske kosće w nakupowanskej toši su tele dny w archeologiskim běrowje radnicy w hessenskim Fulda wotedali. 1 500 lět stare čłowjeske powostanki pochadźeja z wurywanja z lěta 1965 pola Göttingena. Tehdy móžachu sej dobrowólni pomocnicy někotre kosće jako dar sobu domoj wzać. Pomocnik wo kosće dlěje njerodźeše a je znatemu dari. Tón přepoda je, zawite do nowin tehdyšeho časa, slědźerjam w radnicy.

Handy za dener předał je muž w bayerskim Kitzingenje – a je tole spěšnje zaso wobžarował. 49lětny měješe drje lóšt na dener a je mužej mobilny telefon za pjeć eurow předał. Po tym zazwoni policiju z nuzowym čisłom a twjerdźeše, zo su jeho wobkradnyli. Policisća noweho wobsedźerja zazwonichu. Zastojnicy 49lětnemu telefon wróćichu – zhromadnje ze skóržbu wudawanja njeskutka dla.

Amman (B/SN). Na přibrjohu rěki Jordan, hdźež bu Jězus křćeny, je krótkodobnje jedna z najwjetšich cyrkwjow na Bliskim wuchodźe za 2 000 wěriwych na płoninje 1 500 kwadratnych metrow nastała. Woswjećenje cyrkwje na wysokim swjedźenju křćeńcy Knjeza w Jordaniskej nawjedowaše kardinalny statny sekretar Swjateho stoła Pietro Parolin. W nowej cyrkwi móža putnicy tež wotpusk spožčeny dóstać.

Křiže za komanderow

Moskwa (B/SN). Na hodownej Božej mši spjelni Moskowski patriarch Kyril I. próstwu prezidenta Wladimira Putina a je dźewjeć křižow za ruskich komanderow wójska „za wosebje wažne nadawki w specialnej operaciji za škit wótčiny“ žohnował. Na to so wobaj wobjimaštaj. 36hodźinsku wójnsku přestawku, zo bychu Ukrainjenjo hody swjećić móhli, pak njeje Putin tónkróć přizwolił.

Wopomnjeće woporow

Rom (dpa/SN). Bamž Franciskus je plany Donalda Trumpa nastupajo restriktiwnu migracisku politiku kritizował. Jedne z wólbnych přilubjenjow Trumpa bě „najwjetša akcija wotsunjenja w stawiznach USA“. Na tute plany narěčany rjekny Franciskus w rozmołwje ze žurnalistami italskeje telewizije: „To by wulka hańba była. To njeńdźe. Njeje to puć, wěcy rozrisać.“ Poměr mjez Trumpom a bamžom Fraciskusom je hižo dlěši čas napjaty.

Hroža nowe suche wichory

Los Angeles (dpa/SN). Byrnjež najhórše w Los Angelesu přetrate było, dyrbja so po najnowšich informacijach wjedrarjow w pobrjóžnej metropoli USA na nowe wohenje nastajić. Fachowcy warnuja před nowymi strašnymi suchimi wichorami, kotrež móhli z wulkej prócu podu­šene wohenje zaso zamiškrić. „Ekstremne wohenjowe wjedro“ móhło hač do jutřišeho trać. Kónc tydźenja bě so połoženje polěpšiło. Tójšto ludźi je so mjeztym do potrjechenych kónčin nawróćiło.

Miliardy Ukrainje do wólbow