Wolejbul je mjeztym tež w Serbach woblu­bowana sportowa družina. Nimo wólnočasneho wolejbula mamy tež něko­tre aktiwne serbske wolejbulowe mustwa, kiž při dypkowych hrach pilnje­ wo dypki při wysokim saku a dobre­ zaměstnjenje w tabuli wojuja. Zo by­ so to prawje poradźiło, specializuja a wukmanjeja so jednotliwe hrajerki a jednotliwi hrajerjo na wěste hrajne pozicije. Dźensa předstaji so pozi­cija diagonalneje nadběhowarki/diagonalneho nadběhowarja.

W prěnim wolejbulowym mustwje Hrajneho zjednoćenstwa Pančicy-Worklecy, kotrež hraje we wobwodnej lize žonow stafle 2 wuchodneje Sakskeje, su to Jana Kralec (wokomiknje w maćernym do­wolu), Anita Salowskec, Julia Brězanowa a Anne Kurzetz. Z Markom Brězanom, Maksom Jurakom, Stefanom Wjenku a Paulom Hančikom ma prěnje mustwo Sportoweho towarstwa Viktorije Wor­klecy hnydom štyrjoch nadběhowarjow na tutej poziciji (Serbske Nowiny hižo wo tym­ rozprawjachu).

EV Landshut – Łužiske liški Běła Wo­da 3:4 (0:2, 1:1, 2:1)

Zo pojědu Běłowodźenjo pjatk wječor pola hewak w swójskej hali jara sylnje wustupowacych Landshućanam z do­by­ćom zaso domoj, z tym mnozy ličili njejsu. Dźewjeć z minjenych dźesać hrow wšak Łužičenjo do toho přěhrachu. W prěnjej hrě z nowym trenarjom Chris­topherom Straubu pak liški wosebje na bo­jowniskim polu skónčnje zaso raz pokazachu, što woprawdźe móža.

Łužiske liški Běła Woda –

EC Kassel Huskies 2:3 (0:0, 1:1, 1:2)

Tuta partija přećiwo načolnikej z Kassela padnje za liški do kategorije „škoda“! Běše­ to přez dołhe fazy jara dobry wukon domjacych. Faworit z Kassela měješe mjenujcy swoju lubu nuzu, sej šansy wuhrać! Jenički manko snano bě, zo dyrbjachu hosćićeljo přehusto na chłostansku ławku. To dźěše chětro do nohow a dla toho runje we wšorozsudnej fazy krótko do kónca mocy pobrachowachu.

W prěnim połčasu běchu domjacy opti­sce lěpši, wulke móžnosće pak njewuskočichu. Tež na tamnym boku nic a tak dźěše bjez wrotow do prěnjeje přestawki. W druhim dźělu hry tłóčachu liški­ na prěnje wrota! Te pak padnychu w tej fazy za hosća. Před wrotami suny Kasselski nadběhowar z mjerwjeńcy puk přez wrotowu liniju. Jenož štyri mjeńšiny pozdźišo pak Hornjołužičenjo wurunachu. Po dobrej přihrawce Kalea Kerbashiana přetwori Korbinian Geibel do wrotow. Nimo někotrych dobrych šansow na woběmaj bokomaj so ničo naspomnjenahódneho wjac njesta a tak bě wotwidźeć, zo budźe hra hač do poslednjeho wokomika napjata.

Kopar Mario Crnički, kotryž bě spočatk oktobra k FC Energiji Choćebuz změnił, je so zranił. Němsko-chorwatski nadběhowar bě sej do treningoweho zazběha při lěsnym běhu nohu knyknył. Při tym je sej 23lětny rodźeny Mnichowčan patellažiłu tak jara zranił, zo dyrbi so operować dać. Crnički je w swojej dotalnej karjerje najwjace hrow za druhe mustwo, za U 19 a za U 17 FC Bayern Mnichow hrał. Za U 19 FCB 34 partijow, w kotrychž třěli wón 8 wrotow, za U 23 FCB bě 23 razow zasadźeny a trjechi 15 króć a za rezerwu FCB třěli dwoje wrota w 16 hrach.

Mjeztym čakaja w Choćebuzu na znamjo Sewjerowuchodneho koparskeho zwjazka, hdy z dypkowymi hrami pokročuja. Rěč je wo prěnim kóncu tydźenju w měrcu. Georg Zielonkowski