Wobchad awtodróhi haćiło je wojerske lětadło wčera mjez Berlinom a Mnichowom. Po A 9 transportowachu mašinu typa Eurofighter do hornjobayerskeho Manchinga, hdźež chcedźa ju zwuporjedźeć. Dokelž bě nastroj šěrši hač jědnaće metrow, njemóžachu jón awta přesćahnyć. Wodźer wosebiteho nakładneho wozydła, kotrež njepohibowaše so spěšnišo hač 60 km/h, tuž wospjet na šěršich městnach zastawaše, zo móhli za nim jěduce awta nimo jěć. Lětadło bě so při manewru wobškodźiło.
Z mlokom palace so awto hašał je wodźer nakładneho awta pola Kulmbacha. Kaž policija zdźěli, bě so wobruč horceho borzdźidła dla zapaliła. Šofer spěšnje reagowaše a da něšto mloka z wulkeho tanka wuběžeć, zo by z nim woheń hašał. Jako policija dojědźe, bě wón płomjenja hižo podusył a tak móžnym wjetšim škodam zadźěwał.
Stawk rozšěrjeny
Podstupim (dpa/SN/ch). Stawk kubłarkow a socialnych dźěłaćerjow w dźěćacych přebywanišćach Braniborskeje su dźensa hišće raz rozšěrili. Po wozjewjenju dźěłarnistwa ver.di wostachu dalše zarjadnišća na wuchodźe kraja zawrjene. Wčera stawkowachu po informaciji dźěłarnistwa sta komunalnych zarjadnišćow w jědnaće wokrjesach. Wot wutory bu njewobmjezowany stawk krok po kroku rozšěrjeny. Po dohromady nimale třoch tydźenjach pak pokazowaše dźěłarnistwo runje tak kaž zjednoćenstwo komunalnych dźěłodawarskich zwjazkow zwólniwosć k rozmołwam. Přiwšěm njeje hišće jasne, hdy a hdźe so tarifowi partnerojo přichodny tydźeń zetkaja.
Pytaja pomocnikow
Njebjelčicy (AW/SN). Iniciatiwna skupina Serbski sejmik zaběraše so na swojim wčerawšim posedźenju w Njebjelčicach z předpołoženymi naćiskami za próstwu wo zakonjedawsku proceduru wutworjenja ramikowych wuměnjenjow za demokratisce legitimowane ludowe zastupnistwo serbskeho ludu. Po diskusiji dojednachu so wobdźělnicy na krótki a jadriwy naćisk přitomneho jurista. Naćisk ma so hač do přichodneho zeńdźenja dnja 10. junija juristisce wudospołnić a wobzamknyć. Potom chcedźa iniciatiwnicy próstwu w serbskich towarstwach a gmejnskich radach Hornjeje a Delnjeje Łužicy předstajić a wot jich zastupjerjow sobu podpisać dać. Dokument, dalše posudki a žórła wo prawje samopostajowanja serbskeho ludu kaž tež koncept za tutón parlament pósćelu w septembrje prezidentomaj Sakskeho a Braniborskeho krajneho sejma dr. Matthiasej Rößlerej (CDU) a Britće Stark (SPD).
Zürich (dpa/SN/K). Kaž błysk z módreho njebja je wčera powěsć do zjawnosće dyriła, zo su zastojnicy šwicarskeje policije sydom wysokich ludźi swětoweho koparskeho zwjazka FIFA zajeli. Njewočakowanu akciju přewjedźechu na próstwu ameriskeje justicy, kotraž wumjetuje potrjechenym organizowane złóstnistwo a korupciju. Cyłkownje přepytuje ameriska FBI přećiwo 14 wosobam. Spočatk 1990tych lět běchu so wone pječa z něhdźe 110 milionami dolarow wobtykać dali a za to prawa zwičnjenja mišterstwow Copa América 2016 wudźěleli.
Separatnje su zastojnicy šwicarskeje policije w centrali FIFA elekroniske daty a dokumenty zawěsćeli. Přisłušne statne rěčnistwo zahaji chłostanske procedury w zwisku z přenjesenjom swětowych mišterstwow w Ruskej 2018 a Kataru 2022. Po wudawanju wyšnosće dźe wo podhlad płokanja pjenjez.