Sport (11.03.16)
Přeprošeja na „hłownej“
SJ Chrósćicy přewjedźe swoju hłownu a wólbnu zhromadźiznu dźensa wot 20 hodź. w Chróšćanskej wjacezaměrowej hali „Jednota“. Dźens za tydźeń, 18. měrca, přeproša ST Marijina hwězda w Pančicach-Kukowje na hłownu zhromadźiznu. Wona budźe we wjacezaměrowym kompleksu na tamnišim sportnišću. Předsydstwo wočakuje mnohich wobdźělnikow.
Hraja wo pokal Domowiny
Loni bě jich 18 cyłkow, lětsa je so 20 přizjewiło. Mjeztym 34. raz hraja jutře, sobotu, w Budyšinje wo pokal Domowiny při wysokim saku. Zarjadowar a wuhotowar turněra je Serbski Sokoł zhromadnje z volleyballowymi cyłkami Sokoła Budyšin, Škita Budyšin a mustwa abiturneho lětnika 1996. Sportowcy zetkaja so w hali na Třělnišću we 8 hodź., turněr započnje so napoł dźewjećich. Hač do 13 hodź. poskića Sokołki a Sokoljo w małej sportowni dźěćacu zaběru.
Kickerowy turněr
Dźesać hrow pospochibjez dobyća
Zašłu njedźelu su koparjo Budissy Budyšin doma FC Carl Zeiss Jenje 0:2 podleželi. Wo jich napjatym połoženju w pincy tabulki je Hanspeter Benad za Serbske Nowiny z kapitanom mustwa Martinom Kolanom porěčał.
Knježe Kolano! Nětko sće tež přećiwo Carl Zeiss Jenje přěhrali. Je alarmowy zwónčk hižo zašaltowany?
M. Kolan: Wědźachmy hižo do hry, zo smy znowa w zestupnym boju. Kóždy z tabulki 3. ligi wučita, zo móže z njeje hač do pjeć cyłkow zestupić.
Přichodnu hru wotmějeće w Schönbergu pola tabulkoweho susoda. Kajke su tam šansy dypk docpěć?
M. Kolan: Přećiwnik hraje někak na našej runinje. Mamy wojować a hač k swojim hranicam běhać. Nimo toho dyrbimy před wrotami strašnišo agěrować. Potom móžemy tež FC Schönberg porazyć.
W najhóršim padźe zestupi pjeć mustwow z třećeje do regionalneje ligi. Je wam to znate?
M. Kolan: To wěmy hižo wo spočatka hrajneje doby 2015/2016.
Na čim klaca w Budissy porno prěnjej połseriji?
Zaso njewuspěšni
FSV Budissa Budyšin – FC Carl Zeiss Jena 0:2 (0:0)
Zestawa domjacych: J. Jakubov – Kolan, Patka, Pfanne, Kral, Hoßmang, Hansch, Rosendo (80. Heppner), Hausdorf, Salewski, Reher
Hósć na Budyskej Młynkec łuce běchu minjenu njedźelu koparjo Carl Zeiss Jeny. Wobaj cyłkaj chcyštej porjadnu kopańcu poskićić, dokelž běštej naposledk přěhrałoj. Budissa bě w Halberstadće špatnu hru pokazała a Carl Zeiss bě zašłe štyri partije přěhrał. Z dobyćom chcyštej so mustwje zaso na puć wuspěcha podać a přiwabištej 750 přihladowarjow. Mjez nimi bě tójšto z Jeny. Tomaš Henčl tónkróć schorjenja dla pódla njebě. Jeho zastupowaše kotrenar Reimund Linkert. Nimo Klippela, kiž bě zranjeny, pobrachowaše Walther, a to pjateje žołteje karty dla. To njeběchu wězo dobre wuměnjenja. Budissa pak so prócowaše, pokaza porjadnu partiju a w prěnim połčasu duel postajowaše. Njezbožo měješe w 27. min., jako sudnik w šěsnatce hosći hraće z ruku přewidźa. Krótko po tym ležeše bul w přećiwniskich wrotach (28.). Reher, třělc wrotow, pak bě w nimohrě stał.
Wuslědki (10.03.16)
Regionalna liga
Nordhausen – Babelsberg 03 2:0 (2:0)
FC Viktoria – BFC Dynamo 3:2 (2:0)
Rathenow – Halberstadt 0:3 (0:1)
Hertha BSC II – RB Lipsk II 1:1 (1:1)
Auerbach – Berlinski AK wotprajena
Meuselwitz – Schönberg 1:0 (0:0)
Luckenwalde – Zwickau 0:5 (0:4)
Neustrelitz – Neugersdorf 0:2 (0:2)
Budissa Budyšin – Jena 0:2 (0:0)
1. Zwickau 22 50:14 52
2. Nordhausen 23 44:22 47
3. Neugersdorf 22 37:22 42
4. BFC Dynamo 22 49:34 41
5. Berlinski AK 21 33:14 40
6. Babelsberg 03 23 33:15 38
7. Jena 22 26:14 38
8. Auerbach 22 39:30 34
9. Hertha BSC II 23 35:42 33
10. RB Lipsk II 23 35:35 28
11. Neustrelitz 22 31:31 28
12. Meuselwitz 23 26:41 28
13. Budissa Budyšin 23 29:22 25
14. Schönberg 23 27:33 25
15. FC Viktoria 22 26:40 20
16. Halberstadt 23 27:52 16
17. Luckenwalde 22 16:63 10
18. Rathenow 23 17:50 9
Bolostna poražka
ST Marijina hwězda – SV Frankenthal 1:2 (1:1)
Zestawa domjacych: Schmidt – Wróbl, Škoda, Łušćanski, Lipič, Peschmann, Bělk, D. Jurš, T. Jurš, Pakoßnick, Korjeńk (80. Vacek)
W načolnej hrě wokrjesneje koparskeje ligi pobrachowaše ST Marijinej hwězdźe znowa sep stajnych hrajerjow. Njelěpšina pak so w prěnjej štwórć hodźinje na hru njewuskutkowa. Prěnjej składnosći, 1:0 docpěć, měještaj Měrko Korjeńk a Dawid Jurš. Woběmaj pak so to njeporadźi. W 12. min. pak ležeše bul tola we wrotach. Falko Peschmann bě jón po wólnym kopje Tobiasa Škody do saka třělił. Młoda asistentka sudnika pak rozsudźi na nimohru. Nětko tež hosćo sobu hrajachu, ale tež woni njemóžachu najprjedy raz wrota docpěć. Po spěšnym konteru přez lěwy bok a preciznej přihrawce dosrjedźa poradźi so Frankenthalej 0:1 (37.). Na zbožo Měrko Korjeńk krótko do połčasa wuruna.
Po přestawce mějachu hosćo wjace wot hry. Rozsudna scena pak nasta w 74. min. Po wotkopje Frankenthalskeho wrotarja bě Lipič bul wopak wobličił. Hosćo jón přiwzachu a trjechichu 1:2 (74.). Nětko běchu domjacy dale a ofensiwniši, dokelž chcychu na kóždy pad 2:2, njemějachu pak žadyn wuspěch.
Dobyli, wjac pak nic
SJ Njebjelčicy – ST Wóslink/Skaskow 2:0 (1:0)
Zestawa domjacych: Hahn – Kral, Deleńk, Pawlik, Haška, Cyž, Hanuza, Lejnart (83. Mjechela), Hrjehor, Ričel (60. Hommel), Hoelzel (77. Šołta)
To njebě runjewon spodobna kopańca minjenu njedźelu na trawniku w Njebjelčicach. Přećiwnik z Wóslinka postupowaše poměrnje robustnje. K tomu přińdźe, zo kwalita Njebjelčanskich hrajerjow w zašłym času dale a bóle popušća. Jenož derje, zo nawjedowaše cyłk Detlefa Panica/Handrija Krawčika hižo w 3. min. z 1:0. Robert Lejnart so ze srjedźneho pola wušiknje do šěsnatki přesadźi. Tam wobkruži wrotarja a suny bul do saka hosći. Na to so dlěši čas ničo naspomnjenjahódne njesta. Krótko do přestawki přesadźi so Tadej Cyž po dalokim zamjeće, wrotar pak bě na městnje. Tak tež po solowym běhu Lejnarta w 43. min.
Wulke wjeselo na tribunje
Viktoria Worklecy – Módro-běli Wojerecy II 3:1 (23:25, 25:18, 25:22, 25:11)
Tribuna we Worklečanskej ćěłozwučowarni bě minjenu sobotu hač na poslednje městno wobsadźena. Volleyballisća Viktorije mějachu tam swój posledni domjacy hrajny dźeń w sezonje 2015/2016. A runje tale tribuna, kotraž postara so zhromadnje z domjacym přiwiskom znowa wo wosebitu astmosferu a kotraž toho abo tamneho přećiwnika zatraši, budźe snano po přetwarje hale mjelčiša.
Rjany volleyball pokazali
Jako hósć nastupichu Marijine hwězdźički pola štwórteho tabulki w Budyšinje. Na zbožo móžachu z prěnjej šestku nastupić, kotraž bě so hižo w hrě přećiwo Chróstawje wuběrnje prezentowała.
MSV Budyšin 04 – Marijina hwězda 0:3 (18:25, 23:25, 22:25)
Z dźesać mužemi bjez šansy byli
LSV Nowe Město nad Sprjewju II
– Sokoł Ralbicy/Hórki II 4:0 (4:0)
Zestawa hosći: Cyž – Bogusz, Materna, M. Matka, Šołta, Jakubaš, Kobalc, T. Matka, Čornak, Šmit
Koparjo Sokoła II nastupichu daloku jězbu do Noweho Města z jeničce dźesać mužemi. Porno hrě před tydźenjomaj běše mustwo na wosom pozicijach změnjene. Hubjene to předznamjenja. Prěnje štwórć hodźiny pak Sokoljo wěsće stejachu. Zo to cyłu hru njezamóža, běše jasne. W 17. min. startowachu domjacy nadběh, Tomaš Matka a Bogusz pak tróšku přepozdźe zakročištaj. Buder Cyža k 1:0 přewiny. Dwě mjeńšinje pozdźišo postaji sudnik wólny kop. Tež tón Fallant přez murju do hornjeho třiróžka přetwori. Cyž běše bjez šansy. Dalše njezbožo bě, zo Bogusz w 23. min. do swójskich wrotow trjechi, chcyjo nisku flanku wotwobarać. W 39. min. znowa klinkaše. Fallant połoži sej bul k wólnemu kopej a trjechi direktnje k 4:0. Wospjet nastupi k wólnemu kopej, ale trjechi na zbožo jeno žerdź. W poslednjej mjeńšinje zawinowa Kobalc jědnatku. Třělc pak sadźi kulowatu kožu pódla wrotow.
Hišće wyše dobyć móhli
Zeleno-běli Bukecy
– Sokoł Ralbicy/Hórki 1:5 (1:1)
Zestawa hosći: Gloxyn – Korjeńk, Schultz, Bjeńš, K. Matka, Šewc, Šołta, Wałda (88. M. Kurjat), T. Bejma (72. M. Matka), G. Kurjat, Domaška
Zeleno-běłym koparjam z Bukec jako štwórtym wot zady w tabulce hrozy zestup a tak trjebaja kóždy dypk. Sokoł steji porno tomu na dobrym štwórtym městnje w hornjej třećinje tabulki. Přiwšěm njebě w minjenych hrach přećiwo nim wuspěšny. Z Křesćanom Bejmakom a Stefanom Bjeńšom dyrbješe tónkróć dweju stajneju hrajerjow narunać.
