Berlin (dpa/SN). W zwjazkowym sejmje wobjednawachu dźensa popołdnju dwě próstwje frakcije CDU/CSU, kotrejž měrještej so na migracisku politiku a a nutřkownu wěstotu. Nimo toho chcyše ­kancler Olaf Scholz (SPD) knježerstwowu deklaraciju wo smjertnym nadpadźe z nožom w Aschaffenburgu předstajić.

Naćisk frakcije unije, wo kotrymž chcedźa wosobinsce wothłosować, ma dotalnu migracisku politiku změnić a wěstotnym institucijam přidatne prawa přizwolić. Při tym wuradźuja mjez druhim wo wotpokazanju za azylom pytacych při mjezach kraja abo wo zajeću požadarjow azyla, kotryž njemóža wotsunyć.

Po tym, zo je z Afghanistana pochadźacy muž, kiž měješe Němsku po­prawom dawno hižo wopušćić, minjeny tydźeń w Aschaffenburgu dźěćo a muža zakłół, steji politika migracije w srjedźišću wólbneho boja. Předsyda CDU Friedrich Merz bě sej na to nowe razne naprawy žadał. SPD a Zeleni jemu wu­mjetuja, zo móhła při wothłosowanju wjetšina z AfD nastać, štož nichtó njecha.

Tuchwilu šokuje chinski start-up z pozdatnje sensacionalnej wunamakanku kumštneje inteligency high-tech-miliadarow w USA: Snadź to pokazuje, zo móžeš z mudrej hłójčku a tež bjez wulkeho kapitala najbóle doprědkarske wěcy zdokonjeć. Jako z Kamjeneje pochadźacy serbski IT-ženij Mikławš Joachim Wićaz prěni blidowy ličak NDR wuwi, běše naš swět hišće zawrjeny a politiscy funkcionarojo NDR wuznam skutka spóznali njejsu. Dźensa mamy w Drježdźanach „Silicon Saxony“, pola nas rosće Astrocentrum Łužica, a tež dokoławokoło digitalizacije serbšćiny widźimy, zo tu mudrych hłójčkow je. Dźensniši warnowanski dźeń hospodarstwa skedźbnja na politiske puta a běrokratiske brěmjenja, kotrychž wotstronjenje sej předewzaćeljo žadaja. Wo tym móža wolerjo bórze wothłosować. Tola wo hospodarskim wuspěchu rozsudźeja na kóncu slědźerske ideje a předewzaćelska zmužitosć – a tych je tradicionelnje we Łužicy tójšto. Wužijmy tón potencial za přichod! Marcel Brauman

Wobydlerjo, měšćanscy radźićeljo a čłonojo Choćebuskeje židowskeje wosady su předwčerawšim, póndźelu, na mjezynarodnym Dnju wopominanja holocausta při wopominanskej tafli za něhdyšu synagogu w Choćebuzu wěncy a kwětki połožili. Fararka Johanna Melchior jako zastupniča Choćebuskeje němsko-israelskeje towaršnosće spominaše na židowskich wobydlerjow łužiskeje metropole, kotrychž běchu nacionalsocialisća poniželi, přesćěhowali, wućěrili a morili. UNO bě 27. januar jako mjezynarodny dźeń wopominanja holocausta 2005 składnostnje 60. róčnicy wuswobodźenja koncentraciskeho lěhwa Auschwitz postajiła. Foto: Michael Helbig

Berlin (dpa/SN). Dobre tři tydźenje do wólbow zwjazkoweho sejma bědźi so SPD ze spochi woteběracej nahladnosću mjez wolerjemi. Samsny čas bywa AfD dale sylniša. Po naprašowanju instituta YouGov spaduje SPD ze zwjazkowym kanclerom Olafom Scholzom na čole w tak mjenowanym njedźelnym prašenju wo štyri na nětko 15 procentow. Wuslědk AfD so porno tomu wo štyri procenty na 23 polěpši. Strona wostanje tak druha najsylniša móc po CDU/CSU, kotraž wo jedyn na 29 procentow přiběraše.

Zeleni jako koaliciski partner spadowachu na 13 procentow, FDP ma tři procenty.