To a tamne (13.01.25)
Mjez wopicami w zwěrjencu je parašutist w Nižozemskej přizemił. Přiwšěm měješe muž hišće wulke zbožo: „Sto metrow dale by wón pola elefantow abo lawow był“, rjekny direktor zwěrjenca njedaloko Utrechta. Wětřik bě parašutista wotnjesł. Poprawom měješe wón na bliskim sportnišću přizemić, hdźež regionalny koparski klub nowy kumštny trawnik poswjeći.
Nimale 200 000 eurow je 65lětna žona w braniborskim Zehdenicku internetnym wobšudnikam přepokazała. Kriminelni běchu žonje napowědali, zo so rubježnicy na konto žony měrja. Na to bě jim wona wot lońšeho oktobra cyłkownje 24 króć pjenjezy pósłała. Na kóncu nasta škoda 196 000 eurow. Wobšudnicy běchu so jako fachowcy za wěstotu w internetnym systemje přepokazankow wudawali.
Merz a Habeck jenak sylnaj
Berlin (dpa/SN). Šěsć tydźenjow do wólbow Zwjazkoweho sejma je kanclerski kandidat Zelenych Robert Habeck na woblubowanosći přidobył a ma samsne wuslědki kaž kanclerski kandidat CDU/CSU Friedrich Merz. Na prašenje sćelaka ZDF, koho chcyli jako zwjazkoweho kanclera měć, wupraji so 27 procentow (plus dwaj) ludźi za Habecka a 27 procentow (minus dwaj) za Merza. Zwjazkowy kancler Olaf Scholz (SPD) ma 14 procentow, trochu mjenje hač kanclerska kandidatka AfD Alice Weidel z 15 procentami (minus jedyn).
Italska Ukrainje dale pomha
Rom (dpa/SN). Italska ministerska prezidenta Giorgia Meloni je Ukrainje dalšu podpěru Italskeje přilubiła. W rozmołwje z ukrainskim prezidentom Wolodymyrom Zelenskym, kiž bě po zetkanju Ramsteinskeje kontaktneje skupiny do Roma přilećał, rěčeše Meloni wo wobšěrnej podpěrje, zo móhła so Ukraina dale ruskemu nadpadej wobarać. Meloni je sej wěsta, zo USA tež z Donaldom Trumpom Ukrainje dale pomhaja.
Trump juristisce podležał
Hakle poněčim so pokazuje, kak zahubnje su lěsne wohenje w ...
Lěto 2024 najćopliše było
Šlewjer krasnosće preč
Najwažniši wuslědk wčerawšeje rozmołwy Alice Weidel z Elonom Muskom na platformje X bě ryzy čłowjeski: Předsydka AfD je swoju swjatosć wotpołožiła. Šlewjer njewoblakowanosće a krasnosće, kotryž mnozy wokoło njeje widźachu, je preč. Jeje spodźiwne twjerdźenja nastupajo Hitlera a němsku politiku běchu mi dopokaz, zo tež Alice Weidel jenož z wodu wari. Snano bě wona tež jenož přemóžena wot swojich začućow, jako z najbohatšim mužom swěta bjesadowaše. W tajkej wulkej nutřkownej napjatosći druhdy najwjetši kał bledźiš ...
Zo bě Adolf Hitler komunist, móžeš snano Američanam napowědać, kotřiž so za stawizny druhich krajow njezajimuja. W Němskej maja jeho cyle hinak w pomjatku. Ja bych sej z Alice Weidel rady do wopomnišća bywšeho koncentraciskeho lěhwa Buchenwald pola Weimara dojěł. Tam móhła wona najlěpje widźeć, kak je Hitler swoje komunistiske zasady pěstował. Marko Wjeńka
Nowe jednanjaw Awstriskej
Weidel: Hitler bě komunist
Berlin (dpa/SN). Předsydka AfD Alice Weidel je znowa wumjetowanja wotpokazała, zo je jeje rozmołwa z miliardarom Elonom Muskom na platformje X pjenježna lěpšina na dobro AfD a tak snano ilegalne financowanje strony. „To bě ryzy dialog. Ničo přećiwo tomu njerěči, hdyž so čłowjekaj na tajkej platformje rozmołwjataj“, rjekny Weidel wčera wječor sćelakomaj RTL a ntv.
W rozmołwje z Muskom bě Weidel nacionalsocialista Adolfa Hitlera „komunista“ mjenowała. Tute wuprajenje wona tež napřećo RTL a ntv zakitowaše: „Sym ekonomka a nam je dospołnje jasne, zo bě Adolf Hitler lěwicar“, wona rjekny.
W rozmołwje z Muskom Weidel nimo toho twjerdźeše, zo bě Angela Merkel „prěnja zelena kanclerka“ a zo dźěći w šulach Němskeje ničo njenawuknu, chibazo zasady genderowanja.
Rozmołwu Weidel a Muska běchu politikarjo druhich stron w předpolu wótrje kritizowali. Mjez druhim namjetowachu pruwować, hač njejedna so wo ilegalnu politisku podpěru z wukraja.
Wočakowanja na Kamjenicu wulke
Kamjenica (dpa/SN). Předewzaća w Kamjenicy a wokolinje maja wulke wočakowanja hladajo na lěto 2025, w kotrymž je jich město kulturna stolica Europy. Wosebje hotele, hosćency, turistiske a kulturne předewzaća, ale tež wobchody nadźijeja so lěpšich wobrotow, zdźěla hłowny jednaćel industrijneje a wikowanskeje komory Kamjenicy, Christoph Neuberg. Kak so prudy wopytowarjow konkretnje wuskutkuja, hodźi so tuchwilu jenož ćežko rjec.
Za turizm je kulturna stolica hoberska šansa, zdźěli jednaćelka Turistiskeje a marketingoweje towaršnosće Sakska, Veronika Hiebl. „Kamjenica a wša wokolina dóstanjetej po tutym puću kedźbnosć, kotruž sej zasłužatej.“ Nazhonjenja bywšich kulturnych stolicow kaž Essena pokazuja, zo ma titul tež lěta po tym hišće pozitiwne wuprudźenje. Nimo toho ludźo swoje jězby krótkodobnje knihuja. Hižo nětko zamołwići na wikach mjezynarodnych turistikarjow registruja, zo zajim za Kamjenicu spochi přiběra. Tež tójšto předewzaćelow na kongresach a posedźenjach w Kamjenicy wočakuja. „Pozitiwne wuwiće, kotrež smy hižo loni wobkedźbowali, pokročuje.“
Tójšto hosći do noweho lěta witali
Železnica trjeba miliardy eurow
Berlin (dpa/SN). Za dołhodobne financowanje marodneje syće kolijow w Němskej trjeba železnica po měnjenju nawody jeje předsydstwa Wernera Gatzera něhdźe 150 miliardow eurow. „Železnica ma wulke ćeže, kiž dyrbja so nuznje rozrisać. Infrastruktura je zestarjena, přežadana a stajnje zaso defektna“, rjekny wón časopisej Focus a připowědźi: „150 miliardow eurow budźe w přichodnych dźesać lětach znajmjeńša trěbnych.“
Kredity, kotrež dyrbi Zwjazk za to brać, su hladajo na woteběrace zadołženje zastupujomne, je sej wón wěsty. Nimo toho dyrbjeli so wuměnjenja za bórzomne inwesticije stworić.
Hižo spočatk 2024 bě zwjazkowy minister za wobchad Volker Wissing (bjezstronski) fonds k financowanju infrastruktury namjetował. Na nim měli so tež priwatni inwestorojo wobdźělić. Konkretny natwar fondsa njeje přiwšěm jasny. Tež zastupnicy branše maja rozrisanje z fondsom za zmysłapołne. Hladajo na hłuboko sahace problemy na polu infrastruktury železnicy pak je dołhodobne rozrisanje trěbne, kotrež skići industriji planowansku a produkcisku wěstotu.
