Sport (07.08.15)
Kónctydźenska kopańca
Regionalna liga ma swobodny hrajny dźeń, w krajnej lize, krajnej klasy a we wokrjesnej wyšej lize so sezona započina.
08.08. 15:00 Taucha – Jednota Kamjenc
08.08. 15:00 Budissa II – Radebeul
08.08. 15:00 Kulow – Rakecy
08.08. 15:00 Połčnica – Chrósćicy
09.08. 15:00 Ralbicy/Hórki – Kinspork
08.08. 15:00 Njeswačidło – Budissa
08.08. 15:00 Neugersdorf – Biskopicy
08.08. 15:00 Njebjelčicy – Kulow II
07.08. 18:30 Mar. hwězda – Ralbicy II
Volleyballowy turněr
Wohnjowa wobora ze Smjerdźaceje wuhotuje kaž hižo minjene lěta jutře volleyballowy turněr. Za to su Smjerdźečenjo tři hrajnišća na trawniku spřihotowali. Štóž chce hišće mustwo přizjewić, njech so přez Facebook pola Michała Vaceka, Matthiasa Krala abo Martina Schöny naprašuje. Nastupić smědźa cyłki ze štyri do šěsć hrajerjemi. W 13.30 hodź. prěnju hru zahwizdaja, poł hodźiny do toho so wšitke cyłki zetkaja.
Za ironman so přizjewić
Hosćo wo klasu lěpši byli
SJ Njebjelčicy – SJ Chrósćicy 1:7 (0:4)
Při horcym wjedrje witaše Njebjelčanski koparski cyłk minjenu njedźelu dalšeho sylneho přećiwnika. Chróšćenjo ze štyrjomi čěskimi hrajerjemi partiju wot spočatka postajachu a hižo po dźesać mjeńšinach přez Žura a hóstneho Čecha z 2:0 nawjedowachu. Dwě do tři šansy sej Njebjelčenjo přiwšěm nadźěłachu. Po rjanym přihoće Lejnarta pak Ričel přesłabje wotzamkny. A po spěšnym a dobrym posłuženju Čornaka přez Cyža storči Chróšćanski wrotar nisku třělwu z poslednim zasadźenjom k róžkej. Hišće do połčasa zwyšichu hosćo přez Zahrodnika a znowa Žura na 4:0.
Po přestawce docpě sylnje hrajacy Žur z hłójčkowanjom po wólnym kopje swoje třeće wrota. Čestne wrota za SJ Njebjelčicy poradźichu so młodemu Ričlej, kiž přewiny wrotarja z wysokej třělwu (63.). Na to pak hnydom zaso Čech do čorneho trjechi, a kónčny wuslědk 1:7 postaji pjeć mjeńšin pozdźišo Runt. Z mjerwjeńcy před Chróšćanskej klětku pak njedóstašej Ričel a Lejnart bul do klětki (73.). A w poslednjej mjeńšinje wotwobara hóstny wrotar nisku třělwu Čornaka runje hišće tak na wrotowej liniji.
Partije wokrjesneho pokala
Sobotu a njedźelu, 22. a 23. awgusta, wuhraje so prěnje koło wokrjesneho koparskeho pokala. Prěnje mustwa su z wjetšeho dźěla hižo koło dale, za to dyrbja najprjedy raz rezerwy jednotliwych sportowych towarstwow nastupić. Sćěhowace duele ze serbskim wobdźělenjom su wulosowane:
SJ Chrósćicy II – TSV Wachau II
Zeleno/Běli Sepicy II – Ralbicy/Hórki II
Łužica Wojerecy II – Marijina hwězda II
SV Seeligstadt – SJ Njebjelčicy IISN
W Čěskej a Pólskej wo dypki hraja
Mjeztym zo budźe pola nas w prěnjej zwjazkowej lize start do noweje sezony jutře za tydźeń, koparjo w Čěskej a Pólskej hižo wo dypki hraja. W Čěskej bě Slovan Varnsdorf postupnik, ale přemałeho stadiona dla dyrbješe so wzdać. Tak stej nowačkaj FC Fastav Zlín a Sigma Olomouc. Zlín postara so z dwěmaj dobyćomaj w prěnimaj kołomaj wo překwapjenje. Mišter Viktoria Plzeň dyrbješe sej po dobyću na spočatku pola Dukle w Praze poražku 0:1 lubić dać. Pokalny dobyćer Slovan Liberec, loni jenož dwanaty tabulki, měješe spokojacy start a steji na druhim městnje. Tole je tuchwilny staw na čole tabulki:
1. Fastav Zlín 6 dypkow
2. Slovan Liberec 4 dypki
3. FK Teplice 4 dypki
4. Sparta Praha 4 dypki
5. Fk Jablonec 4 dypki
Nowačkaj w Pólskej stej Zagłębie Lubin a scyła prěni raz LKS Nieciercze. Mišter Lech Poznań a pokalny dobyćer Legia Waršawa stej derje startowałoj, nowačkaj matej so porno tomu ćežko. Na čole tabulki je tuchwilu tónle staw:
1. Legia Waršawa 9 dypkow
2. Cracovia Krakow 7 dypkow
3. Korona Kielce 6 dypkow
4. Górnik Leczna 6 dypkow
5. Piast Gliwice 6 dypkow
Žane wrota so njeradźili
Sokoł Ralbicy/Hórki
– Budissa Budyšin II 0:3 (0:1)
Za domjacych zasadźeni: Gloxyn – Matka, Nuk, Bjeńš, Domaška, Lulak, Čórlich, Korjeńk, von Köding, B. Bejma, T. Bejma, Wałda, Šołta
Tak jasny kaž wuslědk hra scyła njebě. Prěnje štwórć hodźiny postajowaše ju koparska rezerwa Budissy, kotraž bě hač na Gärtnera kompletna. Sokoljo pak derje stejachu a spytachu přez kontery k šansam dóńć. Tajke so poněčim tež skićachu. Najprjedy natřěli Domaška po róžku jenož wrotarja. Po tym sej wón wulkotnje bul wuwojowa a wuhra poslednjeho muža, ale wospjet na nim zwrěšći. Wrotar pak skoči Domašce tak hrubje do nohow, zo móhł sudnik poprawom jědnatku postajić. Dalši kop Tomaša Bejmy wrota snadnje misny. Po poł hodźince padnychu nadobo z ničeho wrota za hosća. Becker wuhra Lulaka a smokny bul z 20 metrow do dołheho kuta. Ze zbožom by jón wrotar Gloxyn snano wotwobarał. Nětko měješe Budissa znowa lěpše hrajne podźěle, dalše šansy pak njewuskočichu.
Dwójny test přećiwo delanskim koparjam
SJ Njebjelčicy
– Sokoł Ralbicy/Hórki 0:6 (0:2)
Hižo minjeny pjatk wječor powita koparska trenarska dwójka Njebjelčanskeje SJ Panic/Krawčik sylneho kontrahenta Sokoł Ralbicy/Hórki. Wšitkim bě wězo zwoprědka jasne, zo budźe to jara ćežke pruwowanje.
Sylne a spěšne nadběhi móžachu Njebjelčenjo jenož w spočatnych 20 mjeńšinach wotwobarać. Z wysokej třělwu poradźi so Stefanej Bjenšej nawjedowanje. Dale dyrbješe so domjacy cyłk na zakitowanje wusměrić, dokelž ćišć Sokoła dale wosta. Njebjelčanam poradźi so lědma konstruktiwny nadběh, dokelž dyrbjachu so tež srjedźnopólni akterojo přeco zaso wróćo sćahnyć. Krótko do přestawki hosćo na 0:2 zwyšichu. Foulowu jědnatku bě Bosćij Bejma wěsće přetworił. Přez dwójny dyr w 56. a 57. min. zwyšištaj Tomaš Bejma a Gabriel Kurjat na 0:4. Wo kónčne 0:6 postaraštaj so potom hišće bratraj Gabriel a Měrćin Kurjat w 72. a 82. min. Sokoljo přez cyłu partiju jasnje pokazowachu, zo hraja klasu wyše. Wuslědk 6:0 je tuž w porjadku.
SJ Njebjelčicy II
– Sokoł Ralbicy/Hórki II 2:3 (1:2)
Poslednje testy do zazběha sezony
Satkula w Róžeńće pozastała
U 23 Budissy z nowym trenarjom
Wot tuteje sezony steji za rezerwu regionalneho koparskeho ligista Budissy Budyšin nowy trenar při wonkownej
liniji. Je to 36lětny Čech Jiří Krohmer. W krótkej rozmołwje z Hanspeterom Benadom přeradźa wón mjez druhim přičiny změny a mjenuje zaměry mustwa, w kotrymž tež serbskaj młodostnaj Denny Gloxyn a Paul Zimmermann za bulom honitaj.
Knježe Krohmero, minjenu sezonu sće hišće A-młodźinu Pósta Germanije Budyšin trenował. Čehodla sće nětko k rezerwje Budissy šoł?
J. Krohmer: Dožiwich z A-młodostnymi wulkotnu sezonu. Smy so z wokrjesnym mištrom stali, njejsmy pak postupili. Tohodla pytach za nowym wužadanjom. Tomaš Henčl poskići mi městno pola U 23, a tak njejsym dołho přemyslowł a spěšnje připrajich.
Kotre cile maće ze swojim nowym koparskim cyłkom?
J. Krohmer: Je to stajnje jara młode mustwo z mnohimi A-młodostnymi. Mój primarny cil je, so wo dalewuwiće jednotliwcow starać. Wězo chcemy tež rjanu a wuspěšnu kopańcu hrać.
Kotre městno měło tuž w tabulce wuskočić?
J. Krohmer: Myslu sej, zo je prěnje do pjate městno realistiske.
Konjecy-Šunow dale načolnik
Minjeny pjatk su so čłonojo dohromady 19 wohnjowych woborow w Róžeńće
w hašenju wubědźowali.
Započało je pjeć woborow z kameradami, staršimi hač 40 lět. Tam wopokaza so Mučow jako najlěpši cyłk z časom 35:50 sekundow. Druhe městno wobsadźichu Salowčenjo, třeće Brěžčenjo. Domjacy Róžeńčenjo dyrbjachu swój běh prjedy skónčić, dokelž mějachu problemy při rozdźělaku.
Po wubědźowanju staršeje gardy stej dwě młodźinskej woborje z gmejny Ralbicy-Róžant a Wotrowa/Pančic-Kukowa mocy měriłoj. Delanscy młodostni drje mějachu špatniši čas, diskwalifikacije jeničkeho konkurenta dla pak dźěše prěnje městno na nich.
