Krótkopowěsće (21.11.22)
Z busom k twórbam Buka
Budyšin. Na busowu ekskursiju po slědach twórbow serbskeho molerja Jana Buka na twarjenjach w regionje je so wčera 20 wosobow z Łužicy a Pólskeje podało. Pozastali běchu mjez druhim w Malešecach, Bukecach, Ralbicach, Sulšecach a Pěskecach. Budyski Serbski muzej a Drježdźanske statne wuměłstwowe zběrki běštej na tule njewšědnu wuprawu přeprosyłoj.
Chcedźa energiju lutować
Drježdźany/Zhorjelc. Ze zahajenjom tepjenskeje periody je zajim sakskich komunow nastupajo móžnosće lutowanja energije dale wulki, Sakska energijowa agentura zdźěli. Na nastork městow Zhorjelc a Reichenbach kaž tež Rudnohórskeho wokrjesa je so spočatk měsaca 80 zastupjerjow ze wšelakich zarjadnistwow online zetkało, zo bychu so wo wotpowědnych alternatiwach wuměnili.
Hodowny štom z Łužiskich horow
Krótkopowěsće (18.11.22)
Žadaja sej wotstup prezidenta
Budyšin. Serbske młodźinske towarstwo Pawk žada sej wotstup prezidenta Młodźiny europskich narodnosćow (JEV), Andora Barabása. Wón swojej wažnej róli w prezidiju FUEN, kotremuž přisłuša, „bohužel njewotpowěduje“. W statemenće kritizuje Pawk minjenu hłownu zhromadźiznu FUEN w Berlinje a jednanje prezidenta JEV při tym.
Pjenjezy za serbsku skupinu
Drježdźany. Z tak mjenowanej crowdfunding-akciju chce towarstwo Stup dale w Drježdźanach pjenjezy nazběrać, zo bychu w dalewobstaću wohroženu tamnišu serbsku pěstowarsku skupinu zachowali. Docpěć chcedźa 10 000 eurow za zapłaćenje podruže wužiwanych rumnosćow za přichodnej lěće, kaž Serbski rozhłós dźensa rozprawja. Dotalny nošer skupiny bě zrěčenje kónc lěta wupowědźił.
Bjezbarjernje po puću
Krótkopowěsće (17.11.22)
Za škit a podpěru delnjoněmčiny
Podstupim. Braniborski kabinet je wutoru rozprawje ministerstwa za kulturu a wědomosć přihłosował, pruwować zakonjedawarske předewzaće za škit delnjoněmčiny. Z pruwowanskeje rozprawy wuchadźa, zo je zakoń móžny puć k škitej a podpěrje delnjoněmskeje rěče w Braniborskej, a tam su ćežišća za to podate. Rozprawu nětko krajnemu sejmej k dalšemu wobdźěłanju posrědkuja.
Dosć kandidatow nadal njeje
Budyšin. Doba za zapodaće kandidaturow ze Sakskeje za přichodnu wólbnu periodu załožboweje rady je hač do srjedy, 30. nowembra, podlěšena. Zwjazkowe předsydstwo Domowiny je we wokolnym wothłosowanju namjet prezidija sćěhowało. Wólby su we wobłuku wurjadneho posedźenja zwjazkoweho předsydstwa 13. januara 2023 předwidźane.
Maja Rusku za „teroristiski“ stat
Krótkopowěsće (15.11.22)
Lubijske towarstwo mytowane
Drježdźany. Mjez lawreatami lětušeho Sakskeho integraciskeho myta je towarstwo „Augen auf e. V.“ z Lubija. Ze swojim projektom arabskeho kofejoweho stana wjedźe ludźi wot 2016 w Hornjej Łužicy hromadźe a wolóža zetkawanja mjez domoródnymi a ludźimi z migraciskim pozadkom. Tući planuja a dohladuja kofejowy stan. Myto su wčera w Drježdźanach přepodali.
Pittkunings w podcasće
Choćebus. W 100. wusyłanju Choćebuskeho podcasta „nulldrei55“ minjeny tydźeń běše hudźbnik Bernd Pittkunings z hosćom. Wuměłc swjeći lětsa 40lětny jewišćowy jubilej. Wusyłanje słyšiće pod
Móst nadal njewěsty
Hrádek nad Nisou/Žitawa/Bogatynia. Hižo 18 lět planowany „trójny“ móst přez łužisku Nysu w krajowym třiróžku Čěskeje, Němskeje a Pólskeje je legislatiwnych zadźěwkow a wysokich zawjazkow dla dale njewěsty. Za móžny twar trjebaja tři twarske dowolnosće po předpismach wobdźělenych krajow. Ideju jednorišeho mosćika znajmjeńša mjez Čěskej a Němskej pólska strona wotpokazuje.
Scolari zakónči karjeru
Krótkopowěsće (14.11.22)
Sněhakowanje zawěsćene
Oberwiesenthal. Byrnjež energijowe płaćizny stupali budźe sněhakowanje z podpěru kumštneho sněha w Sakskej móžne. Lutować chcedźa na přikład při wobmjezowanym poskitku nócneho sněhakowanja. Dźěl stupacych kóštow połoža na sněhakowanske jězdźenki. Tak stupa płaćizna za dnjowy pas na Šmrěčniku (Fichtelberg) wo štyri na 39 eurow a w Altenbergu wo dwaj na 20 eurow.
Nětko tež w delnjoserbšćinje
Lipsk. Dyrdomdeje pjećoch přećelow z knihi Lubiny Hajduk-Veljkovićoweje hodźa so nětko tež delnjoserbsce-němsce čitać. Delnjoserbski přełožk knihi „Małe pśijaćele – Dolina pśi rěce“ wot Franca Jura Deuse je Kraj Braniborska spěchował. Choćebuski wotrjad Rěčneho centruma WITAJ knihu na pěstowarnje a zajimowanych starši rozdźěli.
Najlěpši kwisowarjo
Krótkopowěsće (11.11.22)
Zběhnu winowatosć izolacije
Stuttgart. Štyri zwjazkowe kraje – Badensko-Württembergska, Bayerska, Hessenska a Schleswigsko-Holsteinska – su so na to dorozumili, winowatosć izolacije z koronu natyknjenych wosobow zběhnyć. Bórze maja tam nowe rjadowanja płaćiwosć nabyć, zdźěli dźensa strowotniske ministerstwo w Stuttgarće.
Marcusa Końcarja wobkrućili
Budyšin. Jednaćel Domowiny Marcus Końcaŕ zastupuje Serbow w rozhłosowej radźe Rozhłosa Berlin-Braniborska tež w dobje 2023 do 2027. Prezidij třěšneho zwjazka je w mjenje zwjazkoweho předsydstwa namjet předsydstwa župy Delnja Łužica předwčerawšim wobkrućił. Zwjazkowe předsydstwo ma na swojim posedźenju 25. nowembra klětušu hłownu zhromadźiznu zwołać, prezidij namjetuje 22. apryla 2023 w Choćebuzu.
Podpěra za sotrownje
Krótkopowěsće (10.11.22)
Dalše namjety trěbne
Budyšin. Dobu za zapodaće kandidaturow ze Sakskeje za přichodnu wólbnu periodu załožboweje rady hač do kónca nowembra podlěšić je prezidij Domowiny na swojim wčerawšim posedźenju jednohłósnje namjetował. Dotal pjeć personalnych namjetow předleži, trěbnych pak je znajmjeńša wosom za štyrjoch rjadnych a štyrjoch zastupowacych radźićelow. Jich wólby su na wurjadnym posedźenju zwjazkoweho předsydstwa 13. januara 2023 předwidźane.
Budyšan předsydari kuratorijej
Drježdźany. Budyski kachlicarski mišter a wokrjesny radźićel Mike Hauschild předsydari kuratorijej Wilhelma Külzoweje załožby, liberalneho kubłanskeho skutka w Sakskej. Čłonojo gremija su jeho 5. nowembra wuzwolili.
Snadne wuskutki
Krótkopowěsće (09.11.22)
„Eksil a wuznam wjacerěčnosće“
Drježdźany. Dalmatiska basnica Marica Bodrožić je předwčerawšim z prěnim čitanjom w centralnej bibliotece Drježdźanskeho kulturneho palasta Chamisso-docenturu poetiki Sakskeje akademije wuměłstwow 2022 nastupiła. Jeje ćežišća, na kotrež chce z dalšimaj čitanjomaj stajnje póndźelu nawjazać, běchu „domizna, eksil a wuznam wjacerěčnosće“ .
Najwjetši slědźerski projekt
Lipsk. Zhromadna wědomostna konferenca Zwjazka a zwjazkowych krajow je wčera „Slědźerski portal BACH“ Sakskeje akademije wědomosćow přizwoliła. Z tym móže dotal najwjetši projekt k wuslědźenju wuznamneje hudźbneje dynastije w januarje 2023 startować. Projekt ma 25 lět běžeć a je dźěl akademijoweho programa, kotryž je aktualnje najwjetši duchowno- a kulturnowědny dołhodobny slědźerski program Němskeje.
Morawske wědomje žiwe
Krótkopowěsće (08.11.22)
Pop raz hinak
Budyšin. Wosebite hudźbne chłóšćenki poskića serbska hudźbna skupina Brankački. W kooperaciji z radijowym sćelakom MDR Jump poskićeja jako skupina Popsorben na Instagramje hudźbny kwis z coverami znatych spěwow w stilu polki.
Nowy wučer za kurs čěšćiny
Chrósćicy. Nowy rěčny kurs čěšćiny je wčera w Chrósćicach z nowym wučerjom Jiřijom Jonákom startował. Wón je naslědnik Jana Breindla, kotryž bě dotal w nadawku Rěčneho centruma WITAJ dźěći kaž tež dorosćenych w čěšćinje wuwučował. 47lětny Jiři Jonak pochadźa z Ústíja nad Labem a je w minjenych 16 lětach w Brüsselu wuwučował.
Hišće njerozjasnjene prašenja
Drježdźany. Na wčerawšim 3. sakskim energijowym wjeršku zastupjerjow sakskeho knježerstwa a zwjazkow wšelakich branšow běchu hišće wotewrjene prašenja nastupajo zwoprawdźenje wot Zwjazka planowanych wolóženjow k złahodnjenju energijowych płaćiznow. Hospodarski minister Martin Dulig (SPD) připowědźi podpěru swobodneho stata, dyrbjał-li pomocny fonds Zwjazka za małe a srjedźostawske předewzaća hišće dźěry wotkryć.
Krótkopowěsće (07.11.22)
Fachowe zetkanje dźiwadłow
Brest. Na zetkanju mjezynarodneho mjeńšinoweho dźiwadłoweho projekta „Phōnē – mjeńšinowym rěčam hłós dać“ minjeny kónc tydźenja w francoskim Bresće wuradźowachu zastupjerjo marketingowych wobłukow wobdźělenych jewišćow wo „komunikaciskich strategijach“ a předstajichu internetowu stronu projekta. Reprezentantka Němsko-Serbskeho ludoweho dźiwadła bě Anna Měrćinowa.
Inwestuja něhdźe miliardźe eurow
Choćebuz. Za planowane zaměstnjenje medicinskeje fakulty z dohromady 60 profesurami a wutwar komunalneje Carla Thiemoweje chorownje w Choćebuzu na uniwersitny klinikum maja so 1,9 miliardow eurow ze strukturneho fondsa Zwjazka za brunicowe regiony nałožować. Projekt je dźěl wutworjenja modeloweho regiona „Strowota Łužica“.
Myta Grünbauma spožčili
