Beachsoccer we Wojerecach

wutora, 14. julija 2015 spisane wot:
Dohromady dźewjeć mustwow je so minjenu sobotu we Wojerecach na koparskim turněrje hinašeho razu wobdźěliło. Mustwa njewubědźowachu so tam na trawniku abo twjerdym hrajnišću, ale na mjechkim pěsku. Turněr doby imobilijowa firma „Žiwjenske rumy“, kotraž bě turněr zhromadnje z FC Łužicu Wojerecy organizowała. Na wobrazu widźimy Ralbičana Dennyja Gloxyna, kotrehož Fabian Bejma (čo. 6) při wulk­otnej třělwje wobkedźbuje. Dohromady hraješe šěsć młodych Serbow z Ralbic a wokoliny za pozdźišeho dobyćerja. Foto: Werner Müller

Rjana gesta Biskopičanskich hrajerjow

wutora, 14. julija 2015 spisane wot:

Njedawno hakle rozprawjachu Serbske Nowiny wo njerjanych scenach w koparskim pokalnym finalu A-młodostnych mjez ST Radworjom/Wulkej Dubrawu a FC Łužicu Wojerecy. Tam běchu přiwisnicy přećiwnika na Radworskich koparjow najwótriše antiserbske parole bjakali. Zo pak tež nawopak dźe, dopokazuje tónle wobraz. Tu přeja koparjo druheho mustwa Biskopičanskeho towarstwa serbskemu sobuhrajerjej Antoniusej Škodźe z Wotrowa dobre polěpšenje. Byrnjež w mustwje ani jenički druhi Serb sobu njehrał, napisachu koparjo Antoniusej strowotniske přeća w serbskej rěči na plakat a pokazachu jón do poslednjeje hry přećiwo Wojerecam. Tale chwalbyhódna akcija je dopokaz, zo eksistuje tež akceptanca a sympatija serbskim hrajerjam a mustwam napřećo a zo nimaja antiserbske parole na našich łužiskich hrajnišćach žane městno.

Přizjewjenja hišće móžne

póndźela, 13. julija 2015 spisane wot:

Přichodnu sobotu, 18. julija, wotměje so we Worklecach 2. captainscup we volleyballu. Jurij Bjeńš měješe k tomu na hłowneho organizatora Maćija Šěna z Hrańcy někotre prašenja.

Maćijo, sobotu budźe we Worklecach zaso volleyballowy turněr z mjenom captains­cup. Što tele mjeno poprawom woznamjenja?

M. Šěn: My we Worklecach pijemy rady dobry rum z mjenom Captain Morgan a z toho smy sej mjeno wotwodźili (so směje). Ale žadyn strach, tón njepijemy wosrjedź hrow, jeli, jenož po tym.

Kelko mustwow je so na lońšim captains­cupje wobdźěliło?

M. Šěn: Na trawniku mějachmy dźesać mustwow, na beachvolleyballnišću dźewjeć dwójkow. Lětsa je jich hižo wosom beach-dwójkow, ale jeničce šěsć cyłkow za hry na trawniku.

To rěka, zo smědźa so mustwa hišće přizjewić?

Přewjele šansow wuwostajili

póndźela, 13. julija 2015 spisane wot:

Koparska wubranka młodźiny C dorosta so wubědźowała

Kónčna tabulka

mustwo hry/dypki/wrota

HZ Kubšicy/ Bukecy 4 8   5:2

Budissa Budyšin 4 7   4:3

Serb. koparska wubranka 4 1   2:6


Při ekstremnych temperaturach wotmě so njedawno w Kubšicach koparski cup młodźiny C, na kotrymž so tež Serbska koparska wubranka (SKW) wobdźěli. Dalšej­ mustwje běštej Budissa Budyšin a Hrajne zjednoćenstwo Kubšicy/Bukecy (HZ). Mustwje z Wulkeje Dubrawy a wubranka Hornjeho Kraja běštej bohužel wotprajiłoj. Organizatorojo so tuž do­­jednachu, zo kóždy přećiwo kóždemu 20 minutow w dwěmaj hromaj nastupi. To rěkaše, zo dyrbješe kóždy cyłk do­hro­mady 80 mjeńšin za bulom honić, štož při tej horcoće runjewon jednore njebě. Přiwšěm SKW do swojeje prěnjeje hry přećiwo domjacym wulkotnje startowała. Po połojcy hrajneho časa poradźi so Fabianej Hejdušce (SJ Chrósćicy) 1:0. Dalše składnosće pak njejsu serbscy koparjo wužiwali. Hač do poslednjeje minuty móžachu woni snadne nawjedowanje dźeržeć, prjedy hač přećiwnik tola hišće wuruna. Škoda, tak zhubichu dypkaj.

Bronzowe Marijine hwězdźički

póndźela, 13. julija 2015 spisane wot:
Dwójce třeće městno docpě Pančičanski volleyballowy dorost ST Marijineje hwězdy na lětušej wokrjesnej spartakiadźe. Nastupili běchu w starobnej klasy holcy U 18 a U 20. Młódše volleyballistki přěhrachu přećiwo MSV Budyšinej z 25:17 a 25:21. W rozestajenju z ST Łužnicu dobychu prěnju sadźbu z 25:11, w druhej pak z 22:25 njezbožownje podležachu. Tež w poslednjej hrě njemějachu zbožo. Módro-běłe Wojerowčanki přesadźichu so po napjatym boju z 28:26 a 25:09. Mustwo U 20 bě lětsa bjez wuhlada na wuspěch. Přećiwnikaj běštej mu­stwje z wob­­wodneje klasy MSV Budyšin a Módro­běłe z Wojerec. Budyšankam podležachu Marijine hwězdźički z 21:25 a 11:25, Módro-běłym dwójce z 9:25.Pětr Bart

Přećiwnik w testowej hrě wysoko poraženy

póndźela, 13. julija 2015 spisane wot:

Budissa Budyšin – FC Aseev 6:1 (4:1)

Za Budyšin zasadźeni: Große – Heppner, Kolan, Pfanne, Kral, Hausdorf, Hoßmang, Rosendo, Hausch, A. Jakubov, Salewski, Fröhlich, Walther, Barnickel, Reher, Čermák, Kunert, probowaj koparjej Klippel a Rupf

W Haselbachtalu hraješe Budissa sobo­tu přećiwo teamej z Brazilskeje. FC Aseev wojuje tam w třećej lize, měješe pak niwow­ krajneho ligista. Partija traješe jeničce­ 70 mjeńšin, dokelž běchu hosćo z ćahom přijěli, kotryž měješe zapoz­dźe­nje. Woni pak dyrbjachu zaso cyle dypkownje wotjěć, a tak bě hra krótša. Wot spočatka hač do kónca běchu Budyšenjo jasnje lěpši, trjebachu pak dohromady 15 mjeńšin, doniž njedocpě Rosendo 1:0. Z wulkotnej třělwu FC Assev jeno tři mjeńšiny na to wuruna. Dalše tři mjeń­šiny pozdźišo pak Salewski na 2:1 zwy­ši. Jakubov a Pfanne postaraštaj so hišće do přestawki wo 4:1. Po tym zo bě so Bar­nicklej 5:1 poradźiło, Budissa wjacorych hrajerjow wuměni. Ćišć wosta dale wulki a Pfanne postara so hišće wo kónčne 6:1.

Hižo jutře, wutoru, přijědźe do Budy­šina třeći ligist Dynamo Drježdźany. Zakop je we 18 hodź.Clemens Werner

Wulki dźeń za Ralbičanskich koparjow

póndźela, 13. julija 2015 spisane wot:

FC Energija Choćebuz

– FSV Budissa Budyšin 1:0 (1:0)

Za Budyšin zasadźeni: J. Jakubov – Kolán, Fröhlich, Kral, Čermák, Reher, Walther, Hausch, Heineccius, Heppner, Hausdorf, Pfanne, Hoßmang, Kunert, Rosendo, Salewski, A. Jakubov, Barnickel a probowi hrajerjo Rupf, Klippel, Parlatz

Minjenu srjedu nastupištej FC Energija Choćebuz a Budissa Budyšin w Ku­lowje přećiwo sebi, zo byštej so wo tak mjenowany „łužiski cup“ wubědźowałoj. Hižo do toho hraještej Kulowska a Ralbičanska młodźina F přećiwo sebi. Ralbi­čenjo drje jasnje přěhrachu, wjeselachu pak so najebać poražku na wulki wokomik. Woni smědźachu po tym mjenujcy profijow Energije Choćebuz na kopanišćo přewodźeć. Před wjace hač 1 000 přihladowarjemi běše to za kóždeho z nich wosebity a njezapomnity wokomik.

Awtor dźensa

Toni Ryćer

Sport (10.07.15)

pjatk, 10. julija 2015 spisane wot:

Wotměja přihotowanske hry

Regionalny ligist Budissa Budyšin hraje sobotu, 11. julija, w 17 hodź. w Rych­bachu přećiwo cyłkej z Brazilskeje, 14. julija we 18 hodź. na Budyskej Młynkec łuce­ přećiwo Dynamu Drježdźany a wot 15. do 19. julija pojědźe mustwo z trenarjom Tomašom Henčlom do treningoweho lěhwa w Bad Blankenburgu. Tam nastupi 18. julija w 14 hodź. přećiwo FC Čerwjeno-běłym Erfurt U 23 a 19. julija w 10.30 hodź. přećiwo Jednoće Rudolstadt.

Satkulabeach-terminy jasne

Radijo Satkula, młodźinski sćelak Serbske­ho rozhłosa, budźe tež lětsa zaso wo přihotowanskich hrach za wulki beachvolleyballowy turněr w Miłoćicach rozprawjeć. Slědowace dny budu stajnje wot 18 hodź. hrać: 13. julija w Nuknicy, 20. julija w Konjecach, 27. julija w Kulowcu, 3. awgusta w Róžeńće a 10. awgusta w Hórkach. Finalne wurisanje wo pokal Radija Satkula budźe potom 17. awgusta wot 18 hodź. w Miłoćicach.

Jěchanski a skakanski turněr

Chróšćenjo so přesadźili

štwórtk, 09. julija 2015 spisane wot:

Tradicionalnje Nowowješćenjo a jich hosćo k wjesnemu swjedźenjej tež sportuja. Tak je z wašnjom, zo wubědźuja so wo­kol­ne wjesne mustwa na koparskim turněrje. Wone drje su so sobotu tež zetkali, kopańcu hrali pak njejsu. Polo, na kotrymž měli poprawom za bulom honić, njemóža ratarskich přičin hač do kónca julija wužiwać. Tak su město toho volleyball hrali. Z pjeć mustwow přesadźi so na kóncu młody cyłk z Chrósćic.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND