Budyšin (AN/SN). Wot oktobra hižo je městno zamołwiteje abo zamołwiteho za runostajenje w Budyskim wokrjesu njewobsadźene. Kaž rěčnica Sabine Rötschke zdźěli, pyta krajnoradny zarjad tuchwilu internje za kmanymi kandidatami. „Tele postupowanje we wjacorych schodźenkach je krótko do zakónčenja. Dalokož njehodźi so naležnosć rozrisać, ma so městno zjawnje wupisać“, wona na naprašowanje zdźěli. Nadawki, kotrež městno wopřijima, spjelnja tuchwilu zastupjerka. To nic pak w dotalnym wobjimje, dokelž njeje kolegina jeničce za tónle wobłuk přistajena. Za Budyski krajnoradny zarjad su nadawki zamołwiteje abo zamołwiteho za runostajenje winowatostny nadawk. To korjeni we hłownych wustawkach, kotrež so na wotpowědne zakonje měrja. Přiwšěm pokaza wokrjes na to, kak wažny angažement za škit žonow kaž tež mužow přećiwo namocy je. Tak je minjeny pjatk, dźeń do mjezynarodneho dnja škita před namocu přećiwo žonam, před krajnoradnym zarjadom chorhoj kampanje zmawowała, zo by wokrjes zjawne na to skedźbnił.

FabMobil z.t. je přez cyłe lěto po puću, zo by kreatiwne technologije do wjesnych kónčinow přinjesło. Minjeny tydźeń wopyta swobodnu wyšu šulu we Wulkej Dubrawje. Milenka Rječcyna je so z jednaćelom předewzaća FabMobil, Bosćijom Pjacu, rozmołwjała.

Kotre wobsahi sće šulerjam we Wulkej Dubrawje posrědkowali?

B. Pjaca: Na poskitku su so zajimowani šulerjo wšitkich rjadownjow wobdźělili. W prěnim rjedźe su woni po swójskich idejach w kompjuterowym programje figury kreěrowali a je naposledk w 3D wučisćeli.

Ma Waš angažement za kubłanje dźěći a młodostnych dale a wjetši wuspěch?

B. Pjaca: Tak sej to znajmjeńša přejemy a tež začuwamy. Přetož digitalizacija postupuje – hač to chcemy abo nic. ­A młodźina je wotewrjena za nju. Z našim FabMobilom podpěrujemy a rozšěrjamy poskitk zaběry na tutym polu.

Na kotre wašnje so tónle wuspěch pokazuje abo snano tež mytuje?

Maximilian Gruber

Mjeztym 149. raz schadźuje so jutře, sobotu, znowa serbska hautevolee w Budyskej „Krónje“. Wšo je derje přihotowane, wšitko je kaž přeco – wěčna normalita sebjechwalby. Tole zda so w Serbach tak a tak recept za wšo być. Wšojedne hač nětk program schadźowanki abo Serbski sejm: Pola nas je a wostanje wšo, kaž přeco hižo bě. Inowacija, takrjec diktat noweho swěta, je njepřećel prěnjeje klasy. Ideje? Haj prošu! Njech pak su swěrne kredu: „Bohu k česći, Serbam k wužitku.“ Argumenty za móžne nowe struktury su jenož potom witane, hodźa-li so tež do masterplana běrowow na Póstowym naměsće 2 w Budyšinje. Ale to wšak nětko najprjedy raz wažne njeje. Chcemy tola swjećić! Našich serbskich akademikarjow, kotřiž budu jónu přichod našeho naroda. Zajimawe drje budźe, koho abo što změja woni lětsa zaso w swojich kabaretach kritizować. Wšako su wone někak posledni wentil, kotryž je za raznu kritiku zwostał. Na haj a ŠERŠEŃ. Hewak je so zjawna kritika, bohužel, w dalokej měrje z diskursa zhubiła, wšojedne hač w Serbach abo druhdźe.

149. schadźowanka bliži so z wulkimi krokami. Wo stawje přihotow a nowosćach je so Maximilian Gruber z režiserku wječora, Katku Pöpelec, roz­mołwjał.

Lětsa přihotujeće zhromadnje ze Symanom Hejdušku schadźowanku hižo štwórty raz – mataj mjeztym tajke něšto kaž rutinu?

K. Pöpelec: Nó haj, za naju je wšak to nětko hakle druha schadźowanka, kotraž so z publikumom w Krónje wotměwa. Přirunujo z lońšimi přihotami móžu tola rjec, zo so wotběhi dale a bóle zjednorjeja. Zakładny system, kotryž smój sebi ze Symanom před lětami zarjadowałoj, dale zdźeržimy, wšako z nim jara derje dźěłamoj: Syman stara so wo chóry a kapały a ja staram so wo kabarety. Moje dźěło wobsteji w tym, zo wotrěču sebi ze skupinami, kajke su jich plany. Zwoprědka ­sebi skeče potom wězo tež předčitam a dawam tón abo tamny tip. Tež rekwizity a podobne leža w mojej zamołwitosći.

Kajki wupada staw přihotow lětsa?

K. Pöpelec: Přihoty su wotzamknjene. Program je w dalokej měrje nastajeny. Pobrachuja jenož hišće poslednje proby, ale tute chcemy pjatk nawječor a sobotu do spočatka programa přewjesć. Schadźowanka móže přińć!